អតីតបុគ្គលិកវិទ្យុអាស៊ីសេរីដែលត្រូវបានចោទប្រកាន់ពីបទ«ចារកម្ម»នោះ បានអះអាងថា ពួកគេបាត់បង់សិទ្ធិសេរីភាពហើយ និងទទួលរងនូវភាពអយុត្តិធម៌ថែមទៀត ក្រោយពីតុលាការមិនព្រមប្រគល់ឯកសារសម្គាល់ខ្លួនទៅដល់ពួកគេវិញនោះ។
លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ត្រូវបានសមត្ថកិច្ចចាប់ខ្លួនក្រោមការចោទប្រកាន់ថា បានធ្វើចារម្មបម្រើឱ្យរដ្ឋបរទេសដែលធ្វើឱ្យអន្តរាយដល់កិច្ចការការពារជាតិ ហើយអ្នកទាំងពីររូប ត្រូវបានបញ្ជូនទៅដាក់ឃុំបណ្ដោះអាសន្នក្នុងពន្ធនាគារព្រៃសចាប់តាំងពីចុងឆ្នាំ២០១៧កន្លងមក មុននឹងពួកគេទាំងពីរត្រូវបានដោះលែងឱ្យស្ថិតនៅក្រៅឃុំបណ្ដោះអាសន្នវិញនៅក្នុងខែសីហា ឆ្នាំ២០១៨។
បើទោះបីពួកគេត្រូវបានដោះលែងឱ្យនៅក្រៅឃុំបណ្ដោះអាសន្នក៏ដោយ ប៉ុន្តែ លិខិតឆ្លងដែន និងអត្តសញ្ញាណប័ណ្ណរបស់ពួកគេត្រូវបានសមត្ថកិច្ចដកហូតទុករហូតមកដល់សព្វថ្ងៃនេះ។
មេធាវីរបស់អតីតអ្នកសារព័ត៌មានវិទ្យុអាស៊ីសេរីទាំងពីររូបនេះ បានដាក់សំណើទៅសាលាដំបូងរាជធានីភ្នំពេញកាលពីថ្ងៃទី១៤ ខែមករាកន្លងមកនេះ ដោយបានស្នើទាមទារឱ្យប្រគល់ឱ្យមកវិញនូវអត្តសញ្ញាណប័ណ្ណ និងលិខិតឆ្លងដែនរបស់កូនក្ដីលោកវិញ។
ប៉ុន្តែ ក្នុងដីការបស់ខ្លួនសម្រេចកាលពីថ្ងៃទី២៨ ខែមករាកន្លងមកដែលវីអូឌីទើបទទួលបាននៅថ្ងៃនេះ សាលាដំបូងរាជធានីភ្នំពេញ បានសម្រេចបដិសេធសំណើរបស់អតីតបុគ្គលិកវិទ្យុអាស៊ីពីររូប។
ក្នុងដីកាសម្រេចនោះ ចៅក្រមស៊ើបសួរសាលាដំបូងរាជធានីភ្នំពេញ លោក ពេជ្រ វិជ្ជាធរ បានចាត់ទុកឯកសាររដ្ឋបាលរបស់អតីតអ្នកសារព័ត៌មានវិទ្យុអាស៊ីសេរីទាំងពីររូបនេះថា «នៅតែមានភាពចាំបាច់ក្នុងដំណាក់កាលស៊ើបសួរ»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ប្រាប់ថា លោកសុំពេលឆែកជាមួយចៅក្រមស៊ើបសួរសិនមុននឹងឆ្លើយតបអំពីដីកាសម្រេចនេះ ប៉ុន្តែ លោកពុំបានឆ្លើយតបមកវិញឡើយរហូតមកដល់ម៉ោង ៦ល្ងាចថ្ងៃនេះ។
លោក យាង សុធារិន្ទ ដែលប្រាប់ថាទើបទទួលបានដីកាសម្រេចនៅថ្ងៃនេះ បានឱ្យដឹងថា លោកស្នើសុំលិខិតឆ្លងដែនពីតុលាការមកវិញ ដើម្បីលោកអាចធ្វើដំណើរទៅសួរសុខទុក្ខឪពុកម្ដាយ និងសាច់ញាតិរបស់លោកនៅឯស្រុកកំណើតស្ថិតនៅទឹកដីកម្ពុជាក្រោម ឬវៀតណាមភាគខាងត្បូងសព្វថ្ងៃនេះ។
លោក សុធារិន ដែលបម្រើការជាអ្នកសារព័ត៌មានសេរីឱ្យសារព័ត៌មានវីអូឌីនាពេលសព្វថ្ងៃនេះ បន្ថែមថា លោកក៏ត្រូវការចេញទៅស្វែងរកព្យាបាលភ្នែកដ៏ល្អប្រសើរ និងឱកាសពង្រឹងសមត្ថភាពមួយចំនួនទៀតនៅក្រៅប្រទេសផងដែរ។
លោក យាង សុធារិន្ទ ប្រាប់ថា៖ «នៅពេលការសម្រេចមិនផ្ដល់ឱ្យពួកយើងខ្ញុំអ៊ីចឹង វាធ្វើឱ្យរឹតត្បិតសេរីភាពពួកខ្ញុំផង និងបង្កការលំបាកផ្សេងៗដល់យើងខ្ញុំផង»។
លោក អ៊ួន ឈិន បានប្រាប់ថា លោកត្រូវការអត្តសញ្ញាណប័ណ្ណរបស់លោកវិញ ដើម្បីយកទៅប្រើប្រាស់សម្រាប់បំពេញឯកសាររដ្ឋបាលដទៃទៀត ដូចជា ការបើកគណនីធនាគារ និងការស្នើសុំសេវាដែលផ្ដល់ដោយបេឡាជាតិរបបសន្តិសុខសង្គម។
លោក អ៊ួន ឈិន ប្រាប់ថា៖ «ការណ៍ដែលខ្វះឯកសារទាំងនេះ បង្កផលវិបាកដល់ខ្ញុំជាខ្លាំង។ ជាក់ស្ដែង ខ្ញុំធ្វើស្លាកលេខម៉ូតូ តែមិនទាន់បានស្លាកលេខ ខ្ញុំត្រូវការអត្តសញ្ញាណប័ណ្ណ ដើម្បីបើកស្លាកលេខម៉ូតូ ហើយយកម៉ូតូនោះទៅលក់ដោះស្រាយជីវភាព តែខ្ញុំមិនមានអត្តសញ្ញាណប័ណ្ណ ខ្ញុំអត់អាចយកស្លាកលេខម៉ូតូនោះមិនបានទេ។ វាអយុត្តិធម៌ណាស់ចំពោះខ្ញុំក្នុងការសម្រេចនេះ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានចាត់ទុកសេចក្ដីសម្រេចរបស់សាលាដំបូងរាជធានីភ្នំពេញថា ជាការបង្ហាញនូវទម្រង់មួយនៃការរើសអើងទៅលើអ្នកសារព័ត៌មានទាំងពីររូបនេះ ដែលធ្លាប់បម្រើការឱ្យស្ថាប័នវិទ្យុអាស៊ីសេររបស់សហរដ្ឋអាមេរិក។
សកម្មជនការពារសិទ្ធិមនុស្សរូបនេះ បានជំរុញទៅតុលាការឱ្យពិចារណាឡើងវិញក្នុងការប្រគល់ឯកសាររដ្ឋបាលទាំងពីរប្រភេទនេះ ទៅដល់ពួកគេ ដោយលោកថា អតីតបុគ្គលិកវិទ្យុអាស៊ីសេរីទាំងពីររូបនេះ តែងតែផ្ដល់កិច្ចសហការគ្រប់គ្រាន់ឆ្លើយតបទៅនឹងសមត្ថកិច្ចគ្រប់លំដាប់ថ្នាក់រួចមកហើយ។
លោក ស៊ឹង សែនករុណា ប្រាប់ថា៖ «ហើយការអនុវត្តស្តង់ដារហ្នឹង អត់ត្រូវទៀត ព្រោះរឿងមួយចំនួន យើងឃើញហើយ រឿងឧក្រិដ្ឋផង នៅគេផ្ដល់តម្លៃនៅពេលបញ្ចប់ ឬបិទការស៊ើបសួរ ឬក៏ចេញដីកាដំណោះស្រាយហ្នឹង គេមិនរឹតត្បិតទៅលើភស្តុតាងទាំងអស់ហ្នឹង ហើយឯកសារទាំងអស់ហ្នឹង វាអត់ត្រូវមានការរឹតត្បិតទៅលើរឿងទាំងអស់ហ្នឹងទេ»៕