លោកនាយករដ្ឋមន្ត្រី ហ៊ុន សែន ថ្លែងថា សម្ពាធពីអន្តរជាតិកំពុងបង្ខំកម្ពុជាឱ្យជ្រើសរើសមិត្ត ឬសត្រូវក្នុងទំនាក់ទំនងអន្តរជាតិរបស់ខ្លួន ខណៈបញ្ជាក់ជំហរថា កម្ពុជានឹងមិនយកអធិបតេយ្យដើម្បីដោះដូរនឹងជំនួយពីប្រទេសណាមួយនោះឡើយ ។
ថ្លែងក្នុងពិធីបិទសន្និបាតក្រសួងការបរទេសនៅព្រឹកនេះ លោក ហ៊ុន សែន បានថ្លែងថា សហគមន៍អន្តរជាតិ មិនគួរបង្កើតកំហុសម្ដងទៀតមកលើកម្ពុជានោះទេ ខណៈលោកថា សម្ពាធអន្តរជាតិទាំងប៉ុន្មាន កំពុងបង្ខំកម្ពុជាជ្រើសរើសមិត្ត ឬសត្រូវក្នុងទំនាក់ទំនងការបរទេសរបស់ខ្លួន។
លោកនាយករដ្ឋមន្ត្រី៖ «ជាការពិតការធ្វើមិត្តជាមួយគ្រប់គ្នាងាយនិយាយជាងធ្វើច្រើនណាស់! ជាពិសេសចំពោះប្រទេសតូចដូចកម្ពុជា ដែលសម្ពាធពីខាងក្រៅតែងបង្ខំឱ្យយើងជ្រើសរើសមិត្ត ឬឱ្យយើងធ្វើជាមិត្តជាមួយប្រទេសនេះ និងយកប្រទេសផ្សេងធ្វើជាសត្រូវ។ ក៏ប៉ុន្ដែ ទោះធ្វើជាមិត្តជាមួយអ្នកណាក៏ដោយ ក៏មិនមែនមានន័យថា កម្ពុជាបោះបង់ឯករាជ្យអធិបតេយ្យរបស់ខ្លួននោះដែរ។ ក្នុងឋានៈជានាយករដ្ឋមន្ត្រី ខ្ញុំមិនដែលធ្វើសេចក្តីសម្រេចណាមួយដើម្បីតម្រូវចិត្តប្រទេសណាមួយនោះទេ ខ្ញុំមិនធ្វើអ្វីដែលធ្វើឱ្យខូចប្រយោជន៍ជាតិ និងប្រជាពលរដ្ឋនោះឡើយ»។
ក្រោយចាប់ខ្លួនលោក កឹម សុខា រួចរំលាយបក្សប្រឆាំងនៅឆ្នាំ២០១៧ និងការបោះឆ្នោតដោយចម្រូងចម្រាសនៅឆ្នាំ២០១៨ សហគមន៍អន្តរជាតិដែលមានសហរដ្ឋអាមេរិក និងសហភាពអឺរ៉ុប បានថ្កោលទោសជាមួយនឹងការព្រមានដកប្រព័ន្ធអនុគ្រោះពន្ធពីកម្ពុជានោះ រដ្ឋាភិបាលលោក ហ៊ុន សែន បានចាត់ទុកប្រតិកម្មរបស់លោកសេរីនេះជាការជ្រៀតជ្រែកកិច្ចការផ្ទៃក្នុងប្រទេស។
សាស្ត្រាចារ្យផ្នែកសិក្សាពីអាស៊ាន នៅសកលវិទ្យាល័យ Naresuan ប្រទេសថៃ លោក Paul Chambers បានឱ្យ VOD ដឹងតាមសារអេឡិចត្រូនិចអ៊ីម៉ែលថា ចាប់តាំងពីការបោះឆ្នោតឆ្នាំ២០១៨ ទំនាក់ទំនងកម្ពុជា ចិន កាន់តែជិតស្និទ្ធ ខណៈទំនាក់ទំនងជាមួយអឺរ៉ុប និងអាមេរិក ហាក់ឃ្លាតឆ្ងាយ។ ទោះជាយ៉ាងណា សម្រាប់ អាមេរិកនៅតែព្យាយាមរក្សាទំនាក់ទំនងជាមួយរដ្ឋាភិបាលកម្ពុជា ដើម្បីរក្សាភូមិសាស្ត្រនយោបាយរបស់ខ្លួននៅកម្ពុជា។
លោកសរសេរថា៖ «បញ្ហាប្រឈមរបស់រដ្ឋាភិបាលកម្ពុជានោះគឺ ត្រូវរក្សាតុល្យភាពអាមេរិក និងចិនយ៉ាងណា ក្នុងប្រទេសខ្លួនដើម្បីបញ្ចៀសការអន់ចិត្តពីប្រទេសទាំងពីរនោះ។ […] តែប្រសិនកម្ពុជាងាកទៅរកមហាអំណាចណាមួយក្នុងចំណោមទាំងពីរនេះ នោះកម្ពុជាអាចរំពឹងនាថ្ងៃអនាគតទៅលើការឧបត្ថម្ភពីប្រទេសនោះបាន និងបំផ្លាញឥទ្ធិពលម្ខាងទៀតបាន»។
សាស្ត្រាចារ្យផ្នែកការទូត និងកិច្ចការពិភពលោកនៅសាកលវិទ្យាល័យ Occidental College ទីក្រុង Los Angeles លោក អៀ សុផល លើកឡើងថា ក្រោយពីបាត់បក្សប្រឆាំងក្នុងប្រទេស បានធ្វើឱ្យតុល្យភាពនយោបាយការបរទេសកម្ពុជាកាន់តែផ្អៀងទៅចិនកាន់តែខ្លាំង។ លោកបន្ថែមថា ការលំអៀងទៅចិនរបស់រដ្ឋាភិបាលកម្ពុជា មិនមែនជារឿងល្អនោះទេសម្រាប់ប្រជាជន និងប្រទេសកម្ពុជានោះ។
លោកសរសេរថា៖ «ដោយបានជ្រើសរើសចិន កម្ពុជាចាប់ផ្ដើមដើរដោយគ្មានប្រជាធិបតេយ្យ គ្មានការគោរពសិទ្ធិ និងសេរីភាពមនុស្ស។ វាជាការខាតបង់របស់ប្រជាជន។ សហរដ្ឋអាមេរិក និងសហភាពអឺរ៉ុបអាចជួយរក្សាតុល្យភាពកម្ពុជាបាន តែពួកគេមិនអាចធ្វើបានទេ នៅពេលដែលរដ្ឋាភិបាលភ្នំពេញចង់រៀបការជាមួយចិនហើយនោះ។ និយាយដោយត្រង់ទៅ វាជាការបាត់បង់របស់ប្រជាជនកម្ពុជា ដែលធ្លាប់បាត់បង់យ៉ាងច្រើនម្ដងហើយទៅឱ្យប្រទេសចិនកាលពីអតីតកាល ហើយវានឹងបាត់បង់ជាថ្មីម្តងទៀត»។
ក្រោយផ្ទុះរីវុសកូរ៉ូណាដែលសម្លាប់មនុស្សជាច្រើនរយនាក់នៅប្រទេសចិន ហើយរដ្ឋាភិបាលបរទេសមួយចំនួនបានបិទជើងយន្តហោះពីចិន និងបញ្ជូនពលរដ្ឋខ្លួនចេញដោយបារម្ភពីសុវត្ថិភាពពលរដ្ឋនោះ ប៉ុន្តែ លោកនាយករដ្ឋមន្ត្រី ហ៊ុន សែន កាលពីម្សិលមិញ បញ្ជាក់ថា កម្ពុជានឹងធ្វើបែបនេះនោះទេ ដោយថា ការធ្វើបែបនេះគឺហាក់បីដូចជាសម្លាប់សេដ្ឋកិច្ច និងទំនាក់ទំនងល្អមហាអំណាចមួយនេះ។
លោកថា៖ «ពេលគេសុខ យើងទៅរួមសុខជាមួយគេ ដល់គេមានទុក្ខ យើងបោះបង់ចោលគេ តើពាក្យថារួមសុខរួមទុក្ខនៅកន្លែងណា? […] អត់មានតម្រូវការនៃការជម្លៀសនិស្សិតខ្មែរ អ្នកការទូតខ្មែរ កុងស៊ុលខ្មែរ នៅតាមបណ្ដាទីកន្លែងនានាមកកម្ពុជាទេ យើងទុកនៅទីនោះដែលជាការនៅរួមសុខទុក្ខជាមួយគ្នាក្នុងការដោះស្រាយបញ្ហានេះ»។
ក្រោយរងសម្ពាធពីសហភាពអឺរ៉ុបពីការដកប្រព័ន្ធអនុគ្រោះពន្ធនោះ ហាក់បានរុញរដ្ឋាភិបាលកម្ពុជាឱ្យកាន់តែខិតទៅប្រទេសចិន ទាំងជំនួយ និងទំនាក់ទំនង។ យោងតាមរបាយការណ៍រដ្ឋាភិបាល គិតត្រឹមឆមាសទី១ ឆ្នាំ២០១៩ កម្ពុជាបានចុះហត្ថលេខាខ្ចីលុយបរទេសមានទំហំប្រមាណ ៧ ៦៣២លានដុល្លារ ក្នុងនោះជិត៤០ភាគរយជាកម្ចីរបស់ចិនដែលមានតម្លៃប្រមាណ ៤ ៧១១លានដុល្លារ ក្រៅពីនេះ ចិនក៏ឈរលេខមួយដែលជាប្រទេសដាក់ទុនវិនិយោគផ្ទាល់មកកម្ពុជាផងដែរ ដែលមានតម្លៃប្រមាណ ៩ពាន់៤រយលានដុល្លារ៕
