បណ្ដាញសហគមន៍ព្រៃព្រះរកានៅក្នុងខេត្តព្រះវិហារ អះអាងថា ប្រភេទឈើកម្រជាង២០ដើមដែលត្រូវបានជ្រើសរើសបំបួសតាមពិធីសាសនាដើម្បីឱ្យបញ្ឈប់ការកាប់ព្រៃក្នុងតំបន់អភិរក្សនេះ ក្នុងរយៈពេល៣ឆ្នាំមកនេះ ត្រូវចោរលួចកាប់អស់សល់តែ១១ដើមប៉ុណ្ណោះ។
សមាជិកម្នាក់នៃបណ្ដាញសហគមន៍ព្រៃព្រះរកា ខេត្តព្រះវិហារ លោក កែវ ពេជ្យ បានបញ្ជាក់ថា សកម្មភាពបំបួសដើមឈើលើកទី៤ រយៈពេលបីថ្ងៃ ពីថ្ងៃទី១០ រហូតថ្ងៃទី១២ ខែមករាកន្លងមក នៅតំបន់អូជញ្ជាំង ស្ថិតក្នុងឃុំម្លូរព្រៃមួយ ស្រុកឆែប ខេត្តព្រះវិហារ បានប្រព្រឹត្តិទៅយ៉ាងរលូន ដោយមានអ្នកចូលរួមទាំងអាជ្ញាធរ និងមន្ត្រីអង្គការសង្គមស៊ីវិល ប្រមាណ៣០០នាក់។
លោកបញ្ជាក់ថា ពិធីឆ្នាំនេះ សហគមន៍បំបួសបានដាំដើមថ្មីចំនួន៧ដើមបន្ថែមទៀត គឺដើមឈើទាលចំនួន៥ដើម និងដើមត្បៀក២ដើម តំណាងឱ្យព្រៃផ្សេងៗទៀត ដើម្បីបួងសួងឱ្យបញ្ឈប់ការកាប់បំផ្លាញ។
នៅក្នុងពិធីនេះ ពលរដ្ឋជ្រើសរើសបំបួសតែប្រភេទដើមឈើណាដែលជិតផុតពូជ ហើយមានទំហំធំៗប៉ុណ្ណោះ ជាក់ស្តែងដើមឈើទាលមួយ ដែលត្រូវបំបួសនាឆ្នាំថ្មីនេះ មានទំហំរហូតប្រមាណ៩ម៉ែត្រ។ ប៉ុន្តែ ដើមទាំងអស់ដែលសហគមន៍អាចថែរក្សាបាន តាមរយៈពិធីបំបួស មានតែ១១ដើមទេ ព្រោះមានអ្នកលួចកាប់អស់ខ្លះ។
លោក កែវ ពេជ្យ ៖ «ស្ថានភាពព្រៃព្រះរកាពីមុន និងឥលូវ វាខុសគ្នាឆ្ងាយណាស់ វាចង់ដាច់ពូជអស់ហើយហ្នឹង។ បើដើមគគីវិញ វាចង់ដាច់ពូជអស់ហើយ នៅតែដើមតូចៗទេ អាមុខកាត់៨តឹកអី គេកាប់អស់ហើយ។ ដើមឈើដែលបំបួសលើកទី១ហ្នឹង គេកាប់ តែអ្នកដែលលួចកាប់ហ្នឹង រងគ្រោះថ្នាក់។ វាធ្វើឱ្យអ្នកកាប់ហ្នឹងមានបញ្ហា ដឹកឈើទៅក៏ធ្វើឱ្យគោយន្តហ្នឹងក្រឡាប់ ហើយគ្រោះថ្នាក់ដល់អ្នកដែលប្រព្រឹត្តិហ្នឹង»។
ក្នុងពិធីបំបួសនេះ ក្រៅពីធ្វើពិធីតាមបែបសាសនា សូមឱ្យវត្ថុស័ក្តិសិទ្ធិជួយរក្សាព្រៃនៅក្នុងតំបន់នោះ ប្រជាសហគមន៍ក៏បានដាក់បណ្ដាសារដល់អ្នកកាប់ផងដែរ។
ព្រៃព្រះរកាជាព្រៃស្ថិតនៅតំបន់ដែលប្រជុំដោយស្រុកចំនួនបី គឺស្រុកឆែប ស្រុកជាំក្សាន្ត និងស្រុកត្បែងមានជ័យ នៃខេត្តព្រះវិហារ មានទំហំ៩៣៦១ហិកតា ជាព្រៃធំទី២របស់ប្រទេសកម្ពុជា បន្ទាប់ពីព្រៃឡង់ នៅក្នុងខេត្តកំពង់ធំ។ ព្រៃនេះត្រូវរដ្ឋាភិបាលប្រកាសបង្កើតជាដែនជម្រកសត្វព្រៃកាលពីខែឧសភា ឆ្នាំ២០១៦ ដើម្បីការពារធនធានធម្មជាតិ និងរក្សាជាជម្រកដល់សត្វដែលរងការគំរាមកំហែងជាង២៨ប្រភេទផ្សេងទៀត ដូចជា ត្រយងយក្ស ច្រយ៉ងចង្កំកស ទោចមកុដ រមាំង និងទន្សោង ជាដើម៕
