មន្ត្រីអ្នកនាំពាក្យកងរាជអាវុធហត្ថលើផ្ទៃប្រទេសឱ្យដឹងថា សមត្ថកិច្ចមួយចំនួនដែលសង្ស័យថា ពាក់ព័ន្ធការធ្វើទារុណកម្មយកចម្លើយពីតំណាងសកម្មជនដីធ្លីនៅក្នុងខេត្តបន្ទាយមានជ័យរហូតដល់ស្លាប់នោះ កំពុងស្ថិតនៅក្នុងការសាកសួរ។
លោក អេង ហ៊ី ប្រាប់វីអូឌីនៅថ្ងៃនេះថា មន្ត្រីដែលសង្ស័យបានប្រព្រឹត្តអំពើហិង្សា និងធ្វើទារុណកម្មរហូតដល់ស្លាប់ អ្នកតវ៉ារឿងដីធ្លី និងមួយចំនួនទៀតមានស្លាកស្នាមនៅជាប់ខ្លួន កំពុងស្ថិតនៅក្នុងការសាកសួរពីក្រុមមន្ត្រីជំនាញចុះស៊ើបអង្កេត។
លោកបន្តថា៖ «ករណីបើសិនជាគាត់ល្មើសច្បាប់មែន ប្រើហិង្សាមែនគឺទទួលទោសទៅតាមច្បាប់ទៅ។ អាហ្នឹងគឺយើងបានអប់រំហើយ ហើយលោកឧត្តមសេនីយ៍លើផ្ទៃប្រទេសបានដាក់វិធានការមួយចំនួនដើម្បីរឹតបន្តឹងវិន័យកងរាជអាវុធហត្ថឱ្យគោរពតាមវិជ្ជាជីវៈ និងក្រមសីលធម៌របស់ខ្លួន»។
បើតាមលោក អេង ហ៊ី ការបន្តនីតិវិធីត្រួតពិនិត្យនេះ គណៈកម្មការចំពោះកិច្ច បានចាប់ផ្ដើមការងាររបស់ខ្លួន តាំងពីថ្ងៃទី១៣ ខែមករា មកម្ល៉េះ។ ទោះជាបែបណា ការសាកសួរនេះ លោក អេង ហ៊ី នៅមិនទាន់អាចកំណត់បានទេថា នឹងត្រូវបិទបញ្ចប់នៅពេលណានោះដែរ។
មកដល់ពេលនេះ មានគណៈកម្មការចំនួន ២ហើយដែលត្រូវបានបង្កើតឡើង ដើម្បីបើកការស៊ើបអង្កេតលើរឿងក្ដីព្រហ្មទណ្ឌនេះ។ គណៈកម្មការថ្នាក់ជាតិប្រឆាំងការធ្វើទារុណកម្ម ដែលសមាសភាពភាគច្រើនមកពីក្រសួងមហាផ្ទៃ កំពុងបើកការស៊ើបអង្កេតដែរ។ លោក តុប សុភី ប្រធានផ្នែកនីតិកម្ម និងជំនួយផ្នែកច្បាប់ បានប្រាប់ថា ការស៊ើបអង្កេតនេះ មិនដឹងចប់នៅពេលណានោះទេ។ ប៉ុន្តែ លោកបញ្ជាក់ថា ក្រោយបញ្ចប់ការស្រាវជ្រាវ នឹងបញ្ជូនរបាយការណ៍ឱ្យស្ថាប័នជំនាញ និងរដ្ឋាភិបាលធ្វើសេចក្ដីសម្រេច។
លោកនាយករដ្ឋមន្ត្រី ហ៊ុន សែន បានបញ្ជាឱ្យមន្ត្រីរបស់លោក ត្រូវចាត់ការរឿងនេះឱ្យបានច្បាស់លាស់។លោក ហ៊ុន សែន ក៏បានព្រមានទៀតថា នឹងមិនផ្ដល់ឱកាសឱ្យអ្នកប្រព្រឹត្តិបទល្មើសរួចផុតពីនីតិវិធីតុលាការឡើយ។
ថ្លែងនៅចំពោះមុខអ្នកកាសែត កាលពីថ្ងៃទី១៤ ខែមករា នៅកោះពេជ្រ លោកនាយករដ្ឋមន្ត្រី បានហៅករណីនេះថា ជាទម្រង់ធ្ងន់ធ្ងរ ដែលវាមិនសាកសមទៅនឹងអង្គហេតុ ដែលគួរត្រូវបានធ្វើទារុណកម្មបែបនេះឡើយ។
លោកបន្តថា៖ «ចាត់តាំងគណៈកម្មការស្រាវជ្រាវបន្ទាន់លើបញ្ហាដែលថា មានមនុស្សស្លាប់នៅខេត្តបន្ទាយមានជ័យ ដោយសារការធ្វើទារុណកម្ម។ ប្រសិនបើយ៉ាងដូច្នោះមែន អ្នកដែលធ្វើឱ្យគេមានរបួសស្នាមរហូតដល់ស្លាប់ ត្រូវតែចាប់មកផ្ដន្ទាទោសឱ្យខាងតែបាន ដោយមិនមានការអត់ឱនទេ » ។
កាលពីថ្ងៃទី១៣ ខែមករា កងរាជអាវុធហត្ថលើផ្ទៃប្រទេស បានបង្កើតគណៈកម្មការចំពោះកិច្ច ដើម្បីស្រាវជ្រាវ និងស៊ើបអង្កេត លើសំណុំរឿងនេះ។ នៅក្នុងសេចក្ដីសម្រេចនេះ គណៈកម្មការចំពោះកិច្ចដែលមានសមាសភាព ៥រូប សុទ្ធតែយកចេញពីមន្ត្រីកងរាជអាវុធហត្ថលើផ្ទៃប្រទេស។
មន្ត្រីសមាគមអាដហុក (Adhoc) លោក ស៊ុំ ចន្ទគា បានប្រាប់ថា តំណាងសកម្មជនដីធ្លីដែលបានដាក់ពាក្យបណ្ដឹង ប្រឆាំងមន្ត្រីកងរាជអាវុធហត្ថខេត្តបន្ទាយមានជ័យ នឹងត្រូវគណៈកម្មការចំពោះកិច្ច កោះហៅឱ្យធ្វើសក្ខីកម្មនៅព្រឹកថ្ងៃទី១៦ ខែមករា។
យ៉ាងនេះក្ដី អ្នកស្រី ប៊ុយ គីមឡាក់ ប្រពន្ធលោក ទុយ ស្រស់ បដិសេធក្នុងការធ្វើអត្ថាធិប្បាយ អំពីនីតិវិធីដែលគណៈកម្មការចំពោះកិច្ច កំពុងតែកសាងសំណុំរឿង ដើម្បីស្វែងរកការពិតនេះ។ អ្នកស្រីបញ្ជាក់យ៉ាងខ្លីថា មិនបានស្ថិតនៅក្នុងហេតុការណ៍នៃការធ្វើទារុណកម្មដោយផ្ទាល់។ ក្នុងន័យនេះ បើតាម គីមឡាក់ វាពិតជាពិបាកនិយាយថា សប្បាយចិត្ត ឬជំទាស់ទៅនឹងនីតិវិធីរបស់មន្ត្រីជំនាញនេះណាស់។
អ្នកស្រីបន្តថា៖ «បងអើយបង ដូចបានប្រាប់បងឯងអ៊ីចឹង។ ខ្ញុំវាមិនបានឃើញប្ដីច្បាស់លាស់ណាបង។ ខ្ញុំមិនដឹងថា ត្រូវគិតយ៉ាងម៉េច » ។
ទាក់ទិនសំណុំរឿងនេះ លោក ស៊ុំ ចន្ទគា បានសរសេរនៅលើបណ្ដាញទំនាក់ទំនងសង្គមហ្វេសប៊ុក នៅថ្ងៃទី១៥ ខែមករា ថា អាជ្ញាធរបានផ្ដល់លុយជាបន្តបន្ទាប់ឱ្យប្រពន្ធលោក ទុយ ស្រស់។ ប្រភពដដែលបញ្ជាក់ទៀតថា នៅថ្ងៃទី១ ខែមករា អាជ្ញាធរបានចូលបុណ្យ ១លានរៀល ហើយថ្ងៃទី២ ចូលលុយចំនួន ១០លានរៀលទៀត។
បើតាមលោក ចន្ទគា ចុងក្រោយនេះទៀត អ្នកស្រីទទួលលុយចំនួន ១ម៉ឺន ៥ពាន់ដុល្លារទៀត ដើម្បីដោះបំណុលធនាគារ។ បើទោះជាបែបណា លោក ស៊ុំ ចន្ទគា ចាត់ទុកថា តើចំនួនទំហំទឹកប្រាក់នេះ អាចចាត់ទុកបានថា ជាបទល្មើសសូកប៉ាន់សាក្សី និងរារាំងមិនឱ្យប្ដឹង ក្នុងសំណុំរឿងព្រហ្មទណ្ឌ។
កាលពីថ្ងៃទី២៨ ខែធ្នូ ឆ្នាំ២០១៩ ប្រជាពលរដ្ឋប្រមាណ២០០នាក់ តំណាងឱ្យ៦០០គ្រួសារ មកពីឃុំចង្ហារ ស្រុកអូរជ្រៅ ខេត្តបន្ទាយមានជ័យ តវ៉ានៅមុខសាលាខេត្តក្នុងជម្លោះដីធ្លី បន្ទាប់សមត្ថកិច្ចចាប់តំណាងរបស់ពួកគាត់៥នាក់ឃុំខ្លួន។ លុះរហូតដល់ថ្ងៃទី១ ខែមករា ឆ្នាំ២០២០ តំណាងម្នាក់ក្នុងតំណោមនោះ ឈ្មោះ ទុយ ស្រស់ បានស្លាប់ ដោយខេត្តបញ្ជាក់ថា ដោយសារតែបញ្ហាញៀនស្រា អ្នកជាប់ឃុំជាមួយអះអាងថា បានឃើញផ្ទាល់ភ្នែកករណីវាយធ្វើទារុណកម្មពីកម្លាំងសមត្ថកិច្ច។
កាលពីថ្ងៃទី១២ ខែមករា អ្នកជាប់ឃុំ៣នាក់ ក្នុងចំណោម៤នាក់ ដែលសមត្ថកិច្ចចាប់ខ្លួនជាមួយលោក ទុយ ស្រស់ នោះ បានដាក់ពាក្យប្តឹង ចោទប្រកាន់ថា មន្ត្រីកងរាជអាវុធហត្ថខេត្តបន្ទាយមានជ័យ បានធ្វើទារុណកម្មពួកគាត់យកចម្លើយ។