មន្ត្រីសាលាខេត្តព្រៃវែងបានឲ្យដឹងថា អាជ្ញាធរបានបិទផ្អាកដំណើរការចំណតយកលុយឡានមួយកន្លែងជាបណ្តោះអាសន្ន នៅក្នុងខេត្តនេះ ក្រោយមានជម្លោះហិង្សារវាងក្រុមឈ្មួញរាប់រយនាក់ ជាមួយបុគ្គលិកដែលចាំទារលុយកាលពីម្សិលមិញ។
កាលពីម្សិលមិញ អាជីវករដឹកស្រូវ១៦០នាក់ បានដុតកង់ឡាន និងវាយកម្ទេចបង់អង្គុយលេងមួយចំនួន នៅ ចំណតយកលុយឡានស្ថិតនៅភូមិប្រស់ស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង ប៉ុន្តែមិនបណ្តាលឲ្យមានអ្នករងរបួសនោះទេ។
នាយករដ្ឋបាលសាលាខេត្តព្រៃវែង លោក ឈាង សុវណ្ណារ៉ា មានប្រសាសន៍ថា ដើមចមដែលនាំឲ្យក្រុមអាជីវករដឹកស្រូវទៅវាយកម្ទេចសម្ភារៈចំណតយកលុយឡាននោះ ដោយសារម្ចាស់ចំណត បានទាលុយពីអាជីវករឡានមួយគ្រឿង១៥០០០រៀល ពោលលើសពីសព្វដង៥០០០រៀលក្នុងឡានមួយគ្រឿង។ លោកបញ្ជាក់ថា ការបិទនេះ រងចាំឱ្យភាគីពាក់ព័ន្ធរកដំណោះស្រាយដោយសន្តិវិធីសិន មុនបើកដំណើរការ។
លោកមានប្រសាសន៍ថា៖ «យើងបិទបេនសិនហើយ យើងអត់ទាន់ឲ្យដំណើរការរកស៊ីទេ…បិទបណ្តោះអាសន្នរងចាំមានចចារប្រជុំដោះស្រាយថាតើយើងអាចដោះយ៉ាងម៉េចនៅពេលថ្ងៃក្រោយ»។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន្ត មានប្រសាសន៍ថា បើម្ចាស់ចំណតយកថ្លៃលើសសៀវភៅបន្ទុករបស់រដ្ឋកំណត់ និងប្រឈមការបិទអាជីវកម្មរបស់ខ្លួន ដើម្បីទុកឲ្យអ្នកផ្សេងដេញថ្លៃបន្ត។
លោកមានប្រសាសន៍ថា៖ «បើសិនជាគាត់យកលើសយើងមានសិទ្ធិដកហូតយកមកវិញ តាមច្បាប់ បើសិនជារកឃើញថាមានបញ្ហាចឹងមែន មិនមែនចេះតែដកហូតគ្រប់កន្លែងទេ…ទាល់តែមានរបាយការណ៍ត្រឹមត្រូវ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ដើម្បីទប់ស្កាត់បញ្ហាប្រឈមបាន លុះត្រាតែអ្នកគ្រប់គ្រងចំណតបិទតារាងតម្លៃរបស់ក្រសួងសេដ្ឋកិច្ច និងហិរញ្ញវត្ថុ ឲ្យប្រជាពឡរដ្ឋបានដឹងរឿងនេះជាសាធារណៈ។
លោកមានប្រសាសន៍ថា៖ «ជាគោលការណ៍តារាងតម្លៃតែងតែបិទក្តាខៀន ព័ត៌មាន ឬក៏បញ្ឈទាំងឡាយនៅតាមចំណតហ្នឹងហើយ ហើយអ្នកអនុវត្តកាតព្វកិច្ច ហើយអ្នកដែលទទួលបន្ទុកក្នុងការអនុវត្តច្បាប់ គឺត្រូវឈរលើតារាងតម្លៃសេវាហ្នឹងជាគោល បើមានអ្នកណាទារលើសជាការបំពានច្បាប់រដ្ឋបាល»។
ម្ចាស់ចំណតរថយន្ត នៅភូមិប្រស់ស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង បានលើកឡើងថា ចាប់ពីឆ្នាំ២០០៨ រហូតមកដល់បច្ចុប្បន្ននេះ ចំណតរបស់គាត់មានអាជ្ញាប័ណ្ណពីក្រសួងសេដ្ឋកិច្ច និងហរិញវត្ថុ និងខេត្តត្រឹមត្រូវ។
ម្ចាស់ចំណតបញ្ជាក់ថា សៀវភៅបន្ទុករបស់ក្រសួងសេដ្ឋកិច្ច និងហិរញ្ញវត្ថុ បានកំណត់ឲ្យម្ចាស់ចំណតយកតម្លៃ១០០០០រៀល ទៅ២០០០០រៀល ក្នុងរថយន្តមួយគ្រឿងដែលផ្ទុកចំណុះ ១០តោន ទៅ២៥តោន។ ប៉ុន្តែការអនុវត្តរាល់ថ្ងៃនេះ ម្ចាស់ចំណតបញ្ជាក់ថា គាត់យកមិនលើសពី២០០០០រៀលនោះទេ៕
