ក្រុមអាជីវករលក់ដូរនៅតាមឆ្នេរសមុទ្រខេត្តព្រះសីហនុ បានឱ្យដឹងថា កម្លាំងចម្រុះរបស់ខេត្តនេះ បានចាប់ផ្ដើមរុះរើតូបរបស់ពួកគាត់ហើយនៅព្រឹកថ្ងៃនេះ ទាំងមិនមានការផ្ដល់សំណងអ្វីនោះឡើយ។
អាជីករដែលលក់ដូរនៅតំបន់អូរត្រេះពីរ អ្នកស្រី យិន សីម៉ា បានរៀបរាប់ទាំងយំថា អាជីវករជាម្ចាស់តូបនៅតំបន់អូរត្រេះភាគច្រើន មិនបានរើអីវ៉ាន់ចេញពីតូបរបស់ខ្លួនឡើយ។
អាជីវកររូបនេះបន្តថា ការចុះរុះរើតូបរបស់សមត្ថកិច្ចខេត្ត កាលពីម៉ោងប្រមាណ ៧ព្រឹកនេះ បានបំផ្លាញទាំងតូប និងសម្ភារទាំងអស់ក្នុងពេលតែមួយព្រមគ្នា។ អ្នកស្រីថា អាជីវករបានត្រឹមអង្គុយយំ មើលតូបដែលខ្លួនធ្លាប់រកស៊ីពី១០ ទៅ២០ឆ្នាំ ត្រូវអាជ្ញាធរបំផ្លាញចោលទាំងគ្មានដំណោះស្រាយ។
អ្នកស្រី យិន សីម៉ា និយាយថា៖ «ពួកគាត់រុះរើទាំងអស់ចេញតែម្ដង ពួកអាជីវករយើងអត់មានតតាំងអីនឹងពួកកងកម្លាំង ឬខាងថ្នាក់ខេត្តទេបង។ អត់ទេបង គេ [អាជ្ញាធរខេត្តព្រះសីហនុ] អត់មានឱ្យដំណោះស្រាយអីទេ។ ពួកខ្ញុំអត់ដឹងគិតម៉េចទេបងអើយ មានតែអង្គុយយំទល់មុខគ្នា»។
អាជីករមួយរូបទៀតនៅតំបន់អូរត្រេះពីរ អ្នកស្រី កូយ ស្រីពេជ្រ បានបញ្ជាក់ថា សមត្ថកិច្ចបានយកគ្រឿងចក្រគ្រប់ប្រភេទ ទាំងឡានដឹកដី អាត្រាក់កាយ កាប់ និងចូក ព្រមទាំងបញ្ជូនកងកម្លាំងជាច្រើននាក់បំពាក់ដោយឧបករណ៍ការពារគ្រប់ប្រភេទ មកព្រមគ្នា ដោយផ្តើមការរុះរើដំបូងពីតូបអាជីវករខាងតំបន់អូរត្រេះមួយ។
អ្នកស្រីថា ដោយតូបអាជីវករសុទ្ធមានទំហំធំរហូតជាង ២០ម៉ែត្រ ហើយថា ក្នុងពេលដ៏ខ្លី អាជីវករមិនអាចជញ្ជូនអីវ៉ាន់របស់ខ្លួនបានទាន់ពេលឡើយ គឺបានត្រឹមជញ្ជូនសម្ភារចាំបាច់បានតិចតួចប៉ុណ្ណោះ។
អ្នកស្រី កូយ ស្រីពេជ្រ និយាយថា៖ «ខ្ញុំមិនដឹងទៅណាទៅណីទេបង កំពុងតែរើអីវ៉ាន់ខ្លះ។ អត់មានអីទាំងអស់ ដោះស្រាយ គេ [អជ្ញាធរខេត្តព្រះសីហនុ] ក៏អត់ដោះស្រាយឱ្យ គេអត់មកជួប គេអត់មកនិយាយជាមួយយើងទេបង»។
អ្នកស្រី ស្រីពេជ្រ និយាយបន្តថា៖ «វាអយុត្តិធម៌ណាស់សម្រាប់ពួកខ្ញុំ ពួកខ្ញុំទ្រាំតស៊ូលំបាកគ្រប់បែបយ៉ាងនៅទីនេះ [ឆ្នេរអូរត្រេះ] អស់ជិត២០ឆ្នាំហើយ។ ពេលខែភ្លៀង យើងអត់មានភ្ញៀវទេ យើងរំពឹងតែខែប្រាំងទេ ហើយឥលូវខែប្រាំងមកដល់ គេមកឈូសតូបយើងចោលអស់ទៀត។ ទាំងអត់សំណង អត់ដំណោះស្រាយអីទាំងអស់»។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានបញ្ជាក់ថា នៅព្រឹកនេះ អជ្ញាធរខេត្តបានបញ្ជូនកម្លាំងចុះរុះរើតូបរបស់ក្រុមអាជីវករនៅតំបន់ឆ្នេរអូរត្រេះ ស្ថិតនៅភូមិ៤ និងភូមិ៦ សង្កាត់លេខ៤ ក្រុងព្រះសីហនុហើយ។ តែលោកនៅមិនទាន់អាចបញ្ជាក់បានច្បាស់ឡើយថា ប្រតិបត្តិការចុះរុះរើ នឹងត្រូវបញ្ចប់ទាំងស្រុងត្រឹមថ្ងៃនេះ ឬបន្តរហូតថ្ងៃស្អែកឡើយ។
បើតាមលោក ឃាង ភារម្យ តូបចំនួន ៦២នៅតាមបណ្ដោយឆ្នេរអូរត្រេះ១ និងអូរត្រេះ២ នឹងត្រូវរុះរើចេញ ដើម្បីបើកផ្លូវសម្រាប់ការអភិវឌ្ឍ និងកែលម្អសោភ័ណភាព។
លោក ឃាង ភារម្យ អះអាងថា៖ «យើងមើលទៅលើស្ថានភាពជាក់ស្តែង ប៉ុន្តែ ឥឡូវនេះ ក្រុមការងារលោកបានកំពុងនឹងធ្វើការហើយ។ ការងារកំពុងតែដំណើរការទៅមុខហើយ ធម្មតាវាមានការតវ៉ាតិចតួច ប៉ុន្តែឥលូវនេះយើងឃើញថា មានការស្ងប់ស្ងាត់ហើយ។ លទ្ធភាពនេះ គឺក្រុមការងារលោកកំពុងតែបន្តធ្វើ»។
សេចក្ដីប្រកាសព័ត៌មានរបស់អាជ្ញាធរខេត្តព្រះសីហនុ នាថ្ងៃទី១៣ ខែមករានេះ បានបញ្ជាក់ថា រដ្ឋបាលខេត្តនឹងមិនអនុញ្ញាតឱ្យក្រុមអាជីវករបន្តលក់ដូរលើឆ្នេរអូរឈើទាល (អតីតអារីស្តុន) និងឆ្នេរអូរត្រេះ (អូរត្រេះ១ និងអូរត្រេះ២) តទៅទៀតឡើយ ដើម្បីរៀបចំសណ្ដាប់ធ្នាប់ របៀបរៀបរយ កែលម្អសោភ័ណភាពឆ្នេរ រក្សាទុកជាឆ្នេរសាធារណៈរបស់ប្រជាពលរដ្ឋទូទៅមកទស្សនាកម្សាន្ត៕