គណៈកម្មការថ្នាក់ជាតិ និងអាជ្ញាធរខេត្តបន្ទាយមានជ័យ នៅតែប្រកាន់ជំហរការពារលទ្ធផលខុសគ្នានៃការស្វែងរកឃើញមូលហេតុស្លាប់តំណាងសកម្មជនដីធ្លីនៅពេលឃុំឃាំង ដោយមួយក្រុមថា ស្លាប់ដោយសារការធ្វើទារុណកម្ម និងក្រុមមួយទៀតថា ស្លាប់ដោយសារការញៀនស្រា។
សេចក្ដីជូនដំណឹងកាលពីថ្ងៃទី១៩ ខែមករា របស់គណៈកម្មការចំពោះកិច្ច ក្រោយបញ្ចប់ការស៊ើបអង្កេតបានរកឃើញថា ការស្លាប់របស់លោក ទុយ ស្រស់ នោះកើតចេញពីការធ្វើទារុណកម្មដោយប្រាកដមែន។ ស្របពេលជាមួយគ្នានេះដែរ គណៈកម្មការថ្នាក់ជាតិប្រឆាំងការធ្វើទារុណកម្ម ចេញពីក្រសួងមហាផ្ទៃ ក៏បានអះអាងដូចគ្នាដែរ។
លោក តុប សុភី ប្រធានផ្នែកនីតិកម្ម និងជំនួយផ្នែកច្បាប់ របស់គណៈកម្មការថ្នាក់ជាតិប្រឆាំងការធ្វើទារុណកម្ម មានប្រសាសន៍ថា មានសាក្សីដ៏សំខាន់មួយក្រៅពីជនរងគ្រោះទាំងអស់ដែលអាចផ្ដល់សក្ខីកម្មបានថា កម្លាំងនៃទីបញ្ជាការកងរាជអាវុធហត្ថខេត្តបន្ទាយមានជ័យ ជាអ្នកដែលស្ថិតនៅពីក្រោយនៃការទារុណកម្មនេះ។
លោកបន្ថែមថា៖ «នៅក្នុងករណីហ្នឹង ក្រុមការងារយើងមានសាក្សីពិសេសមួយទៀត ក្រៅពីអ្នកទាំង៤នាក់ហ្នឹង»។
មន្ត្រីទទួលបន្ទុកធ្វើកោសលវិច័យនៃរដ្ឋបាលរបស់សាលាខេត្តបន្ទាយមានជ័យ នៅបន្តរក្សាជំហរជុំវិញការរកឃើញដែលថា ការស្លាប់នោះគឺផ្ដើមចេញពីលោក ទុយ ស្រស់ មានសុខភាពមិនល្អ ជាមនុស្សមានបញ្ហាស្មារតី និងញៀនស្រាដាច់មិនបាន។
ឆ្លើយតបរឿងនេះ លោក ឈុន ប៊ុនថា នាយកទីចាត់ការធ្វើកោសលវិច័យនៃរដ្ឋបាលខេត្តបន្ទាយមានជ័យ បានបដិសេធយ៉ាងខ្លីថា មិនអាចបកស្រាយបានទេ។ លោក ប៊ុនថា ជំរុញឱ្យប្រើប្រាស់ជាផ្លូវការដូចដែលសាលាខេត្តបានជូនដំណឹងរួចហើយ តាមរយៈសេចក្ដីប្រកាសព័ត៌មានរបស់ខ្លួន។
លោកបន្ថែមថា៖ «ខ្ញុំសូមអធ្យាស្រ័យ ខ្ញុំអត់អាចនិយាយរឿងហ្នឹងបានទេ។ មើលសេចក្ដីប្រកាសព័ត៌មានរបស់ខេត្តទៅ»។
ទាក់ទិនលទ្ធផលនៃការធ្វើកោសលវិច័យនេះ នៅតែមានការខ្វែងគំនិតគ្នានៅឡើយ រវាងរដ្ឋបាលខេត្តបន្ទាយមានជ័យ និងគណៈកម្មការដែលរដ្ឋាភិបាលបង្កើតឡើង ដើម្បីស៊ើបអង្កេតក្នុងរឿងក្តីព្រហ្មទណ្ឌនេះ។ ជំហររបស់សាលាខេត្តបន្ទាយមានជ័យ ទាំងក្នុងដំណាក់កាលនៃសេចក្ដីប្រកាសព័ត៌មាន ក្រោយកើតហេតុភ្លាមៗ និងលិខិតបំភ្លឺ១ផ្សេងទៀត របស់លោក អ៊ុំ រាត្រី ទៅលោក ស ខេង កាលពីថ្ងៃទី៣ ខែមករា នៅតែមិនដូរជំហរ។ ការការពាររបស់រដ្ឋបាលខេត្តទាំង២លើកនេះ ព្យាយាមប្រកាន់គោលការណ៍របស់ខ្លួនថា ការស្លាប់របស់លោក ទុយ ស្រស់ នេះពិតជាមិនមែនកើតឡើងដោយសារការធ្វើទារុណកម្មទេ។ តែមរណភាពនោះ បណ្ដាលមកពីញៀនស្រា និងជាមនុស្សមានសតិមិនល្អ។
ទោះយ៉ាងណា ភរិយាលោក ទុយ ស្រស់ គឺអ្នកស្រី ប៊ុយ គីមឡាក់ អះអាងថា ប្តីរបស់គាត់ជាមនុស្សមាំមួនរកស៊ីចិញ្ចឹមគ្រួសារ ហើយក៏ជាប្រជាការពារភូមិ តែងដើរយាមល្បាតជាប្រចាំដែរ។
ទំនាស់ដីធ្លីស្ថិតនៅស្រុកអូរជ្រៅ ខេត្តបន្ទាយមានជ័យនេះ បានបណ្ដាលឱ្យសកម្មជនដីធ្លីម្នាក់គឺលោក ទុយ ស្រស់ ត្រូវស្លាប់ ហើយ៤នាក់ផ្សេងទៀតក្នុងចំណោមតំណាងទាំង៥នាក់នេះ មានរបួសពេញខ្លួន ក្រោយសមត្ថកិច្ចចាប់ខ្លួន។ នៅពេលរឿងបានផ្ទុះឡើង តំណាងទាំង៤នាក់ដែលសមត្ថកិច្ចចាប់ឃុំខ្លួនតាំងពីថ្ងៃទី២៨ ខែធ្នូ ឆ្នាំមុន បានដោះលែងឱ្យនៅក្រៅឃុំបណ្ដោះអាសន្នវិញ បន្ទាប់ពីលោក ទុយ ស្រស់ ស្លាប់កាលពីថ្ងៃទី១ ខែមករា ឆ្នាំ២០២០។
ក្រោយពេលស្លាប់លោក ទុយ ស្រស់ អ្នកជាប់ឃុំជាមួយអះអាងថា ពួកគេបានឃើញផ្ទាល់ភ្នែកសមត្ថកិច្ចវាយធ្វើទារុណលើលោក ទុយ ស្រស់។ ក្រោយមានការស៊ើបអង្កេតពីគណៈកម្មការថ្នាក់ជាតិ ក៏មានការចាប់ខ្លួនមន្ត្រីកងរាជអាវុធហត្ថខេត្តនេះ២រូប។
វេជ្ជបណ្ឌិតផ្នែកកោសលវិច័យ ព្យាយាមបដិសេធថា ខាងមន្ទីរពេទ្យមួយនេះ ពុំបានពិនិត្យឱ្យបានល្អិតល្អន់ទៅលើសាកសពអតីតសកម្មជនដីធ្លី លោក ទុយ ស្រស់ ដែលរងការធ្វើទារុណកម្មពីកម្លាំងប៉េអិមខេត្ត ក្នុងទម្រង់ធ្ងន់ធ្ងរឡើយ។
លោកវេជ្ជបណ្ឌិត សំរិទ្ធិ រង្សី ឯកទេសផ្នែកកោសលវិច័យ ប្រចាំនៅមន្ទីរពេទ្យមង្គលបូរី ខេត្តបន្ទាយមានជ័យ អះអាងថា មិនបានពិនិត្យល្អិតល្អន់លើលោក ទុយ ស្រស់ ទេ។
លោកបន្តថា៖ «ទាក់ទងនឹងស្លាកស្នាមដោយសារតែពេលបញ្ជូនមកដល់ ខ្ញុំមើលតែសញ្ញាជីវិត ព្រោះខ្ញុំត្រូវការសង្គ្រោះអ្នកជំងឺដែលនៅរស់។ ដល់ពេលគាត់ស្លាប់ហើយ ដូច្នេះ ខ្ញុំអត់បានមើលអ្វីច្រើនទេ។ ខាងកោសលវិច័យ គេមានខាងនគរបាលគេជាអ្នកចូលរួម ពីព្រោះទាល់តែខាងនគរបាលគេធ្វើកោសលវិច័យ ទើបគេកាត់ត្រាទិន្នន័យហ្នឹងចូល»។
បើតាមលោកវេជ្ជបណ្ឌិត សំរិទ្ធិ រង្សី មានន័យថា លោកក៏បានឃើញសាកសពលោក ទុយ ស្រស់ ដោយផ្ទាល់ដែរ ពេលត្រូវគេបញ្ជូនដល់មន្ទីរពេទ្យ។ ប៉ុន្តែ តាមរយៈសំណួរបញ្ជាក់ពីភិនភាគ និងបានឃើញអ្វីខ្លះ ដូចជាស្លាកស្នាមនៅលើរាងកាយ ឬស្ថានភាពបែបណា មុនពេលដឹកចូលដល់មន្ទីរពេទ្យនោះ ត្រូវបានលោក រង្សី មិនអត្ថាធិប្បាយអ្វីទាំងអស់ ដោយលោកថា ស្ថិតនៅលើដៃសមត្ថកិច្ចអស់ហើយ។
បើទោះជាបែបនេះក្ដី អង្គការផ្នែកសិទ្ធិមនុស្ស ដែលឃ្លាំមើលជុំវិញសំណុំរឿងនេះ យល់ឃើញថា ការចេញព័ត៌មានជាហូរហែរខុសពីការពិត អាចជាវិធីជួយបិទបាំងរឿងរសើបនៅពីក្រោយខ្នង។ បើតាមលោក ចន្ទគា មន្ត្រីជាន់ខ្ពស់សមាគមអាដហុក ចាត់ទុកថា ការព្យាយាមលាក់បាំងបែបនេះ ឬកុហកតុលាការ អ្នកដែលភូតភរត្រូវប្រឈមមុខនឹងច្បាប់។
លោក ស៊ុំ ចន្ទគា អ្នកសម្របសម្រួលសមាគមអាដហុក ប្រចាំខេត្តបន្ទាយមានជ័យ ឱ្យដឹងថា ក្នុងរឿងក្ដីព្រហ្មទណ្ឌនេះ ប្រសិនបើតុលាការពន្លាតការស្រាវជ្រាវបន្ថែម អ្នកដែលជួយបិទបាំងព័ត៌មានមួយចំនួនក្នុងសំណុំរឿងនេះ ក៏គេចមិនផុតពីនីតិវិធីតុលាការដែរ។
លោកបន្ថែមថា៖ «អ្នកផ្សំគំនិតនៅក្នុងការរៀបចំហើយផ្ដើម ថាបើសិនជាបទល្មើសហ្នឹងបានទទួលជោគជ័យធ្វើឱ្យមនុស្សស្លាប់ ឬរងរបួសដោយសារស្នាដៃរបស់ខ្លួន។ ដូច្នេះ ខ្លួនត្រូវចេញនូវលិខិតនេះមួយ ឬចេញនូវលិខិតនោះមួយ។ អ៊ីចឹង ទាំងអស់ហ្នឹងក៏ត្រូវទទួលនូវទោសដែរ បើសិនតុលាការពង្រីក ហើយស៊ើបអង្កេតនូវក្តីនេះបន្ត»។
ព្រះរាជអាជ្ញារងអមតុលាការខេត្តបន្ទាយមានជ័យ លោក តេង សាម៉ៃ បានប្រាប់វីអូឌី តាមទូរស័ព្ទថា តុលាការនឹងពង្រីកការស៊ើបអង្កេតក្នុងរឿងក្តីទៀត។ ការបន្តពង្រីកសំណុំរឿងនេះ ប្រយោជន៍ដើម្បីរកអ្នកដែលពាក់ព័ន្ធបន្ថែម៕
