លោកនាយករដ្ឋមន្ត្រី ហ៊ុន សែន ជំរុញឱ្យភាគីពាក់ព័ន្ធពន្លឿនបើកសវនាការលើអ្នកជាប់ឃុំជាស្ត្រី ហើយលោកបញ្ជាក់ថា បើសិនតុលាការមិនមានបន្ទប់គ្រប់គ្រាន់សម្រាប់បើកសវនាការនោះ អាចជួលសណ្ឋាគារទៅ។
ក្នុងកិច្ចប្រជុំបូកសរុបការងាររបស់ក្រុមប្រឹក្សាជាតិកម្ពុជាដើម្បីស្ត្រីនៅថ្ងៃនេះ លោកនាយករដ្ឋមន្ត្រី ហ៊ុន សែន បានជំរុញឱ្យក្រុមប្រឹក្សាជាតិដើម្បីស្ត្រី និងក្រសួងកិច្ចការនារី សហការជាមួយក្រសួងមហាផ្ទៃ តាមដានរឿងស្ត្រីជាប់ឃុំ ដើម្បីពន្លឿនការកាត់ទោសឱ្យបានឆាប់។
ក្នុងឱកាសនោះ លោកជំរុញឱ្យជួលសណ្ឋាគារសម្រាប់កាត់ក្តី បើសិនជាខ្វះកន្លែងសម្រាប់បើកសវនាការ។
លើហ្វេសប៊ុកលោកសរសេរថា៖ «សុំអោយក្រសួងយុត្តិធម៌ត្រូវពន្លឿនការងារនេះ ដែលបច្ចុប្បន្ននេះលឺថាមានជាង២ម៉ឺនសំណុំរឿងដែលមិនទាន់បានកាត់ក្តី ដូច្នេះត្រូវពន្លឿនសំណុំរឿងនេះអោយបានឆាប់ ហើយបើខ្វះសាលសវនាការកាត់ក្តី សម្តេចតេជោបានមានប្រសាសន៍បញ្ជាក់ថា អាចជួលសណ្ឋាគារកាត់ក្តីតែម្តងទៅ»។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា កន្លងមក ស្ត្រីម្នាក់រងការចោទថា ប្រើប្រាស់គ្រឿងញៀន លោកថា សំណុំរឿងនេះអាចឱ្យនៅក្រៅឃុំបណ្តោះអាសន្នបាន។ ប៉ុន្តែ ដោយសារភាពយឺតយ៉ាវក្នុងការកាត់ក្តី ធ្វើឱ្យកូនមិនទាន់គ្រប់មួយខួបរបស់ស្ត្រីរូបនោះ ស្លាប់បាត់បង់ជីវិតនៅក្នុងពន្ធនាគារ។
ករណីនេះ លោក អំ សំអាត ជំរុញទៅតុលាការគួរតែអនុវត្តតាមប្រសាសន៍របស់លោកនាយករដ្ឋមន្ត្រី ហ៊ុន សែន ជាជាងទុកឱ្យស្ត្រីដែលមានផ្ទៃពោះ ឬមានកូនតូចៗជាប់ក្នុងឃុំ ធ្វើឱ្យពួកគេជួបបញ្ហាប្រឈមផ្សេងៗជាដើម។
លោកមានប្រសាសន៍ថា៖ «យោងតាមប្រសាសន៍របស់លោកនាយករដ្ឋមន្ត្រី តុលាការគួរតែពន្លឿននីតិវិធីក្នុងការជំនុំជំរះរឿងហ្នឹង ហើយទីពីរ រឿងខ្លះបើមិនចាត់ក្នុងការឃុំខ្លួនបណ្តោះអាសន្នទេ គួរតែអនុញាតឱ្យស្ត្រី ជាពិសេសស្ត្រីដែលមានផ្ទៃពោះ ស្ត្រីដែលមានកូនតាមម្តាយ នៅក្រៅឃុំបណ្តោះអាសន្នជាការល្អ ជាងការឃុំខ្លួន អ្នកដែលបានឃុំខ្លួនហើយ គួរតែពន្លឿននីតិវិធីជំនុំជំរះឱ្យបានលឿន»។
អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃ លោក បេ ទាឡេង ថាចាប់ពីថ្ងៃទី១ ខែមករាមក ពន្ធនាគារព្រៃស មិនទទួលដាក់អ្នកជាប់ឃុំទៀតទេ ព្រោះមានស្ថានភាពចង្អៀត មានអ្នកជាប់ឃុំ ជាង១ម៉ឺននាក់។