បណ្ដឹងទាស់របស់អតីតបុគ្គលិកវិទ្យុអាស៊ីសេរីពីររូប ត្រូវបានតុលាការជាន់ខ្ពស់សម្រេចច្រានចោលនៅថ្ងៃនេះ ដូចទៅនឹងសេចក្ដីសម្រេចរបស់តុលាការជាន់ទាបផងដែរ។
អតីតអ្នកសារព័ត៌មានវិទ្យុអាស៊ីសេរី លោក យាង សុធារិន្ទ ហៅ យាង សុជាមេត្តា និងលោក អ៊ួន ឈិន បានប្ដឹងទៅសាលាឧទ្ធរណ៍ជំទាស់នឹងសេចក្ដីសម្រេចរបស់សាលាដំបូងរាជធានីភ្នំពេញកាលពីថ្ងៃទី៣ ខែតុលា ដែលបានបញ្ជាឱ្យស៊ើបអង្កេតឡើងវិញនូវសំណុំរឿងរបស់ពួកគេ ដែលត្រូវបានចោទពីបទចារកម្មបម្រើឱ្យរដ្ឋបរទេសនោះ។
បណ្ដឹងជំទាស់របស់ពួកគេ ត្រូវបានសាលាឧទ្ធរណ៍បើកសវនាការកាលពីថ្ងៃទី២០ ខែមករា ប៉ុន្តែ សាលក្រមនៃបណ្ដឹងជំទាស់នេះ ត្រូវបានលើកពេលមកប្រកាសនៅថ្ងៃទី២៨ ខែមករានេះ។
ក្រោយចេញពីស្ដាប់ការប្រកាសសាលក្រមនៅព្រឹកថ្ងៃនេះ លោក យាង សុធារិន្ទ បានឱ្យដឹងថា សាលាឧទ្ធរណ៍បានសម្រេចច្រានចោលបណ្ដឹងជំទាស់របស់លោក ដោយចាត់ទុកសាលក្រមចាត់របៀបរបស់សាលាដំបូងរាជធានីភ្នំពេញកាលពីខែតុលាឆ្នាំមុនថាជាបានការ។
លោក សុធារិន្ទ បានឱ្យដឹងទៀតថា សេចក្ដីសម្រេចនេះ ត្រូវបានប្រកាសដោយប្រធានអង្គជំនុំជម្រះសាលាឧទ្ធរណ៍ លោក ប្លង់ សំណាង នៅព្រឹកថ្ងៃនេះ នៅចំពោះមុខរូបលោក និងលោក អ៊ួន ឈិន ផ្ទាល់តែម្ដង។
លោក សុធារិន្ទ បានប្រាប់ថា រូបលោក និងលោក អ៊ួន ឈិន នឹងពិភាក្សាជាមួយក្រុមមេធាវីរបស់ពួកលោក ដើម្បីប្ដឹងសារទុក្ខទៅកាន់តុលាការកំពូលនៅក្នុងរយៈពេល ១ខែក្រោយពីសេចក្ដីសម្រេចរបស់សាលាឧទ្ធរណ៍នៅថ្ងៃនេះ។
អតីតអ្នកសារព័ត៌មានវិទ្យុអាស៊ីសេរីទាំងពីររូបនេះ ត្រូវបានសមត្ថកិច្ចចាប់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧ និងត្រូវបានបញ្ជូនទៅឃុំខ្លួនបណ្ដោះអាសន្ន ក្រោមការចោទប្រកាន់ពីបទ «ចារកម្មបម្រើឱ្យរដ្ឋបរទេស»។
ការចាប់ខ្លួនអតីតអ្នកសារព័ត៌មានវិទ្យុអាស៊ីសេរីទាំងពីររូបនេះ បានកើតឡើងជាង ២ខែក្រោយពីវិទ្យុអាស៊ីសេរីបានបង្ខំចិត្តបិទការិយាល័យរបស់ខ្លួននៅរាជធានីភ្នំពេញ បន្ទាប់ពីមានការបង្ក្រាបកាន់តែខ្លាំងពីរដ្ឋាភិបាលទៅលើប្រព័ន្ធផ្សព្វផ្សាយឯករាជ្យនៅក្នុងឆ្នាំ២០១៧នោះ។
អតីតអ្នកសារព័ត៌មានទាំងពីររូបនេះ ត្រូវបានតុលាការសម្រេចដោះលែងឱ្យស្ថិតនៅក្រៅឃុំបណ្ដោះអាសន្នចាប់តាំងពីថ្ងៃទី២១ ខែសីហា ឆ្នាំ២០១៨ ឬរយៈពេល ៩ខែ ៧ថ្ងៃក្រោយការចាប់ខ្លួន៕
