សកម្មជនម្នាក់ទៀតរបស់អតីតបក្សសង្គ្រោះជាតិ និងជាសមាជិកក្រុមប្រឹក្សាសង្កាត់កាកាប១ ត្រូវបានជនអនាមិកវាយប្រហារពីក្រោយក្នុងពេលលោកកំពុងធ្វើដំណើរទៅយកចៅនៅក្នុងសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
អតីតសមាជិកបេក្ខភាពក្រុមប្រឹក្សាឃុំ-សង្កាត់កាកាប១ ពីគណបក្សសង្គ្រោះជាតិ លោក ខៀវ ឌីន អាយុ៦៥ឆ្នាំ ប្រាប់VOD ថា លោកត្រូវបានជនមិនស្គាល់មុខ២នាក់បានជិះម៉ូតូមកក្បែរ និងបានយកដែកវាយក្បាលលោកពីក្រោយ ក្នុងពេលលោកទៅយកចៅចេញពីសាលារៀននៅក្រោយព្រលានយន្តហោះពោធិ៍ចិនតុង នៅក្នុងសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។ លោកចាត់ទុកសកម្មភាពនេះជាការគំរាមកំហែងផ្នែកនយោបាយលើលោក ដោយសារលោកធ្លាប់ជាអ្នកគាំទ្របក្សសង្គ្រោះជាតិ។
លោកថា៖ «សកម្មភាព(ហិង្សា)បែបនេះ ខ្ញុំមិនដែលជួបទេ ខ្ញុំក៏មិនដែលឈ្លោះនឹងបងប្អូនញាតិមិត្តណាដែរ ខ្ញុំអត់ដែលទេ។ ខ្ញុំដល់ម៉ោងទៅយកចៅទៅរៀន និងចេញពីរៀន មុខរបរខ្ញុំមានតែប៉ុណ្ណឹង នៅតែផ្ទះទេ»។
លោកថា នៅពេលនេះ លោកមានអាការៈវិលមុខ ខណៈក្បាលលោកត្រូវដេរ១០ថ្នេរ និងផុងលាលាដ៏ផ្នែកខាងមុខផងដែរ។
រូបភាពដែលត្រូវបានចែកចាយនៅថ្ងៃនេះ បានបង្ហាញនូវមនុស្សពីរនាក់ជិះម៉ូតូហុងដាឌ្រីម គ្មានស្លាកលេខ ពាក់មួកសុវត្ថិភាពទាំងពីរនាក់ ដោយអ្នកនៅពីក្រោយស្លៀកពាក់អាវខ្មៅ និងខោខ្មៅ បានលើកវត្ថុរឹងប្រវែងជាង១ម៉ែត្រ វាយទៅលើលោក ខៀវ ឌីន ពីក្រោយនៅម៉ោង១០ និង៤៨នាទីព្រឹក។
អធិការនគរបាលខណ្ឌពោធិ៍សែនជ័យ លោក ម៉ន វុធី ប្រាប់វីអូឌីនៅរសៀលនេះថា លោកមិនបានដឹងពីករណីនេះនៅឡើយទេ ប៉ុន្តែ លោកថា លោកនឹងឱ្យមន្ត្រីរបស់លោកចុះស្រាវជ្រាវ និងតាមរកជនបង្កមកទទួលខុសត្រូវផងដែរ។
លោក ម៉ន វុធី និយាយថា៖ «ប្រហែលជាមន្ត្រីប៉ុស្តិ៍គាត់អាចចុះទៅមុនខ្ញុំហើយ។ រឿងកាប់គេ គឺខុសហើយ! ត្រូវតែអនុវត្តច្បាប់»។
អតីតថ្នាក់ដឹកនាំគណបក្សសង្គ្រោះជាតិ លោក អ៊ូ ច័ន្ទរ័ត្ន ចាត់ទុកអំពើហិង្សាទៅលើសកម្មជន ឬអ្នកគាំទ្រអតីតបក្សប្រឆាំង ថាជាទម្រង់នៃការធ្វើទុក្ខបុកម្នេញខាងផ្នែកនយោបាយ ហើយលោកថា អំពើហិង្សានយោបាយបែបនេះ ឆ្លុះបញ្ចាំងឱ្យឃើញពីការបណ្ដែតបណ្ដោយពីអាជ្ញាធរឱ្យកើតឡើងដដែលៗ។
លោក អ៊ូ ច័ន្ទរ័ត្ន ប្រាប់ថា៖ «វាហាក់ដូចជាការបង្ក្រាបមួយ ជាយុទ្ធនាការបង្ក្រាបមួយបន្ថែមទៅលើអ្វីដែលគ្នាកំពុងតែរងគ្រោះហើយ អាហ្នឹងវាធ្វើឱ្យមុខមាត់រាជរដ្ឋាភិបាល មុខមាត់អាជ្ញាធរកាន់តែអាក្រក់»។
អនុប្រធានអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ករណីនេះកើតឡើងដដែលៗ ខណៈអាជ្ញាធរមិនអាចវែកមុខជនដៃដល់មកផ្តន្ទាទោសបាន។
មន្ត្រីការពារសិទ្ធិមនុស្សរូបនេះ លើកឡើងថា ការដែលមិនអាចយកជនដៃដល់មកផ្ដន្ទាទោសនេះ នឹងអាចឱ្យមហាជនគិតច្រឡំថា ជាការធ្វើទុក្ខបុកម្នេញ ឬគំរាមកំហែងផ្នែកនយោបាយទៅលើអ្នកប្រឆាំង។
លោក អំ សំអាត ប្រាប់ថា៖ «ថ្មីៗនេះ សម្តេចក្រឡាហោមក៏បានលើកឡើងពីភាពអយុត្តិធម៌នៅក្នុងសង្គម វានាំឱ្យមានការបែកបាក់ជាតិ។ អញ្ចឹង ភាពអយុត្តិធម៌នៅក្នុងសង្គម វាបង្កឱ្យមានវប្បធម៌និទណ្ឌភាព។ ចំណុចទាំងអស់នេះ បើគេមើលឃើញរឿងដដែលកើតឡើង ហើយជនល្មើស ឬជនប្រព្រឹត្តមិនត្រូវបានយកទៅផ្តន្ទាទោសតាមច្បាប់ទេ វាជានិទណ្ឌភាពមួយ ហើយក៏វាជាអយុត្តិធម៌នៅក្នុងសង្គមមួយដែរ»។
មន្ត្រីការពារសិទ្ធិមនុស្ស លោក អំ សំអាត បានឱ្យដឹងថា អំពើហិង្សាទៅលើសកម្មជនអតីតប្រឆាំងចំនួន១០ករណី បានកើតឡើងរួចមកហើយចាប់តាំងពីខែកញ្ញាឆ្នាំមុន៕