មន្ត្រីជាន់ខ្ពស់អគ្គស្នងការនគបាលជាតិ អះអាងថាមិនទាន់រកឃើញក្រុមជនដៃដល់វាយលើអតីតមន្ត្រី និងសកម្មជនគណបក្សសង្គ្រោះជាតិកន្លងមកនៅឡើយទេ ដោយសារ នៅខ្វះព័ត៌មានក្នុងការកំណត់មុខសញ្ញា។
បើតាមអតីតមន្រ្តីជាន់ខ្ពស់គណបក្សសង្គ្រោះជាតិ លោក អ៊ូ ច័ន្ទរ័ត្ន បានឱ្យដឹងថា ការប្រើអំពើហិង្សាទៅលើមន្ត្រី និងសកម្មជនអតីតបក្សប្រឆាំង កើតមានឡើងចំនួន១៤ករណី ហើយអំពើហិង្សាដែលកើតឡើងភាគច្រើននៅរាជធានីភ្នំពេញ។
អ្នកនាំពាក្យអគ្គស្នងការនគបាលជាតិ លោក ឆាយ គឹមខឿន ប្រាប់វីអូឌីនៅថ្ងៃនេះថា បច្ចុប្បន្ន សមត្ថកិច្ចជំនាញកំពុងធ្វើការស៊ើបអង្កេតករណីនេះ។ ទោះយ៉ាងណាក៏ដោយ លោកថាសមត្ថកិច្ចមិនទាន់ចាប់ខ្លួនពួកគេបាននៅឡើយ ព្រោះនៅកង្វះខាតព័ត៌មាន។
លោកមានប្រសាសន៍បន្ថែមថា៖«ទាល់តែធ្វើប៉ូលីសបានដឹង ហើយបើមានការពន្យល់គឺត្រូវការពេលពន្យល់ ១ ខែ អំពើរបៀបស្រាវជ្រាវរបស់ប៉ូលីស។ អានេះយើងរកមិនទាន់ឃើញ ដោយសារ មានមូលហេតុផលច្រើន ដែលយើងកំពុងខិតខំសិក្សាស្រាវជ្រាវ ។ បើសួរពីហេតុផលអី គឺមិនមានហេតុផល [ស្មុកស្មាញ]អីទេ គ្រាន់តែខ្វះព័ត៌មាន អត្តសញ្ញាអីជាដើម ហើយខ្វះព័ត៌មានហ្នឹងសំខាន់ណាស់» ។
អតីតប្រធានក្រុមអង្គរក្ស លោក សម រង្ស៊ី លោក ពូក ចន្ដា ត្រូវជនមិនស្គាល់មុខពីរនាក់ជិះម៉ូតូយកដំបងដែក លបវាយពីក្រោយ កាលពីថ្ងៃទី២២ ខែកញ្ញាឆ្នាំ២០១៩ នៅជិតទីស្នាក់ការអតីតបក្សសង្គ្រោះជាតិ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ បីថ្ងៃក្រោយមក អតីតចៅសង្កាត់កោះដាច់មកពីគណបក្សសង្គ្រោះជាតិ លោក ស៊ិន បូណា ក៏ត្រូវបានជនមិនស្គាល់មុខចំនួនពីរនាក់តាមវាយ ដោយធាក់ម៉ូតូផ្តួល រួចយកដំបងដែកមកវាយសំពងរហូតរងរបួសបាក់ដៃខាងឆ្វេងម្ខាង កាលពីថ្ងៃទី២៥ ស្ថិតក្នុងខែកញ្ញាដូចគ្នា។
ដោយឡែក នៅពីថ្ងៃទី២០ ខែមករា ឆ្នាំ ២០២០ អតីតសមាជិកបេក្ខភាពក្រុមប្រឹក្សាឃុំ-សង្កាត់ គណបក្សសង្គ្រោះជាតិ លោក ខៀវ ឌីន ក៏ត្រូវបានជនអនាមិកវាយពីក្រោយ ក្នុងពេលដែលលោកកំពុងធ្វើដំណើរទៅយកចៅនៅសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ភរិយារបស់លោក ខៀវ ឌីន គឺអ្នកស្រី ពេជ្រ សុខណា លើកឡើងថា ចាប់តាំងពីជនអនាមិកវាយត្រូវក្បាលស្វាមីគាត់មក អ្នកស្រីថា ស្វាមីគាត់មានអាការៈស្រវាំងភ្នែក និងវិលមុខ ដោយមិនអាចធ្វើការងារអ្វីបានទៀតទេ ។ អ្នកស្រីបន្តថា រហូតមកដល់ថ្ងៃនេះ គាត់មិនទាន់ទទួលបានព័ត៌មានអ្វីពីសមត្ថកិច្ចនៅឡើយ។
អ្នកស្រីពេជ្រ សុខណា បន្តថា ការប្រើអំពើហិង្សាមកលើស្វាមីគាត់ សមត្ថកិច្ចមិនពិបាករកជនល្មើសនោះទេ ដោយសារ មានរូបភាព ចែកចាយ បង្ហាញឱ្យឃើញជនដៃដល់ទាំងពីរនាក់ជិះម៉ូតូនៅពីក្រោយ ហើយបានលើកវត្ថុរឹងប្រវែងជាង ១ ម៉ែត្រ វាយទៅលើស្វាមីគាត់។
អ្នកស្រី៖«ខ្ញុំមិនមានជំនឿបន្តិច [លើសមត្ថកិច្ច]ទេ ព្រោះពីមុនៗមក វាអត់បានរកឃើញអីទាំងអស់»។
អតីតមន្រ្តីជាន់ខ្ពស់គណបក្សសង្គ្រោះជាតិ លោក អ៊ូ ច័ន្ទរ័ត្ន មើលឃើញថា ការប្រើអំពើហិង្សាមកលើអតីតមន្ត្រី និងសកម្មជនគណបក្សសង្គ្រោះជាតិកន្លងមក សមត្ថកិច្ចមិនដែលចាប់ខ្លួន ជនល្មើសបាននោះទេ។
លោកបន្តថា ការដែលសមត្ថកិច្ចមិនអាចចាប់ខ្លួនជនដៃដល់ដែលប្រើអំពើហិង្សាលើអតីតមន្ត្រីនិងសកម្មជនប្រឆាំងបាននេះ លោកថា នឹងធ្វើឱ្យប្រជាពលរដ្ឋមានមន្ទិលសង្ស័យទៅសមត្ថកិច្ច។
លោកថា៖«សមត្ថកិច្ចហាក់ដូចជាមិនយកចិត្តទុកដាក់ ឬក៏មានតែបណ្ដែតបណ្ដោយឱ្យបន្តធ្វើទុកបុកម្នេញលើពួកគាត់។នេះជាការសោកស្ដាយ ហើយនេះប៉ះពាល់មុខរដ្ឋាភិបាលផង។ ករណីនេះ មិនមែនមានតែសង្គមខ្មែរ ឃ្លាំមើលរឿងហ្នឹងទេ សហគមន៍អន្តរជាតិក៏គេឃ្លាំមើលដែរ។ សង្គមខ្មែរមិនមែនសម្រាប់បក្សណាមួយទេ សម្រាប់ពលរដ្ឋខ្មែរទាំងអស់គ្នាហើយការបណ្ដោយឱ្យធ្វើទុកបុកម្នេញបែបបហ្នឹង វាអាក្រក់ខ្លាំងណាស់»។
នាយករងអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ប្រសិនបើសមត្ថកិច្ច នៅតែឆ្លើយបែបនេះ វាបង្ហាញថាសមត្ថកិច្ចអសមត្ថភាពក្នុងការចាប់ខ្លួន ជនដៃដល់មកផ្ដន្ទាទោស។
លោកថា៖«បើសិនចម្លើយបែបនេះ វាបង្ហាញពីអសមត្ថភាពរបស់សមត្ថកិច្ចក្នុងការស៊ើបអង្កេត ទៅលើករណីបទល្មើសដែលកើតឡើង ។ អ៊ីចឹងបើសិនជាទង្វើ [ប្រើអំពើហិង្សា]នេះកើតឡើងច្រើនទៅ សង្គមយើងវាទៅយ៉ាងម៉េច ? វាមិនផ្ទុយពីគោលនយោបាយរបស់រដ្ឋាភិបាល ជាពិសេស សម្ដេចក្រឡាហោម គាត់បានលើកឡើងហើយថា អយុត្តិធម៌សង្គមនាំឱ្យបែកបាក់ជាតិ ហើយអយុត្តិធម៌សង្គមនេះ ក៏នាំឱ្យផលប៉ះពាល់ផ្សេងទៀតដែរ»៕