ក្រសួងការបរទេសកម្ពុជា ហៅសេចក្តីសម្រេចរបស់សហភាពអឺរ៉ុបដែលដកហូតផ្នែកខ្លះនៃប្រព័ន្ធអនុគ្រោះពន្ធ «គ្រប់មុខទំនិញលើកលែងសព្វាវុធ» ជាបណ្តោះអាសន្នថា ជារឿងដ៏អយុត្តិធម៌ និងបង្ហាញពីការអនុវត្តស្តង់ដារពីរ។
ភ្លាមៗបន្ទាប់ពីការប្រកាសព្យួរផ្នែកខ្លះនៃ EBA ក្រសួងការបរទេសកម្ពុជាបានចេញសេចក្តីថ្លែងការណ៍មួយ ដោយចាត់ទុកសេចក្តីសម្រេចរបស់សហភាពអឺរ៉ុបថា ជារឿងដ៏អយុត្តិធម៌ដែលផ្តើមចេញពីការភាន់ច្រលំ និងការយល់ខុសពីតថភាពជាក់ស្តែងនៅកម្ពុជា។ ក្រសួងការបរទេសកម្ពុជា ក៏បានហៅសេចក្តីសម្រេចរបស់សហភាពអឺរ៉ុបនេះថា ធ្វើឡើងក្រោមហេតុផលនយោបាយ និងជាការអនុវត្តស្តង់ដារពីរផងដែរ។
សេចក្តីថ្លែងការណ៍ក្រសួងការបរទេសកម្ពុជាចេញផ្សាយនាយប់ថ្ងៃទី១២ ខែកុម្ភៈ សរសេរថា៖
«សេចក្តីសម្រេចនេះមិនមានអ្វីក្រៅពីការអនុវត្តស្តង់ដារទ្វេ នៅពេលដែលយើងប្រៀបធៀបប្រព្រឹត្តកម្មរបស់សហភាពអឺរ៉ុបជាមួយនឹងដៃគូពាណិជ្ជកម្មដទៃទៀត។ ទោះបីជាសេចក្តីសម្រេចនេះបានទទួលស្គាល់វឌ្ឍនភាពជាក់ស្តែងដែលរាជរដ្ឋាភិបាលកម្ពុជាសម្រេចបាននៅក្នុងវិស័យជាច្រើន ក្នុងការឆ្លើយតបទៅនឹងក្តីកង្វល់របស់គណៈកម្មការអឺរ៉ុបក៏ដោយ ក៏សេចក្តីសម្រេចនេះពុំបានទទួលស្គាល់ និងគោរពបញ្ហាជាមូលដ្ឋាននៃអធិបតេយ្យរបស់កម្ពុជា ដែលពុំមែនជាកម្មវត្ថុនៃការចរចាប្រព័ន្ធអនុគ្រោះពន្ធ ឬជាកម្មវត្ថុនៃការផ្លាស់ប្តូរដើម្បីជំនួយអភិវឌ្ឍន៍នោះឡើយ»។
ទោះយ៉ាងណាក៏ដោយ ក្នុងសេចក្តីថ្លែងការណ៍ដដែល កម្ពុជាបញ្ជាក់ជំហរថា នឹងនៅតែប្តេជ្ញាពង្រឹងទំនាក់ទំនងជាមួយសហភាពអឺរ៉ុបដោយឈរលើស្មារតីគោរព និងការទទួលផលប្រយោជន៍គ្នាទៅវិញទៅមក និងបន្តអនុវត្តន៍តាមប្រព័ន្ធប្រជាធិបតេយ្យសេរីពហុបក្ស។
សហភាពអឺរ៉ុបនៅថ្ងៃទី១២ ខែកុម្ភៈ បានសម្រេចដកហូតផ្នែកខ្លះនៃប្រព័ន្ធអនុគ្រោះពន្ធ «គ្រប់មុខទំនិញលើក លែងសព្វាវុធ» ឬហៅកាត់ថា EBA ជាបណ្តោះអាសន្ន ដោយលើកហេតុផលថា កម្ពុជាបានរំលោភសិទ្ធិមនុស្សយ៉ាងធ្ងន់ធ្ងរ និងជាប្រព័ន្ធ ដែលផ្ទុយទៅនឹងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ។
តំណាងជាន់ខ្ពស់ទទួលបន្ទុកកិច្ចការបរទេសរបស់ EU លោក Josep Borrel បានលើកឡើងនៅក្នុងសេចក្ដីប្រកាសព័ត៌មានដែលចេញនៅថ្ងៃពុធ ថា៖
«សហភាពអឺរ៉ុប នឹងមិនឈរមើលនោះឡើយ នៅពេលដែលប្រជាធិបតេយ្យ ត្រូវបានផាត់ចោល ការគោរពសិទ្ធិមនុស្ស ត្រូវបានរឹតត្បិត ហើយសេរីភាពនៃការជជែកពិភាក្សា ត្រូវបានបំបាត់»។
តាមសេចក្តីប្រកាសព័ត៌មានរបស់គណៈកម្មការអឺរ៉ុបដដែល ការដកហូតផ្នែកខ្លះនៃ EBA នេះ នឹងប៉ះពាល់ដល់ការនាំចេញរបស់កម្ពុជាទៅកាន់សហភាពអឺរ៉ុបជារៀងរាល់ឆ្នាំ ក្នុងទំហំទឹកប្រាក់ប្រហែល ១១០០លានដុល្លារសហរដ្ឋអាមេរិក។ ប្រភពដដែលឱ្យដឹងថា សេចក្តីសម្រេចនេះនឹងប៉ះពាល់ដល់ផលិតផលស្បែកជើង និងសម្លៀកបំពាក់ខ្លះ ខណៈផលិតផលសម្រាប់ធ្វើដំណើរ ក៏ដូចជា ស្ករសត្រូវបានដកហូតទាំងអស់។ ប្រសិនបើមិនមានការជំទាស់ពីសភា និងក្រុមប្រឹក្សាអឺរ៉ុបនោះទេ សេចក្តីសម្រេចពីការដកហូតផ្នែកខ្លះនៃប្រព័ន្ធអនុគ្រោះពន្ធជាបណ្តោះអាសន្ននេះ នឹងចូលជាធរមាននៅថ្ងៃទី១២ ខែសីហា ឆ្នាំ២០២០។
ស្របពេលដែលកម្ពុជាកំពុងបាត់បង់ផ្នែកខ្លះនៃប្រព័ន្ធអនុគ្រោះពន្ធ គណៈកម្មការអឺរ៉ុបនៅថ្ងៃជាមួយគ្នាបានស្វាគមន៍ការសម្រេចរបស់សភាខ្លួនក្នុងការអនុម័តកិច្ចព្រមព្រៀងពាណិជ្ជកម្មសេរីជាមួយវៀតណាម និងសាទរចំពោះការប្រឹងប្រែងរបស់វៀតណាមក្នុងការធ្វើឱ្យប្រសើរឡើងនូវសិទ្ធិការងារ។ គណៈកម្មការអឺរ៉ុបថា កិច្ចព្រមព្រៀងនឹងត្រូវចូលជាធរមាននៅឆ្នាំ២០២០នេះ បន្ទាប់ពីសភាវៀតណាមផ្តល់សច្ចាប័ន។
របាយការណ៍របស់ធនាគារពិភពលោក ចេញកាលពីឆ្នាំ២០១៩ ព្យាករថា បន្ទាប់ពីការដកផ្នែកខ្លះនៃប្រព័ន្ធអនុគ្រោះពន្ធ EBA កម្ពុជាអាចនឹងតម្រូវឱ្យបង់ពន្ធប្រហែល១២ភាគរយលើផលិតផលសម្លៀកបំពាក់ និង ១៦ភាគរយលើស្បែកជើង សម្រាប់ការនាំចេញទៅអឺរ៉ុប។
អតីតប្រធានគណបក្សប្រឆាំងដែលកំពុងរស់នៅនិរទេសខ្លួននៅបរទេស លោក សម រង្ស៊ី បានថ្លែងប្រាប់វីអូឌីតាមអ៊ីមែលថា លោកគាំទ្រទាំងស្រុងទៅនឹងលក្ខខណ្ឌរបស់សហភាពអឺរ៉ុបដែលរដ្ឋាភិបាលកម្ពុជាត្រូវតែគោរព ដើម្បីចៀសវាងពីការដកហូតផលប្រយោជន៍ពាណិជ្ជកម្ម។
មេដឹកនាំអតីតបក្សប្រឆាំងរូបនេះបន្តថា៖ «យើង (អតីតគណបក្សសង្រ្គោះជាតិ) បានបំពេញតួនាទីរបស់យើង ដើម្បីប្រជាជនកម្ពុជា ដោយឈរយ៉ាងរឹងមាំជាមួយសហភាពអឺរ៉ុបក្នុងការការពារសិទ្ធិមនុស្ស សិទ្ធិការងារ និងប្រព័ន្ធផ្សព្វផ្សាយឯករាជ្យក្នុងការស្តារប្រជាធិបតេយ្យឡើងវិញ»។
លោក សម រង្ស៊ី បន្ថែមថា ការសម្រេចចិត្តរបស់សហភាពអឺរ៉ុបនៅថ្ងៃទី១២ ខែកុម្ភៈ នឹងប៉ះពាល់ដល់ជីវភាពរស់នៅប្រចាំថ្ងៃរបស់កម្មករ និងអាជីវកម្មជាច្រើនទៀតដែលទទួលប្រាក់ចំណូលពីកម្មកររោងចក្រ។
របាយការណ៍របស់សហភាពអឺរ៉ុប បង្ហាញថា ការនាំចេញទំនិញកម្ពុជាទៅអឺរ៉ុបក្នុងឆ្នាំ២០១៨ មានទំហំប្រមាណ ៥,៨៨ពាន់លានដុល្លារ ដែលក្នុងនោះធ្វើឡើងក្រោមប្រព័ន្ធអនុគ្រោះពន្ធមានរហូតដល់ជិត៩៦ភាគរយ ឬក្នុងទំហំទឹកប្រាក់ ៥,៦៦ពាន់លានដុល្លារ។ របាយការណ៍របស់សហភាពអឺរ៉ុបដដែលឱ្យដឹងថា ទំនិញដែលកម្ពុជានាំចេញទៅទីផ្សារអឺរ៉ុបរួមមានសម្លៀកបំពាក់ ៧៤,២ភាគរយ ស្បែកជើង ១២,៦ភាគរយ កង់ ៥,៧ភាគរយ និងអង្ករ ៣ភាគរយ៕