ក្រសួងសុខាភិបាលកម្ពុជាអះអាងនៅថ្ងៃនេះថា បុរសជនជាតិចិនដែលត្រូវបានរកឃើញថាឆ្លងវីរុសកូរ៉ូណាថ្មីនោះ មានសុខភាពល្អធម្មតា ហើយករណីថ្មីនៃការឆ្លងវីរុសថ្មីនេះ ក៏មិនត្រូវបានរកឃើញបន្ថែមទៀតដែរនៅកម្ពុជា។
បុរសជនជាតិចិនម្នាក់វ័យ ៦០ឆ្នាំ ត្រូវបានធ្វើតេស្តរកឃើញឆ្លងវីរុសកូរ៉ូណាថ្មីកាលពីថ្ងៃទី២៧ ខែមករាកន្លងមក ៥ថ្ងៃក្រោយពីលោក និងសមាជិកក្រុមគ្រួសារលោក ៣រូបទៀត បានធ្វើដំណើរតាមជើងហោះហើរពីទីក្រុងអ៊ូហាន មកដល់ខេត្តព្រះសីហនុ នៅថ្ងៃទី២៣ ខែមករា។
បុរសជនជាតិចិនរូបនោះ ដែលមានឈ្មោះ ចា ជិនហួ (Ja Jianhua) ត្រូវបានត្រូវបានមន្ត្រីកម្ពុជាបញ្ជាក់ថា ត្រូវបានដាក់ឱ្យស្ថិតក្រោមការព្យាបាលនៅក្នុងបន្ទប់ដាច់ដោយឡែកពីគេនៅឯមន្ទីរពេទ្យបង្អែកខេត្តព្រះសីហនុ។
នាយកដ្ឋានប្រយុទ្ធនឹងជំងឺឆ្លង (CDC) បានបញ្ជាក់នៅលើទំព័រហ្វេសប៊ុករបស់ខ្លួនកាលពីថ្ងៃម្សិលមិញថា បុរសជនជាតិចិនរូបនោះ មានសុខភាពល្អ និងគ្មានរោគសញ្ញាផ្លូវដង្ហើម«គួរឱ្យកត់សម្គាល់»ទេ។
អ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ ប្រាប់ឱ្យដឹងបន្ថែមកាលពីថ្ងៃម្សិលមិញថា បុរសជនជាតិចិនរូបនោះ មានសុខភាពធម្មតា ប៉ុន្តែ លោកថា បុរសរូបនោះនៅពុំទាន់ជាសះស្បើយទាំងស្រុងនោះឡើយ។
លោក លី សូវ៉ាន់ ប្រាប់ថា៖ «គាត់មិនទាន់ជាសះស្បើយទេ ដោយសារវត្តមាននៃមេរោគនៅក្នុងខ្លួនរបស់គាត់។ ដូច្នេះ យើងបន្តតាមដានសុខភាពរបស់គាត់តទៅទៀត ហើយនិងព្យាបាលជូនគាត់បន្តទៀតជារៀងរាល់ថ្ងៃ»។
ខណៈដែលគ្មានឱសថណាត្រូវបានរកឃើញសម្រាប់កម្ចាត់វីរុសកូរ៉ូណាថ្មីនេះនៅឡើយនោះ លោកវេជ្ជបណ្ឌិត លី សូវ៉ាន់ បានបញ្ជាក់ថា បុរសជនជាតិចិនដែលឆ្លងវីរុសកូរ៉ូណាថ្មីនោះ ត្រូវបានព្យាបាលទៅតាមរោគសញ្ញានានានៅលើរាងកាយរបស់លោក ដើម្បីជួយពង្រឹងសុខភាពរបស់គាត់។
លោក លី សូវ៉ាន់ បន្តថា៖ «បើទោះណាយើងមិនទាន់មានឱសថព្យាបាលសម្លាប់វីរុសកូរ៉ូណាហ្នឹងក៏ដោយ ក៏ប៉ុន្តែ យើងមានវិធីព្យាបាលរបៀបគាំទ្រវេជ្ជសាស្ត្រ ឬយើងព្យាបាលតាមរោគសញ្ញា ដើម្បីរុញឱ្យសុខភាពយើងរឹងមាំ ហើយខ្លួនយើងហ្នឹងមានកម្លាំងខ្លាំងក្លាអាចសម្លាប់មេរោគហ្នឹងបាន»។
ក្រសួងសុខាភិបាលក៏បានអះអាងបន្ថែមទៀតថា គ្មានករណីឆ្លងវីរុសកូរ៉ូណាថ្មីបន្ថែមទៀត ត្រូវបានរកឃើញនោះឡើយនៅក្នុងចំណោមមនុស្សទាំងឡាយដែលមានទំនាក់ទំនងជាមួយបុរសចិនរូបនោះ។
លោក លី សូវ៉ាន់ បានឱ្យដឹងថា ក្រសួងបានផ្ដល់ការបណ្ដុះបណ្ដាលទៅដល់មន្ត្រីសុខាភិបាលអំពីវិធីតាមដានមនុស្សទាំងឡាយដែលត្រូវបានសង្ស័យថា មានអាការៈ ឬសញ្ញានៃការឆ្លងវីរុសកូរ៉ូណាថ្មីនេះ និងទទួលព័ត៌មានតាមរយៈប្រព័ន្ធទូរសព្ទទាន់ហេតុការណ៍។
លោក លី សូវ៉ាន់ ប្រាប់ថា៖ «ហើយដោយឡែកទាក់ទងទៅនឹងវីធីសាស្ត្រ ការពិត យើងបានបណ្ដុះបណ្ដាលមន្ត្រីជំនាញរបស់យើងនូវវិធាន របៀបអង្កេតស្រាវជ្រាវ តាមរុករកអ្នកប៉ះពាល់យ៉ាងម៉េច ត្រូវធ្វើយ៉ាងម៉េចក្នុងការរុករក ហើយក៏យើងមានប្រព័ន្ធដ៏ខ្លាំងមួយទៀត គឺលេខ ១១៥ ដែលបងប្អូនមួយចំនួនគាត់យើងឮយើងប្រកាសហ្នឹង គាត់រាយការណ៍ប្រាប់យើងតែម្ដង»។
វីរុសកូរ៉ូណាថ្មី បានផ្ទុះឡើងលើកដំបូងកាលពីចុងខែធ្នូឆ្នាំមុន នៅទីក្រុងអ៊ូហាន ខេត្តហ៊ឺប៉ី ប្រទេសចិន ហើយវាបានឆ្លងរីករាលដាលទៅដល់ប្រទេសចំនួន ២៣ផ្សេងទៀតក្រៅពីចិន។
អង្គការសុខភាពពិភពលោក (WHO) បានបញ្ជាក់ក្នុងរបាយការណ៍របស់ខ្លួនថា មនុស្ស ៣០៤នាក់ហើយ បានស្លាប់ដោយសារតែការឆ្លងវីរុសនេះគិតត្រឹមថ្ងៃម្សិលមិញ ខណៈការឆ្លងវីរុសនេះ បានកើនឡើងជិត ១៥,០០០ករណីហើយ។
ទីភ្នាក់ងារសារព័ត៌មាន AFP ដែលបានដកស្រង់តួលេខរបស់គណៈកម្មការសុខភាពជាតិរបស់ប្រទេសចិន បានរាយការណ៍ថា ចំនួនអ្នកស្លាប់ដោយសារការឆ្លងវីរុសកូរ៉ូណាថ្មីនេះ បានកើនឡើងដល់ចំនួន ៣៦១នាក់ហើយមកដល់ព្រឹកថ្ងៃទី០៣ ខែកុម្ភៈនេះ ហើយចំនួនឆ្លងវីរុសនេះ បានកើនឡើងដល់ ១៧,២០០ករណីនៅទូទាំងប្រទេសចិន៕