សាលាឧទ្ធរណ៍ នៅថ្ងៃនេះ បានសម្រេចបន្ថយទោសអតីតសកម្មជនគណបក្សប្រឆាំងនៅខេត្តព្រះសីហនុម្នាក់ពី១៨ខែ មកត្រឹម ៨ខែវិញ ដោយមូលហេតុសកម្មជនរូបនេះ ព្រមទទួលកំហុស និងមានជំងឺគាបសរសៃធ្ងន់ធ្ងរ។
អតីតសកម្មជនគណបក្សសង្គ្រោះជាតិ លោក ម៉ៃ ហុងស្រៀង ត្រូវបានចៅក្រមសាលាដំបូងរាជធានីភ្នំពេញ កាលពីថ្ងៃទី១០ ខែតុលា ឆ្នាំ២០១៩ បានសម្រេចផ្ដន្ទាទោសលោក ឱ្យជាប់ពន្ធនាគារ១ឆ្នាំកន្លះ ពីបទញុះញង់ឱ្យមានការរើសអើង និងញុះញង់ឱ្យប្រព្រឹត្តបទឧក្រិដ្ឋជាអាទិ៍ ពាក់ព័ន្ធការផ្សព្វផ្សាយសារលើបណ្ដាញសង្គមហ្វេសប៊ុករិះគន់ការដឹកនាំរបស់រដ្ឋាភិបាល។
មេធាវីការពារក្ដីឱ្យលោក ម៉ៃ ហុងស្រៀង គឺលោក កែត ឃី ប្រាប់វីអូឌីថា ប្រធានក្រុមប្រឹក្សាជំនុំជម្រះសាលាឧទ្ធរណ៍ នៅថ្ងៃនេះ បានសម្រេចបន្ថយទោសកូនក្ដីរបស់លោកពី១៨ខែ មកឱ្យជាប់ទោសតែ៨ខែវិញ ដោយទោសដែលនៅសល់ត្រូវព្យួរ។ លោកបន្តថា ការសម្រេចបន្ថយទោសនេះ ដោយតុលាការ លើកហេតុផលថា កូនក្ដីរបស់លោកកំពុងមានជំងឺគាបសរសៃរ និងព្រមទទួលកំហុស។
លោកថា៖ «ប្រធានក្រុមប្រឹក្សាសាលាឧទ្ធរណ៍សម្រេចបន្ថយទោសពី១៨ខែ មកត្រឹមតែ៨ខែវិញ ដោយសំអាងថា ទី១ គាត់កំពុងមានជំងឺគាបសរសៃរ ហើយទី២ គាត់បានទទួលស្គាល់កំហុស»។
មេធាវីរូបនេះ និយាយថា គិតចាប់ពីថ្ងៃជាប់ឃុំ រហូតមកដល់ថ្ងៃនេះ លោកថា កូនក្ដីរបស់លោកជាប់ពន្ធនាគាររយៈពេល ៥ខែ ២១ថ្ងៃហើយ ដូច្នេះលោក ម៉ៃ ហុងស្រៀង ត្រូវជាប់ឃុំជាង២ខែទៀត។
អតីតសកម្មជនបក្សប្រឆាំងខេត្តព្រះសីហនុ លោក ម៉ៃ ហុងស្រៀង ត្រូវបានសមត្ថកិច្ចចាប់ខ្លួននៅម្ដុំផ្លូវ២០០៤ ខណ្ឌពោធិ៍សែនជ័យ រាជធានីភ្នំពេញ កាលពីចុងខែកក្កដា ឆ្នាំ២០១៩ ក្រោយលោកភៀសខ្លួនចេញពីការឡោមព័ទ្ធរបស់សមត្ថកិច្ចខេត្តព្រះសីហនុ។
បើតាមមេធាវី លោក សំ សុគង់ ដែលការពារក្ដីឱ្យអតីតមន្ត្រី និងសកម្មជនបក្សប្រឆាំង ប្រាប់វីអូឌីថា គិតមកដល់ថ្ងៃទី២១ ខែមករា ឆ្នាំ ២០២០នេះ មានអតីតមន្ត្រី និងសកម្មជនគណបក្សសង្គ្រោះជាតិ ចំនួន១៥នាក់ ដែលមិនទាន់ត្រូវបានដោះលែងពីពន្ធនាគារនៅឡើយ។
លោកបន្តថា មូលហេតុដែលតុលាការមិនដោះលែង ដោយសារ សំណុំរឿងរបស់ពួកគាត់ត្រូវតុលាការកាត់ទោសរួចហើយ និងអ្នកខ្លះទៀត សំណុំរឿងរបស់ពួកគាត់កំពុងស្ថិតនៅក្នុងនីតិវិធីជំនុំជម្រះ។