តំណាងអាជីវករជាម្ចាស់តូបលក់ដូរលើឆ្នេរអូរត្រេះ ខេត្តព្រះសីហនុ ប្រមាណជាង៦០តូប បានបង្ហាញអំពីក្ដីបារម្ភ ប្រហាក់ប្រហែលគ្នាថា ការសម្រេចរបស់រដ្ឋបាលខេត្តឱ្យពលរដ្ឋរុះរើតូបលើឆ្នេរចេញដោយគ្មានសំណង ឬដោះដូរទីតាំងលក់ដូរថ្មី ជាការសម្លាប់ពលរដ្ឋដោយប្រយោល តាមរយៈរូបភាពវាយបំបែកឆ្នាំងបាយ។
អាជីវករជាម្ចាស់តូបលក់ដូរនៅឆ្នេរអូរត្រេះ អ្នកស្រី យិន សីម៉ា បានបញ្ជាក់ថា អ្នកស្រីបានប្រកបរបរជាអ្នកលក់ដូរនៅឆ្នេរមួយនេះប្រមាណ១០ឆ្នាំមកហើយ ដោយទិញបន្តពីម្ចាស់ដើមចំនួន២តូប ក្នុង១តូបតម្លៃ៦ម៉ឺនដុល្លារ។ អ្នកស្រីថា ការចេញសេចក្ដីប្រកាសព័ត៌មានរបស់អាជ្ញាធរខេត្ត តម្រូវឱ្យអាជីវករលក់ដូរលើឆ្នេរអូត្រេះរុះរើតូបចេញដោយគ្មានសំណង ឬដោះដូរទីតាំងប្រករបរនៅកន្លែងថ្មី ហាក់សម្លាប់ពលរដ្ឋទាំងរស់។
ម្ចាស់តូបរូបនេះអះអាងថា ការបាត់បង់តូប មិនត្រឹមបញ្ចប់មុខរបររបស់គ្រួសារអ្នកស្រី មិនអាចរកចំណូលរំលោះបំណុលធនាគារខ្ចីទិញតូបទេ តែបុគ្គលិកអ្នកស្រីប្រមាណ២០នាក់ទៀតក៏ត្រូវរងបញ្ហា បាត់បង់ការងារ គ្មានប្រាក់ផ្គត់ផ្គង់ការរស់នៅរបស់គ្រួសារពួកគេបានដែរ។
អ្នកស្រី យិន សីម៉ា បានរៀបរាប់ថា៖ «ពួកខ្ញុំស្នើទៅគាត់ [អភិបាលខេត្តព្រះសីហនុ] ៤ដងហើយ សុំជួបគាត់ផង និងដាក់ពាក្យសុំអន្តរាគមន៍ពីខេត្តផង។ ប៉ុន្តែ គាត់នៅតែកាន់គោលការណ៍គាត់ដដែល ថាគាត់នឹងរុះរើរដោយមិនមានដំណោះស្រាយ។ យើងមិនមែនថា យើងអត់រុះរើ យើងមិនមែនជាប្រជាជនដែលចង់បង្កការលំបាកដល់គាត់ទេ យើងសុំឱ្យតែមានផ្លូវរស់ កុំបំបែកឆ្នាំងបាយយើងចោល ហើយវាអត់មានដំណោះស្រាយ ហើយយើងមិនដឹងថា ទៅធ្វើអីទៀត»។
អាជីករនៅឆ្នេរអូត្រេះមួយរូបទៀត អ្នកស្រី ជា សុវណ្ណ បានអះអាងថា ដំណឹងនៃការរើតូបដោយគ្មានសំណង បានធ្វើឱ្យអ្នកស្រីគិតច្រើន ស្ទើរវង្វេងស្មារតី ព្រោះអ្នកស្រីនៅជំពាក់ធនាគារ ហើយគ្មានជម្រើសមុខរបរផ្សេងទៀត។ អ្នកស្រីថា ទង្វើអាជ្ញាធរពេលនេះ ហាក់បន្ថែមបញ្ហាត្រួតលើទុក្ខរបស់ពលរដ្ឋដែលរងគ្រោះបាត់ចំណូល ព្រោះវត្តមានជនជាតិចិនក្នុងខេត្តព្រះសីហនុកន្លងមក។
អ្នកស្រី ជា សុវណ្ណ បានបញ្ជាក់បន្ថែមថា៖ «តាំងពីចិនចូលមក ជ្រួលច្របល់ អត់មានភ្ញៀវខ្មែរទេ បរទេសក៏អត់មានទៀត។ ខ្ញុំអត់ដឹងធ្វើអ្វីទេ ព្រោះឥលូវអត់មានកន្លែងផង ដឹងធ្វើអី? ឥលូវកំពុងពិបាកចិត្ត ដឹងគិតធ្វើអី? ព្រោះយើងអត់មាន។ បើសិនយើងមានកន្លែងលក់ដូរ មានតូបក្នុងផ្សារ យើងអាចលក់ក្នុងផ្សារបាន ដល់យើងអត់មាន យើងសំអាងតែកន្លែងហ្នឹង [តូបលក់ដូរនៅឆ្នេរអូត្រេះ] ហើយ។ នឹកឃើញថា យើងលក់នៅកន្លែងហ្នឹងយូរហើយ មើលទៅវាមិនអ៊ីចឹងណា៎។ ខ្ញុំសំណូមពរឱ្យគាត់ [អភិបាលខេត្ត] ជួយ បើថាគាត់រៀបចំអភិវឌ្ឍន៍ ក៏អភិវឌ្ឍចុះ ប៉ុន្តែ សុំឱ្យគាត់ពង្រួញឱ្យតូច ឱ្យពួកខ្ញុំបានតែមួយរស់ៗក៏បានដែរ»។
សេចក្ដីប្រកាសព័ត៌មានរបស់រដ្ឋបាលខេត្តព្រះសីហនុ កាលពីថ្ងៃទី១៣ ខែមករានេះ បានបញ្ជាក់ថា អាជ្ញាធរខេត្តស្នើឱ្យពលរដ្ឋដែលលក់ដូរលើឆ្នេរអូរត្រេះ០១ និងអូរត្រេះ០២ ត្រូវរុះរើតូប រោង និងស្តង់ចេញពីទីតាំងលក់ដូរលើឆ្នេរបច្ចុប្បន្ន ស្របតាមសេចក្ដីជូនដំណឹងកាលពីថ្ងៃទី៤ ខែធ្នូ ឆ្នាំ២០១៩ ត្រូវរើឱ្យអស់អំឡុងពេល៧ថ្ងៃ។ បើពលរដ្ឋមិនព្រមរើ ខេត្តចាត់វិធានការរដ្ឋបាលចុះរុះរើ ហើយមិនទទួលខុសត្រូវចំពោះការខូចខាត ឬបាត់បង់ទ្រព្យសម្បត្តិឡើយ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានសំណូមពរឱ្យពលរដ្ឋជាអាជីវករព្យាយាមស្វែងយល់ពីការលំបាករបស់ខេត្ត និងប្រយោជន៍រួមរបស់សាធារណជន ជាជាងសុំអាជ្ញាធរខេត្តឱ្យយល់ពីការលំបាករបស់អាជីវករតែម៉្យាង។ លោកថា ការលក់ដូររបស់អាជីវករនៅលើឆ្នេរអូត្រេះ ជាទង្វើខុសច្បាប់ សង់រំលោភដីសាធារណៈរបស់រដ្ឋ ទោះក្រុមអាជីវករបានបង់ប៉ាតង់ និងតម្លៃភាស៊ីជូនរដ្ឋបាលខេត្តកន្លងមកក្ដី។
លោក ឃាង ភារម្យ បានអះអាងថា៖ «បើពាក់ព័ន្ធថាជាដំណោះស្រាយ ថាជាគោលការណ៍? ខ្ញុំក៏មិនដឹងថាត្រូវបកស្រាយយ៉ាងម៉េច? ក្នុងនាមជាអ្នកនាំពាក្យ។ ព្រោះនេះវាពាក់ព័ន្ធនឹងការសម្រេចរបស់អ្នកដឹកនាំ។ អ៊ីចឹង ខ្ញុំក៏មិនអាចបកស្រាយអីច្រើនលើសពីហ្នឹងដែរ អាហ្នឹងខ្ញុំទុកលទ្ធភាពជូនថ្នាក់ដឹកនាំសម្រេចបន្ត»។
អ្នកសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជាប សុធារី បានថ្លែងថា ដើម្បីភាពយុត្តិធម៌ អ្នកស្រីស្នើថ្នាក់ដឹកនាំខេត្តព្រះសីហនុគ្រប់គ្រងតំបន់ឆ្នេរសមុទ្រក្នុងខេត្តដោយស្មើភាពគ្នា កុំប្រគល់សិទ្ធឱ្យអ្នកមាន មានសិទ្ធអាចគ្រប់គ្រងជាលក្ខណៈឯកជន ឯពលរដ្ឋក្រីក្របែរក្លាយជាជនរងគ្រោះព្រោះអ្នកមានលុយ និងអំណាច។ អ្នកស្រីថា ដើម្បីបញ្ចៀសបញ្ហាច្រំដែល រដ្ឋត្រូវគ្រប់គ្រងតំបន់ឆ្នេរដោយខ្លួនឯង ហើយបង្ហាញទីតាំងត្រូវអភិវឌ្ឍន៍ទាំងអស់ក្នុងខេត្តទាំងអស់ជាសាធារណៈ ការពារកុំឱ្យពលរដ្ឋក្រីក្រចាញ់បោកការផ្សព្វផ្សាយព័ត៌មានមិនពិត។
អ្នកស្រី ជាប សុធារី បានលើកជាចម្ងល់ថា៖ «ហេតុអ្វីបានជាជនបរទេសជិះកប៉ាល់ហោះឆ្លងសមុទ្រមក អាចអាស្រ័យផល ធ្វើសំណង់អគារលិចៗក្បាលបាននៅជាប់ឆ្នេរសមុទ្រ ហើយកន្លែងខ្លះទៀតបានរហូតដល់ប្លង់កម្មសិទ្ធសង់អគារប៉ុនៗណាណីទៀត។ ចុះហេតុអី ឆ្នេរតែប៉ុន្មានម៉ែតដែលមានតូបចំនួនតែ៦២តូប ហេតុអ្វីបានជាគាត់មិនអាចប្រកបមុខរបរស្របច្បាប់នៅទីនេះបាន?»។
សេចក្ដីប្រកាសព័ត៌មានរបស់រដ្ឋបាលខេត្តព្រះសីហនុ កាលពីថ្ងៃម្សិលមិញ បានបញ្ជាក់ថា សម្រាប់ការសម្អាតទីតាំងលក់ដូរនៅតំបន់ឆ្នេរកន្លងមក អាជីវករលក់ដូរនៅលើឆ្នេរអូរឈើទាល (អតីតឆ្នេរអារីស្តុន) ចំនួន១៦២តូប បានចូលរួមរុះរើរទីតាំងប្រកបអាជីវកម្មរបស់ពួកគេរួចរាល់ហើយ ដោយគ្មានការតវ៉ា ឬបង្កអំពើហិង្សាឡើយ នៅតែអ្នកលក់ដូរមួយចំនួននៅឆ្នេរអូរត្រេះប៉ុណ្ណោះ។
ការចុះរុះរើតូបលក់ដូរនៅតំបន់ឆ្នេរខាងលើ ត្រូវរដ្ឋបាលខេត្តព្រះសីហនុលើកឡើងថា ដើម្បីរៀបចំសណ្ដាប់ធ្នាប់ របៀបរៀបរយ កែលម្អសោភ័ណភាពឆ្នេរ ទុកជាសម្បត្តិសាធារណៈរួមរបស់ពលរដ្ឋខ្មែរទូទៅមកកម្សាន្ត៕
