សង្គមស៊ីវិលធ្វើការលើវិស័យការងារនៅកម្ពុជា ជំរុញឱ្យរដ្ឋាភិបាលពង្រឹងប្រសិទ្ធភាពអធិការកិច្ចសំណង់របស់មន្រ្តីពាក់ព័ន្ធ ដែលពួកគេមើលឃើញថា នេះជាមូលហេតុចម្បងដែលបណ្តាលឱ្យកើតមានហេតុការបាក់រលំអគារសម្លាប់មនុស្សបន្តបន្ទាប់។
ការលើកឡើងបែបនេះ គឺធ្វើឡើងក្នុងសន្និសីទសារព័ត៌មានដែលរៀបចំឡើងដោយអង្គការសម្ព័ន្ធសហជីពកម្មករសំណង់ និងព្រៃឈើ និងមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថាសង់ត្រាល់ កាលពីព្រឹកថ្ងៃនេះ នៅឯទីស្នាក់អង្គការសង់ត្រាល់។
ប្រធានសម្ព័ន្ធសហជីពកម្មករសំណង់ និងព្រៃឈើ លោក សុខ គីន បានថ្លែងអំឡុងពេលនោះថា មូលហេតុនៃការបាក់រលំសំណង់អគារកន្លងមក គឺបណ្តាលមកពីកម្សោយនៃប្រសិទ្ធភាពការចុះអធិការកិច្ចរបស់មន្រ្តីក្រសួងរៀបចំដែនដី និងការងារ។
លោកបន្ថែមថា រដ្ឋាភិបាលកម្ពុជា និងក្រសួងពាក់ព័ន្ធ គួរយកចិត្តទុកដាក់ពង្រឹងលើកិច្ចការងារនេះដែលមានចែងក្នុងច្បាប់ ដើម្បីបញ្ជៀសហេតុការសោដនាដកម្មកុំឱ្យកើតឡើងតទៅទៀត។
លោក សុខ គីន ៖«ខ្ញុំមិនដឹងថាក្រសួងដែនដីហ្នឹងគាត់ចុះអធិការកិច្ចនៅកម្រិតណាទេ ដែលនៅក្នុងអគារដែលសាងសង់ផ្សេងៗហ្នឹង? បាទព្រោះអាហ្នឹងវាជានីតិវិធីមួយដែលអធិការកិច្ចការងារគេមានវិធីសាស្រ្តរបស់គេក្នុងអធិការកិច្ចការងារ។ ប៉ិនគ្រាន់ថា ប្រសិទ្ធភាពកម្រិតណា មានប្រសិទ្ធភាពឬគ្មានប្រសិទ្ធភាព យើងមើលឃើញទាំងអស់គ្នា។ ខ្ញុំគិតថាវាមិនសូវមានប្រសិទ្ធភាព»។
មន្រ្តីគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឃុន ថារ៉ូ ជំរុញឱ្យមានការបើកការស៊ើបអង្កេតទៅលើមន្រ្តីពាក់ព័ន្ធការចេញអាជ្ញាបណ្ណសាងសង់ និងអធិការកិច្ចគុណភាពសំណង់ ទាំងថ្នាក់ជាតិរហូតដល់ថ្នាក់ក្រោមជាតិ។
លោក ឃុន ថារ៉ូ ៖«អាហ្នឹងដែលយើងត្រូវការស៊ើបអង្កេតមើលថាតើមន្រ្តីថ្នាក់ក្រោមជាតិហ្នឹង គាត់បានអនុវត្តកាតព្វកិច្ចអនុវត្តច្បាប់ហើយឬនៅ ឬក៏គាត់ស៊ុំក្រលំ ឬឃុបឃិតគ្នា ដើម្បីចេញជាអាជ្ញាបណ្ណសាងសង់ទៅ។ អាហ្នឹងដែលខ្ញុំគិតថាជារឿងសំខាន់ រាជរដ្ឋាភិបាលត្រូវតែមានឆន្ទៈនៅក្នុងការអនុវត្តច្បាប់តាំងពីថ្នាក់ជាតិរហូតដល់ថ្នាក់ក្រោមជាតិ ហើយត្រូវមានវិធានការច្បាប់តឹងរឹង ម៉ឺងម៉ាត់ជាមួយនឹងមន្រ្តី ឬក៏អ្នកដែលមានតួនាទីនៅក្នុងការអនុវត្តកាតព្វកិច្ចរបស់ខ្លួន»។
វីអូឌី មិនអាចទាក់ទងសុំការឆ្លើយតបចំពោះការលើកឡើងរបស់មន្រ្តីសង្គមស៊ីវិលខាងលើ ពីអ្នកនាំពាក្យក្រសួងរៀបចំដែនដី នគររូបនីយកម្ម និងសំណង់ លោក សេង ឡូត និងអនុប្រធានគណៈកម្មការត្រួតពិនិត្យគុណភាពសំណង់ លោក ឡៅ ទិព្វសីហា បានទេនៅថ្ងៃនេះ។
សំណង់អគារកម្ពស់៧ជាន់មួយកន្លែងនៅក្រុងកែប បានបាក់រលំសង្កត់មនុស្សស្លាប់ចំនួន៣៦នាក់ ក្នុងនោះមានកុមារ៦នាក់ និងរបួស២៦នាក់ កាលពីថ្ងៃទី៣ មករា ដោយសារការសង់ខុសបទដ្ឋានបច្ចេកទេស។ ហេតុការនេះ ម្ចាស់សំណង់២នាក់ប្តីប្រពន្ធឈ្មោះ ឯក សារុន និងឈីវ សុធី ត្រូវបានអនុញ្ញាតឱ្យនៅក្រៅឃុំ ហើយគ្មានភាគីពាក់ព័ន្ធណាផ្សេងទៀត ត្រូវបានហៅមកសាកសួរនោះទេ។
លោកនាយករដ្ឋមន្រ្តី ហ៊ុន សែន បានប្រកាសអំឡុងលោកចុះដឹកនាំការរុករកជនរងគ្រោះក្រោមគំនរបាក់បែកនៃអគារនៅថ្ងៃទី៥មករាថា លោកនឹងមិនដកថ្នាក់ដឹកនាំខេត្តចេញពីមុខតំណែង ហើយថា ហេតុការគ្រោះថ្នាក់បែបនេះ មិនមែនកើតមានតែនៅកម្ពុជានោះទេ។
លោក ហ៊ុន សែន ថែ្លងថា៖«នៅប្រទេសនានាដែលបានកើត ដូចសហរដ្ឋអាមេរិក ដួលអគារ តើគេមានដកអភិបាលរដ្ឋគេទេ?»។
ក្រោយកើតឡើងហេតុការនេះ អង្គការសហប្រជាជាតិប្រចាំនៅកម្ពុជា បានប្រកាសលើទំព័រហ្វេសប៊ុករបស់ខ្លួននៅថ្ងៃទី៣មករាថា ប្រព័ន្ធរបស់អង្គការខ្លួនបានត្រៀមខ្លួនរួចជាស្រេចដើម្បីធ្វើការជាមួយរដ្ឋាភិបាលកម្ពុជា និងដៃគូទាំងអស់ដើម្បីកែលំអរស្តង់ដារសំណង់ និងសុវត្ថិភាព។
កាលពីខែមិថុនា ហេតុការស្រដៀងគ្នានេះ បានកើតឡើងម្តងរួចទៅហើយនៅក្រុងព្រះសីហនុ ដោយបង្កឱ្យមនុស្សស្លាប់២៦នាក់ និងរបួសធ្ងន់ស្រាលជាច្រើននាក់។ បន្ទាប់ពីនោះ រដ្ឋាភិបាលបានសម្រេចបង្កើតគណកម្មការអធិការកិច្ចគុណភាពសំណង់ដើម្បីត្រួតពិនិត្យរកសំណង់អគារសាងសង់ខុសស្តង់ដាគុណភាពសុវត្ថិភាពសំណង់ នៅទូទាំងប្រទេស៕
