សមត្ថកិច្ចខេត្តកោះកុង បានអះអាងថា មន្ត្រីជំនាញខេត្ត និងមន្ត្រីមួយចំនួនទៀតមកពីរាជធានីភ្នំពេញ នឹងរួមគ្នាជាមួយមន្ត្រីរបស់ស៊ីម៉ាក់ ដោះដ្រូនដែលបានធ្លាក់កាលពីថ្ងៃម្សិលមិញជាបំណែកបញ្ជូនមកភ្នំពេញនៅថ្ងៃស្អែកដើម្បីស្រាវជ្រាវបន្ត។
ស្នងការខេត្តកោះកុង លោក សំឃិត វៀន បានបញ្ជាក់ថា បច្ចុប្បន្ន អាជ្ញាធរខេត្តកោះកុង បានបញ្ជូនសមត្ថកិច្ចចំនួន៣៥នាក់ ទៅប្រចាំការនៅទីតាំងមានធ្លាក់ដ្រូន ស្ថិតក្នុងភូមិព្រែកស្មាច់ ឃុំកោះស្តេច ស្រុកគិរីសាគរហើយ រង់ចាំមន្ត្រីស៊ីម៉ាក់មកដោះបំបែកដ្រូនជាបំណែកនាថ្ងៃស្អែក ដើម្បីបញ្ជូនមករាជធានីភ្នំពេញ ស្រាវជ្រាវបន្ត។ លោកបញ្ជាក់ថា មន្ទិលមួយចំនួនសង្ស័យដ្រូនមានមនុស្សជិះនោះ ជារឿងមិនពិតឡើយ ព្រោះបច្ចេកទេសដ្រូន ត្រូវតែមានបំពាក់ឆ័ត្រយោងដើម្បីទប់លំនឹងបញ្ចៀសការធ្លាក់បែកពេលចុះចត។
លោក សំឃិត វៀន បានអះអាងថា៖ «យើងមិនទាន់សន្និដ្ឋានអ្វីបានទាំងអស់ ទាល់តែរង់ចាំក្រុមការងារបច្ចេកទេស លោកពិនិត្យ។ ទីតាំងកន្លែងកើតហេតុហ្នឹង វាមិននៅជាប់ព្រំដែនខ្មែរថៃទេ ចង់និយាយថា ពីទីតាំងទីរួមខេត្តមក ចូលមកខាងផ្ទៃក្នុងស្រុកស្រែអំបិលនេះទៅវិញទេ។ ឆ្ងាយពីព្រំដែនប្រទេសថៃ។ ទីតាំងដ្រូនធ្លាក់មានចម្ងាយប្រមាណ៧គីឡូម៉ែត្រ ពីតំបន់ដីសម្បទានរបស់ក្រុមហ៊ុនញូញៀន [យូឌីជី]»។
លោកស្នងការរូបនេះ បានបញ្ជាក់បន្ថែមថា ចំណោមក្រុមការងារទាំងពីរដែលបញ្ជូនមកពីរាជធានីភ្នំពេញ ក្រសួងការពារជាតិនឹងធ្វើជាម្ចាស់ករណីនេះ កាត់ផ្តាច់ពីក្រុមការងាររបស់អគ្គស្នងការនគរបាលជាតិ។
ព័ត៌មានដំបូងអំពីការប្រទះឃើញដ្រូនធ្លាក់ គឺប្រជាពលរដ្ឋក្នុងមូលដ្ឋានបានរាយការណ៍មកសមត្ថកិច្ចនៅម៉ោងប្រមាណ៦ល្ងាច ថ្ងៃទី១៦ ខែមករានេះ។ នេះជាលើកទីមួយហើយ ដែលមានដ្រូនដែលធ្លាក់លើទឹកដីខេត្តកោះកុង ដែលមានទទឹងពីចុងស្លាបម្ខាងទៅចុងស្លាបម្ខាងទៀតប្រវែងជាង៩ម៉ែត្រ ហើយមានបណ្ដោយប្រវែង៥ម៉ែត្រ៕