ក្រុមអាជីវករលក់ដូរនៅឆ្នេរអូត្រេះ ខេត្តព្រះសីហនុ បានឡើងមករកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ក្រោយអាជ្ញាធរខេត្តនេះ បានឈូសឆាយតូបលក់ដូររបស់ពួកគេដោយមិនផ្តល់សំណង។
កាលពីថ្ងៃទី១៥ ខែមករា អាជ្ញាធរខេត្តព្រះសីហនុ បានដាក់គ្រឿងចក្រឈូសឆាយតូបអាជីវករលក់ដូរនៅឆ្នេរអូត្រេះអស់ ៦២តូប ក្រោមហេតុផលយកទីតាំងនោះសម្រាប់ការអភិវឌ្ឍ និងកែលម្អសោភ័ណភាពឆ្នេរសមុទ្រ។
ក្រុមអាជីវករប្រមាណ ៥០នាក់ បានប្រមូលផ្តុំគ្នា និងឈរលើកបដារូបថតលោក ហ៊ុន សែន និងភរិយារបស់លោក នៅមុខខុទ្ទកាល័យរបស់លោកនៅព្រឹកថ្ងៃនេះ ដោយទាមទាររកដំណោះស្រាយសម្រាប់ពួកគេ។
អ្នកស្រី យិន សីម៉ា ដែលអះអាងថា ជាតំណាងអាជីវករទាំងនោះ បានប្រាប់អ្នកសារព័ត៌មាននៅខុទ្ទកាល័យថា ក្រុមអាជីវករស្នើសុំលោកនាយករដ្ឋមន្ត្រី ជួយដោះស្រាយឱ្យពួកគាត់បានលក់ដូរនៅលើទីតាំងចាស់ដដែល។
អាជីវកររូបនេះ អះអាងថា ពួកគាត់បានលក់ដូរនៅទីនោះអស់រយៈពេលចន្លោះពី១០ ទៅ២០ឆ្នាំមកហើយដោយពុំធ្លាប់មានអាជ្ញាធរចុះទៅហាមឃាត់នោះទេ។
អ្នកស្រី យិន សីម៉ា ប្រាប់ថា៖ «ពួកយើងអត់ប្រឆាំងទេក្នុងអភិវឌ្ឍរបស់រដ្ឋ ប៉ុន្តែ សុំឱ្យអាជ្ញាធរជួយកែសម្រួល។ ប្រសិនបើតូបរបស់ពួកខ្ញុំអត់ស្តង់ដារ សុំឱ្យគាត់ជួយកែសម្រួលមក ហើយបើសិនជាដាច់ខាតត្រូវតែអភិវឌ្ឍ គាត់ត្រូវដោះស្រាយសំណងជូនពួកខ្ញុំ ព្រោះពួកខ្ញុំនៅទីនោះ ២០ឆ្នាំប្លាយហើយ»។
អះអាងថាជាអាជីវករម្នាក់ទៀត កញ្ញា សាយ សាម៉ុនថា និយាយថា គ្រួសារនាងបានចំណាយលុយរាប់ម៉ឺនដុល្លារទិញទីតាំង និងធ្វើតូបដើម្បីធ្វើអាជីវកម្មលក់ដូរ ប៉ុន្តែ ត្រូវបានអាជ្ញាធរខេត្តព្រះសីហនុ ដាក់គ្រឿងចក្រឈូសឆាយអស់ទាំងតូប និងសម្ភារផ្សេងៗ។
កញ្ញា សាយ សាម៉ុនថា ប្រាប់ថា៖ «អ៊ីចឹង យើងបាត់បង់អស់ហើយ ហើយក៏អត់មានដោះស្រាយសម្រាប់ពួកយើងដែរ។ ពួកយើងអត់ដឹងថា ធ្វើម៉េចដែរ មានតែឱ្យសម្ដេចតេជោ និងលោកជំទាវ មេត្តាជួយមើលកូនក្មួយ និងបងប្អូនអាជីវករទាំងអស់គ្នា ឱ្យពួកយើងបានដំណោះស្រាយណាមួយដែលយើងអាចបន្តជីវិតយើងទៅមុខទៀត និងមានក្ដីសង្ឃឹមក្នុងម្លប់សន្តិភាពរបស់លោកផង»។
លោក គង់ ចំរើន ដែលជាមន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន នោះ បានចេញមកទទួលញត្តិ ប៉ុន្តែ លោកមិនបានសន្យាអ្វីជាមួយក្រុមអាជីវករនោះទេ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ បានប្រាប់វីអូឌីតាមទូរសព្ទនៅថ្ងៃនេះថា សាលារដ្ឋបាលខេត្តនេះ នឹងមិនដោះស្រាយសំណងណាមួយទៅដល់ក្រុមអាជីវករទាំងនោះឡើយ។
លោកបន្តថា អាជ្ញាធរត្រូវការទីតាំងនោះសម្រាប់ការអភិវឌ្ឍ និងកែលម្អសោភ័ណភាពតំបន់ឆ្នេរ បើទោះបីជាពួកគេស្វែងរកអន្តរាគមន៍ពីលោកនាយករដ្ឋមន្ត្រី ហ៊ុន សែន ក៏ដោយ។
លោក ឃាង ភារម្យ ប្រាប់ថា៖ «រដ្ឋបាលខេត្តមិនមានអ្វីត្រូវផ្លាស់ប្តូរជំហរដោះស្រាយសំណងជូនពួកគេទេ។ ដូចខ្ញុំជម្រាបខាងដើមថា អ្វីដែលរដ្ឋបាលកំពុងធ្វើនេះ គឺយើងកំពុងរៀបចំសោភ័ណភាពសណ្ដាប់ធ្នាប់នៅលើទីតាំងឆ្នេរឈើទាល២ និងឆ្នេរអូរត្រេះ ហើយអ្វីដែលយើងធ្វើនេះ គឺយើងយកកន្លែងនេះ ទុកជាឆ្នេរសាធារណៈរបស់រដ្ឋ។ យើងមិនអនុញ្ញាតឱ្យមានការលក់ដូរធ្វើឱ្យប៉ះពាល់ដល់គុណភាពឆ្នេរទេ»។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ លោកស្រី ជាប សុធារី ដែលឃ្លាំមើលករណីនេះ ឱ្យដឹងថា ករណីអាជ្ញាធរខេត្តព្រះសីហនុ ឈូសឆាយតូបអាជីវករលក់នៅឆ្នេរអូរត្រេះនេះ គឺបានបង្កផលប៉ះពាល់ធ្ងន់ធ្ងរដល់ជីវភាពអាជីវករទាំងនោះ។
មន្ត្រីការពារសិទ្ធិមនុស្សរូបនេះ ស្នើទៅអាជ្ញាធរពាក់ព័ន្ធ ឱ្យដោះស្រាយផលប៉ះពាល់ដោយសមរម្យសម្រាប់ក្រុមអាជីវករនោះ។
អ្នកស្រី ជាប សុធារី និយាយថា៖ «បើសិនជាអាចផ្តល់កន្លែងលក់ដូរកន្លែងណាមួយ ក៏ពួកគាត់សុខចិត្តយកដែរ ឬក៏ដំណោះស្រាយជាគោលនយោបាយណាមួយតិចតួចទៅ ព្រោះអ្នកខ្លះអស់រលីងពីខ្លួនហើយ។ គ្នាខំលក់ដីធ្លីពីស្រែចំការមកៗវិនិយោគធ្វើកន្លែងលក់ដូរនៅកន្លែងហ្នឹង។ ឥលូវអាជ្ញាធរឈូសឆាយអស់ហើយគាត់គ្មានសល់ទេ។ អ្នកខ្លះយំឡើងសន្លប់»។
កាលពីថ្ងៃទី១៣ ខែមករា អាជ្ញាធរខេត្តព្រះសីហនុ បានប្រាប់ទៅក្រុមអាជីវករ ឱ្យរុះរើតូបលក់ដូរចេញពីឆ្នេរអូរឈើទាល (អតីតអារីស្តុន) និងឆ្នេរអូរត្រេះ (អូរត្រេះ១ និងអូរត្រេះ២) ដោយថា ដើម្បីរៀបចំសណ្ដាប់ធ្នាប់ របៀបរៀបរយ កែលម្អសោភ័ណភាពឆ្នេរ និងរក្សាទុកជាឆ្នេរសាធារណៈសម្រាប់ប្រជាពលរដ្ឋទូទៅមកទស្សនាកម្សាន្ត៕
