លោកនាយករដ្ឋមន្ត្រី ហ៊ុន សែន ថ្លែងថា អាជ្ញាធរកម្ពុជានឹងប្រើយន្តហោះ ៣គ្រឿងសម្រាប់ដឹកអ្នកដំណើរនៃនាវា MS Westerdam ចេញពីកម្ពុជាទៅកាន់ប្រទេសផ្សេងៗនៅថ្ងៃនេះ។
ក្នុងពិធីប្រគល់សញ្ញាបត្រដល់គរុសិស្ស-និស្សិតនៅវិទ្យាស្ថានជាតិអប់រំ នាថ្ងៃនេះ លោក ហ៊ុន សែន បានថ្លែងថា អ្នកដំណើរនៃនាវា MS Westerdam ប្រមាណ ៥០០នាក់ ដែលកំពុងស្នាក់នៅរាជធានីភ្នំពេញ នឹងចាកចេញកម្ពុជា តាមជើងយន្តហោះ៧៧៧មួយគ្រឿង ដែលអាចដឹកមនុស្សបានជាង ៣០០នាក់ ហោះហើរទៅកាន់ទីក្រុងឌូប៉ៃ។
លោក ហ៊ុន សែន មានប្រសាសន៍ថា៖ «យន្តហោះ ១គ្រឿង ដែលដឹកបានជាង ៣០០នាក់ពីទីក្រុងភ្នំពេញទៅឌូប៉ៃ។ អាហ្នឹងតាមព័ត៌មានពីខាងនាវា។ យន្ត(យន្តហោះ)មួយគ្រឿងទៀត នឹងដឹកពីទីក្រុងភ្នំពេញទៅជប៉ុន ចេញពីហ្នឹង ហើយអាចមានយន្ត(យន្តហោះ)មួយគ្រឿងទៀត ចេញពីក្រុងព្រះសីហនុ ទៅរដ្ឋធានីប្រទេសណាមួយនៅក្នុងតំបន់របស់យើងនេះ»។
លោក ហ៊ុន សែន បន្តថា ប្រសិនបើកម្ពុជាមិនអនុញ្ញាតឱ្យនាវា MS Westerdam ចូលសំចតទេ វានឹងក្លាយទៅជាវិបត្តិមនុស្សធម៌ក្នុងសកលលោក។
លោកនាយករដ្ឋមន្ត្រី ហ៊ុន សែន បានអនុញ្ញាតឱ្យនាវា MS Westerdam បានចូលចតនៅកំពង់ផែស្វយ័តខេត្តព្រះសីហនុ កាលពីថ្ងៃទី១៣ ខែកុម្ភៈ។ នាវាទេសចរណ៍អាមេរិកឈ្មោះ MS Westerdam មានផ្ទុកអ្នកដំណើរ និងបុគ្គលិកបម្រើការលើនាវាចំនួន ២ ២៥៧នាក់ មកពី ៤១ជាតិសាសន៍ បានចេញធ្វើដំណើរពីទីក្រុងហុងកុងកាលពីថ្ងៃទី០១ ខែកុម្ភៈ។
នាវាវេស្ទើដាម ត្រូវបានអាជ្ញាធរកោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ និងប្រទេសថៃ បដិសេធមិនឱ្យចូលចត ដោយពួកគេបារម្ភថា អ្នកនៅលើនាវានោះអាចមានផ្ទុកវីរុសកូរ៉ូណា៕