ភាគីរដ្ឋាភិបាលអះអាងថា ការកាត់បន្ថយប្រាក់ឈ្នួលកម្មករវេនយប់ និងកាត់បន្ថយថ្ងៃឈប់សម្រាកអាចទាក់ទាញអ្នកវិនិយោគទុន បង្កើនការងារសម្រាប់ពលរដ្ឋ និងជំរុញដល់ល្បឿននៃការរីកចម្រើនសេដ្ឋកិច្ចជាតិ។
ក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃម្សិលមិញ បានបើកសិក្ខាសាលាពិគ្រោះយោបល់ត្រីភាគីមួយ ស្ដីពីការធ្វើវិសោធនកម្មច្បាប់ការងារ ដោយមានការចូលរួមពីតំណាងក្រសួង តំណាងនិយោជក តំណាងសហជីព និងភាគីពាក់ព័ន្ធផ្សេងទៀត សរុបអ្នកចូលរួមជិត១០០នាក់។
នៅក្នុងសិក្ខាសាលានោះ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង មានប្រសាសន៍ថា ការធ្វើវិសោធនកម្មច្បាប់ការងារដើម្បីការកែសម្រួលបទប្បញ្ញត្តិពាក់ព័ន្ធនឹងកម្មករធ្វើការវេននេះ គឺដើម្បីបង្កើនភាពទាក់ទាញឧស្សាហកម្មទំនើប បង្កើនការងារជូនប្រជាពលរដ្ឋ ទៅតាមជម្រើស និងតម្រូវការជាក់ស្តែងរបស់ពួកគេ។
លោក អ៊ិត សំហេង បន្តថា ចំពោះការលុបការឈប់នៅថ្ងៃបន្ទាប់សម្រាប់ថ្ងៃឈប់សម្រាកបុណ្យចំថ្ងៃអាទិត្យ គឺដើម្បីឆ្លើយតបទៅនឹងការវិវឌ្ឍផ្នែកសង្គម-សេដ្ឋកិច្ចកម្ពុជា សំដៅលើកកម្ពស់ផលិតភាពការងារ និងពង្រឹងភាពប្រកួតប្រជែងសេដ្ឋកិច្ចកម្ពុជាទាំងក្នុងតំបន់ និងសកលលោក។ ទោះយ៉ាងណា លោកបញ្ជាក់ថា ក្រសួងយកចិត្តទុកដាក់ក្នុងការកែប្រែច្បាប់នេះមិនធ្វើឱ្យប៉ះពាល់ដល់ភាគីណាមួយនោះទ។
លោកបន្ថែមថា៖ «ក្រសួងនឹងពិនិត្យឱ្យបានគ្រប់ជ្រុងជ្រោយ និងធានាថា ផលប្រយោជន៍របស់កម្មករនិយោជិតគ្រប់រូបមិនត្រូវបានកាត់បន្ថយ»។
ទោះបីជារដ្ឋាភិបាលព្យាយាមលើកហេតុផល ដើម្បីឈានទៅរកការធ្វើវិសោធនកម្មច្បាប់ការងារត្រង់ចំណុចទាំងពីរនេះក៏ដោយ ប៉ុន្តែ ត្រូវបានក្រុមមេសហជីពមួយចំនួនដែលចូលរួមក្នុងសិក្ខាសាលានេះ តវ៉ាប្រឆាំងដោយពួកគេលើកឡើងថា ការកែប្រែចំណុចទាំងនោះមិនបានបម្រើផលប្រយោជន៍កម្មករឡើយ។
ប្រធានសហភាពការងារកម្ពុជា លោក អាត់ ធន់ មិនគាំទ្រឱ្យធ្វើវិសោធនកម្មច្បាប់នេះឡើយ។ លោកថា កន្លងមក ពេលដែលរដ្ឋាភិបាលធ្វើវិសោធនកម្មច្បាប់ការងារនេះ គឺគ្មានផលចំណេញសម្រាប់កម្មករនោះទេ។
លោក អាត់ ធន់ ថាច្បាប់ការងារឆ្នាំ១៩៩៧ ការធ្វើការថែមម៉ោងធម្មតា ត្រូវថែម៥០ភាគរយបន្ថែម និងពេលថែមម៉ោងពេលយប់គឺ២០០ភាគរយ ប៉ុន្តែ នៅឆ្នាំ២០០៧ រដ្ឋាភិបាលបានធ្វើវិសោធនកម្មច្បាប់នេះ ដោយកាត់បន្ថយមកត្រឹម១៣០ភាគរយ ដើម្បីឱ្យមានការងារធ្វើ២៤ម៉ោងលើ២៤ម៉ោង។ លោក អាត់ ធន់ បន្តថា រហូតមកដល់ពេលនេះ ពុំមានរោងចក្រសហគ្រាសណាមួយមានការងារធ្វើ២៤ម៉ោងនោះទេ។
លោកបន្ថែមថា៖ «កម្មករធ្វើការវេនយប់នឹងខាត៣០ភាគរយ ប៉ះពាល់ ទី២ កម្មករធ្វើការវេនយប់ គេនឹងបញ្ឈប់ពួកគាត់ គេរើសចូលកម្មករថ្មីក្នុងរយៈពេលយ៉ាងខ្លី អ៊ីចឹងគាត់បាត់បង់អត្ថប្រយោជន៍។ មួយទៀត និយោជកខ្លះចង់ប្តូរវេនកម្មករ ប៉ុន្តែ គាត់មិនអាចប្តូរដោយសារគុណលុយទៅវាច្រើន។ និយោជកគាត់អាចរើសអើងសហជីព គាត់ធ្វើបាបកម្មករ គាត់អាចរុញកម្មករវេនថ្ងៃមកដាក់វេនយប់។ អ៊ីចឹង វានឹងបង្កជម្លោះជាច្រើន។ បើកម្មករហ្នឹងអត់ធ្វើវេនយប់ដោយសារខាត៣០ភាគរយ គាត់បាត់បង់ការងារតែម្ដង តែបើគាត់ធ្វើ គាត់រងនូវភាពអយុត្តិធម៌ផ្សេងៗ»។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ក៏មិនគាំទ្រចំពោះគម្រោងធ្វើវិសោធនកម្មនេះដែរ។លោកបានស្នើទៅក្រសួងការងារឱ្យធ្វើការពិចារណាឡើងវិញលើករណីនេះ។
លោកបន្ថែមថា៖ «ខ្ញុំគិតថា រាល់ការតាក់តែងច្បាប់ ឬក៏ធ្វើវិសោធនកម្មច្បាប់ ភាគីពាក់ព័ន្ធគួរតែបង្ហាញនៅចំណុចមិនល្អ ហើយធ្វើឱ្យវាទៅល្អ ឬក៏ចំណុចមិនមានផលប្រយោជន៍ ឱ្យវាទៅជាមានផលប្រយោជន៍ ដើម្បីរក្សានូវអ្វីដែលការលើកកម្ពស់ដល់អ្នកផលិត ជាពិសេសកម្មករ»។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា C-CAWDU លោក គង់ អាទិត្យ ដែលចូលរួមសិក្ខាសាលានេះដែរ ព្រមានថា ប្រសិនបើរដ្ឋាភិបាលនៅតែបន្តធ្វើវិសោធនកម្មច្បាប់ការងារ ដោយកាត់បន្ថយប្រាក់ឈ្នួលកម្មករវេនយប់ និងលុបការឈប់នៅថ្ងៃបន្ទាប់សម្រាប់ថ្ងៃឈប់សម្រាកបុណ្យចំថ្ងៃអាទិត្យ នឹងធ្វើឱ្យប៉ះពាល់ដល់ប្រជាប្រិយភាព។
លោកបន្ថែមថា៖ «សុំរំឭកដល់ថ្នាក់ដឹកនាំរដ្ឋាភិបាល យើងដឹងហើយថា រដ្ឋាភិបាលកើតឡើងដោយគណបក្សដែលជាប់ឆ្នោត អ៊ីចឹងលើកនេះខាត បើសិនជាហ៊ានធ្វើរឿងនេះនឹងខាត»។
ក្រុមមេដឹកនាំសហជីពទាំងនេះ លើកឡើងប្រហាក់ប្រហែលគ្នាថា ដើម្បីការវិនិយោគឱ្យកាន់តែច្រើនរដ្ឋាភិបាលត្រូវតែកែប្រែចំណុចផ្សេងៗដូចជា បន្ថយថ្លៃអគ្គិសនី ថ្លៃទឹក កាត់បន្ថយអំពើពុករលួយ និងកាត់បន្ថយការិយាធិបតេយ្យ ជាជាងកាត់បន្ថយផលប្រយោជន៍កម្មករ។
ចំណែកភាគីតំណាងនិយោជក សមាគមរោងចក្រកាត់ដេរនៅកម្ពុជា (GMAC) កាលពីថ្ងៃទី១៥ ខែមករា បានចេញសេចក្ដីថ្លែងការណ៍មួយគាំទ្ររដ្ឋាភិបាល។
ក្នុងសេចក្ដីថ្លែងការណ៍នោះ សមាគមរោងចក្រកាត់ដេរនៅកម្ពុជា បានលើកឡើងថា ច្បាប់ការងារដែលមានអាយុកាលជាង២ទសវត្សរ៍នេះ គួរធ្វើវិសោធនកម្មជាបន្តបន្ទាប់ ដើម្បីកែសម្រួលមាត្រាមួយចំនួន ក្នុងគោលបំណងបង្កើនសមត្ថភាពផលិតកម្ម និងសក្តានុពល នៃភាពប្រកួតប្រជែងរបស់ប្រទេសលើឆាកអន្តរជាតិ តាមរយៈការបើកចំហរឱកាសវិនិយោគដែលមានលក្ខណៈអំណោយផលដល់ឧស្សាហកម្មមានតម្លៃខ្ពស់ ដូចជាផ្នែកសេវាកម្ម អាកាសចរ និងដឹកជញ្ជូន និងមន្ទីរពេទ្យ ជាដើម ដើម្បីជំរុញឱ្យកម្ពុជាក្លាយជាប្រទេសមានការអភិវឌ្ឍខ្ពស់ផ្នែកឧស្សាហកម្ម និងសេវាកម្ម។
ប៉ុន្តែ យ៉ាងណា គម្រោងធ្វើវិសោធនកម្មច្បាប់ការងារនេះ មិនទាន់បានបញ្ចប់ ឬសម្រេចថា យ៉ាងណានោះទេ ដោយរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង ឱ្យដឹងថា គម្រោងធ្វើវិសោធនកម្មច្បាប់នេះ ទើបពិគ្រោះសុំយោបល់ពីត្រីភាគីលើកទីមួយប៉ុណ្ណោះ។ លោកថា ក្រោយទទួលយោបល់ធាតុចូលរួម ក្រសួងការងារនឹងយកយោបល់ទាំងនោះទៅធ្វើការពិចារណាជាមួយភាគីពាក់ផ្សេងទៀតដើម្បីរកចំណុចរួម៕
