អាជ្ញាធរខេត្តកណ្ដាល រារាំងមិនឱ្យកម្មកររោងចក្រ ស្យុង យិន ឡើងមកដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន និងក្រសួងការងារ ដោយលើកហេតុផលថា ប៉ះពាល់សណ្ដាប់ធ្នាប់សាធារណៈ។
ការរារាំងនេះ ធ្វើឡើងបន្ទាប់ពីកម្មករបម្រើការងារនៅរោងចក្រ ស្យុង យិន (Zhong Yin Cambodia B Textile Co.LTD) ជាង ១០០នាក់ ស្ថិតក្នុងក្រុងតាខ្មៅ ខេត្តកណ្ដាល នៅថ្ងៃនេះ នាំគ្នាឡើងមកដាក់ញត្តិនៅក្រសួងការងារ និងខុទ្ទកាល័យលោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ ករណីដែលថៅកែបញ្ឈប់ពួកគេពីការងារ ដោយមិនបើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនពួកគេ។
កម្មការិនី អ្នកស្រី ណុប ស្រីទុំ ប្រាប់អ្នកសារព័ត៌មានកន្លែងដែលសមត្ថកិច្ចរារាំង ស្ថិតនៅមុខផ្ទះលោកនាយករដ្ឋមន្ត្រី ហ៊ុន សែន ក្នុងក្រុងតាខ្មៅ ថាពួកគាត់នាំគ្នាឡើងមករកកិច្ចអន្តរាគមន៍ពីប្រមុខរដ្ឋាភិបាល និងស្ថាប័នពាក់ព័ន្ធ នៅថ្ងៃនេះ ដោយសារ អស់ជំនឿទៅលើមន្ទីរការងារខេត្ត និងថៅកែរោងចក្រ។
អ្នកស្រីថា៖ «បើគាត់បញ្ឈប់ពួកខ្ញុំហើយ ស្នើសុំឱ្យគាត់គិតគូរប្រាក់ទៅតាមផ្លូវច្បាប់ឱ្យពួកខ្ញុំទទួលយកបានហើយ។ បើក្រុមហ៊ុនគិតឱ្យពួកខ្ញុំបានតែបន្តិចបន្តួចគឺមិនយុត្តិធម៌សម្រាប់ពួកខ្ញុំទេ បើគិតដោយយុត្តិធម៌ ពួកខ្ញុំទទួលយកហើយ ខ្ញុំមិនតវ៉ាអ៊ីចឹងទេ។ អ៊ីចឹង អត់មានអីទេ ក្រៅពីទទូចឱ្យសម្ដេចឪពុកហ្នឹង ជួយកូនចៅផង ជួយឱ្យខាងស្ថាប័នពាក់ព័ន្ធ ឱ្យក្រុមហ៊ុនដោះស្រាយផ្លូវច្បាប់ ខ្ញុំពិបាកណាស់ កូនអត់មានទឹកដោះគោបៅទេ បានយកកូនមកតាមអ៊ីចឹង»។
ស្នងការខេត្តកណ្ដាល លោក អ៊ាវ ចំរើន បានបដិសេធដែលថា អាជ្ញាធររារាំងកម្មករ។ លោកបន្តថា ការដែលអាជ្ញាធរមិនអនុញ្ញាតឱ្យកម្មករឡើងមកភ្នំពេញ ដោយបារម្ភខ្លាចប៉ះពាល់ដល់សណ្ដាប់ធ្នាប់សាធារណៈ។
លោកថា៖ «ដូចជាមិនរារាំងទេ គាត់មកត្រឹមហ្នឹង [ផ្ទះសម្ដេចក្រុងតាខ្មៅក៏មានក្រុមការងារទទួលញត្តិដែរ] ឥឡូវយើងទទួលឯកសារពីគាត់ ដើម្បីដាក់ដោះស្រាយ។ ខាងខុទ្ទកាល័យ លោកចេញមកទទួលពាក្យរបស់គាត់ មិនបានរារាំងទេ។ [ លោកថា មិនឱ្យឡើងមកភ្នំពេញ] ដូចជាមិនគួរទៅបង្កបញ្ហានៅភ្នំពេញឱ្យប៉ះពាល់សន្តិសុខ សណ្ដាប់ធ្នាប់សាធារណៈ ហើយបើគាត់ចង់យកទៅដាក់នៅខុទ្ទកាល័យនៅ [ទីនោះ] ដដែល។
តំណាងកម្មករបម្រើការងារនៅរោងចក្រ ស្យុង យិន លោក អ៊ឹម រ៉ា អះអាងថា ពួកគាត់មិនបានធ្វើឱ្យមានការកកស្ទះចរាចរណ៍ដូចការលើកឡើងរបស់អាជ្ញាធរឡើយ។
លោថា៖ «ខ្ញុំមើលទៅ គាត់ដូចបិទសិទ្ធិសេរីភាពកម្មករ គាត់ធ្វើអ៊ីចឹងអត់ត្រូវ គាត់អត់មានគិតគូរដោះស្រាយឱ្យកម្មករហើយ មកបិទផ្លូវកម្មករ»។
លោកបន្តថា ការដែលពួកគាត់នាំគ្នាឡើងមករកកិច្ចអន្តរាគមន៍ពីក្រសួង និងលោកនាយករដ្ឋមន្ត្រី ហ៊ុន សែន គឺចង់ឱ្យប្រមុខរដ្ឋាភិបាល និងស្ថាប័នពាក់ព័ន្ធជួយជំរុញទៅថៅកែ ឱ្យដោះស្រាយសំណងជូនពួកគាត់ទៅតាមច្បាប់តែប៉ុណ្ណោះ។
មន្ត្រីសហព័ន្ធសហជីពស្មារតីកម្មករខ្មែរ លោកស្រី ឈាង ធីតា ចាត់ទុកការរារាំងរបស់អាជ្ញាធរនេះថា ជាការបំបិទសិទ្ធិសេរីភាពកម្មករ។ លោកស្រីបន្តថា អាជ្ញាធរគួរតែជំរុញទៅថៅកែឱ្យធ្វើការដោះស្រាយ ដោយសារ ករណីនេះ ក្រុមប្រឹក្សាអាជ្ញាកណ្ដាលបានបង្គាប់ឱ្យថៅកែទូរទាត់ប្រាក់ឈ្នួលជូនកម្មករតាំងខែតុលា ឆ្នាំ២០១៩មកម៉្លេះ ប៉ុន្តែ រហូតមកដល់ពេលនេះ ថៅកែមិនបានដោះស្រាយឡើយ។
លោកស្រីមានប្រសាសន៍ថា៖ «ក្រុមប្រឹក្សាអាជ្ញាកណ្ដាល បង្គាប់ឱ្យនិយោជកបើកប្រាក់ឈ្នួលឱ្យកម្មករតាំងពីខែ១០ ឆ្នាំ២០១៩ មក ពីព្រោះនៅខែ១០ហ្នឹង រោងចក្រត្រូវបើកប្រាក់ឈ្នួលឱ្យកម្មករ៥០% នៅសល់៥០%ទៀតមិនទាន់បើក។ បន្ទាប់មក ខែ១១ និង១២ ឆ្នាំ២០១៩ និយោជកត្រូវទូរទាត់ប្រាក់ឈ្នួល១០០ភាគរយពេញ ទោះនិយោជកអត់មានការងារធ្វើក៏ដោយ ពីព្រោះនិយោជកអត់បានដាក់លិខិតទៅអធិការកិច្ចក្រុមប្រឹក្សាអាជ្ញាកណ្ដាល ដើម្បីសុំព្យួរការងារទេ អ៊ីចឹងក្រុមប្រឹក្សាបានកាត់ឱ្យកម្មករឈ្នះ ហើយបើរោងចក្របិទទ្វា ត្រូវទូរទាត់ប្រាក់ជូនបងប្អូនកម្មករ»។
ទោះជាយ៉ាងណាក៏ការរារាំងនោះ មិនមានការប៉ះទង្គិចគ្នាទេ ហើយកម្មករនៅតែបន្តនាំគ្នាយកញត្តិមកដាក់នៅក្រសួងការងារដដែល។
បើតាមតំណាងកម្មករ លោក អ៊ឹម រ៉ា អះអាងនៅរសៀលនេះថា ក្រសួងការងារបានទទួលយកញត្តិរបស់ពួកគាត់ ដោយសន្យាថា នឹងធ្វើការដោះស្រាយនៅសប្ដាហ៍ក្រោយនេះ។
លោក អ៊ឹម រ៉ា ឱ្យដឹងថា រោងចក្រ ស្យុង យិន ផលិតសំលៀកបំពាក់ឱ្យស្លាកយីហោ H&M និងម៉ាកផ្សេងទៀត បើកកាលពីឆ្នាំ២០១៣ ដែលមានថៅកែជាជនជាតិចិន ហើយរោងចក្រនេះមានកម្មករ៦១០នាក់កំពុងបម្រើការងារ៕
