ពលរដ្ឋ ៣នាក់ ត្រូវបានចាប់ខ្លួន និងគ្រោងបញ្ជូនទៅតុលាការ ក្នុងរឿងទំនាស់ដីធ្លីនៅខេត្តព្រះសីហនុ។ នេះបើតាមការបញ្ជាក់របស់អ្នកនាំពាក្យសាលាខេត្តព្រះសីហនុ ថ្លែងប្រាប់វីអូឌីនៅថ្ងៃនេះ។
កាលពីថ្ងៃទី០៤ ខែមករា អាជ្ញាធរស្រុកព្រៃនប់ ខេត្តព្រះសីហនុ បានចាប់ខ្លួនមនុស្ស ២១នាក់ យកមកសាកសួរនៅអធិការស្រុកព្រៃនប់ បន្ទាប់ពីមានករណីប៉ះទង្គិចគ្នាដោយហិង្សារវាងអាជ្ញាធរ និងប្រជាពលរដ្ឋ នៅភូមិស្មាច់ដែង ឃុំរាម ស្រុកព្រៃនប់ កាលពីថ្ងៃទី០៣ ខែមករា។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ឱ្យដឹងថា សមត្ថកិច្ចស្រុកព្រៃនប់បានសម្រេចឃាត់ខ្លួនមនុស្ស ៣នាក់ ដើម្បីកសាងសំណុំរឿងបញ្ជូនទៅតុលាការ ក្នុងបទចោទ«កាន់ទ្រព្យសម្បត្តិរដ្ឋដោយខុសច្បាប់»។
អ្នកនាំពាក្យរូបនេះបន្តថា ទន្ទឹមនោះ ពលរដ្ឋមួយចំនួនផ្សេងទៀត ត្រូវអនុញ្ញាតឱ្យត្រឡប់ទៅផ្ទះសម្បែងវិញ ហើយលោកថា អាជ្ញាធរខេត្តព្រះសីហនុ នឹងមិនអនុញ្ញាតឱ្យមានការចូលទន្ទ្រានកាន់កាប់ទ្រព្យសម្បត្តិរដ្ឋតទៅទៀតឡើយ។
លោក ឃាង ភារម្យ និយាយថា៖ «បញ្ហានេះមិនមែនជាទំនាស់ដីធ្លីទេ វាជាការចូលទៅកាប់ព្រៃទន្ទ្រានយកដីឧទ្យានជាតិរាម។ ប្រជាពលរដ្ឋជាប់សង្ស័យបីរូប គឺសមត្ថកិច្ចត្រូវរៀបចំបញ្ជូនសំណុំរឿងទៅតុលាការ។ ករណីនេះ ជាការរានដីថ្មី ព្រោះក្រសួងបរិស្ថានបានកំណត់កាត់ឆ្វៀលហ្នឹងរួចរាល់ហើយ ហើយសមត្ថកិច្ចទៅរុះរើខ្ទមនេះ ជាករណីបង្ក្រាបការទន្ទ្រានដីថ្មី»។
ប៉ុន្តែ លោក ភារម្យ មិនបានប្រាប់ឈ្មោះពលរដ្ឋទាំងបីនាក់ដែលត្រូវបានអាជ្ញាធរចាប់ខ្លួនបញ្ជូនទៅតុលាការនោះឡើយ។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ អ្នកស្រី ជៀប សុធារី ឱ្យដឹងថា ពលរដ្ឋទាំង ៣នាក់ដែលត្រូវឃាត់ខ្លួននោះរួមមាន យុវតី ងិន ស្រីពេជ្រ អាយុ ១៧ឆ្នាំ អ្នកនាង គង់ សុធា អាយុ ២៥ឆ្នាំ និងបុរសម្នាក់ទៀតជាខ្មែរឥស្លាមមិនស្គាល់អត្តសញ្ញាណ។
ប្រជាពលរដ្ឋមានបញ្ហាដីធ្លីនៅភូមិស្មាច់ដែងនោះ លោក ភឿន ផៃ ថ្លែងប្រាប់វីអូឌីថា លោកមិនបានដឹងថា ពលរដ្ឋទាំងបីនាក់នោះជានរណាខ្លះទេ ប៉ុន្តែ លោកស្នើឱ្យអាជ្ញាធរដោះស្រាយដីធ្លីជូនពួកគាត់។ លោកបញ្ជាក់ថា អ្នកភូមិ ១៣៤គ្រួសារ បានកាន់កាប់ដីធ្លីសរុបជាង ៣០០ហិកតានៅទីនោះ។
លោក ភឿន ផៃ អះអាងថា កងកម្លាំងចម្រុះខេត្តព្រះសីហនុជាង ១០០នាក់ ដែលមានកម្លាំងនគរបាល អាវុធហត្ថស្រុក បរិស្ថាន ប្រជាការពារភូមិ និងកម្មករក្រុមហ៊ុនឯកជន ចូលទៅបង្ក្រាបប្រជាពលរដ្ឋកាលពីថ្ងៃទី០៣ ខែមករា។ លោកអះអាងបន្តថា អំពើហិង្សាដែលកើតឡើងកាលពីថ្ងៃសៅរ៍ចុងសប្ដាហ៍មុន គឺភាគីខាងក្រុមហ៊ុន និងអាជ្ញាធរ ជាអ្នកបង្កឡើង។
លោក ភឿន ផៃ៖ «ពួកខ្ញុំជាពលរដ្ឋក្រីក្រអត់ដីនៅ អាងអីថា ដីក្រុមហ៊ុន។ យើងស្នើសុំឱ្យអាជ្ញាធរដោះស្រាយជូនពួកយើង។ យើងខ្ញុំមិនត្រូវការហិង្សាឡើយ»។
អ្នកស្រី ជៀប សុធារី បានប្រាប់ថា បច្ចុប្បន្ន ទំនាស់ដីធ្លីនៅភូមិស្មាច់ដែងនេះ ទាមទារឱ្យមានការដោះស្រាយតាមផ្លូវច្បាប់។ អ្នកស្រីបន្តថា ដីឧទ្យានជាតិរាមនេះ កាន់តែរួមតូចទៅៗ ដោយសារការផ្តល់ដីសម្បទានទៅក្រុមហ៊ុន និងការចូលទន្ទ្រានកាន់កាប់ពីសំណាក់ភាគីមួយចំនួនដែលមានទាំងពលរដ្ឋធម្មតា យោធា និងការលក់បន្តគ្នាជាដើម។
អ្នកស្រី ជៀប សុធារី និយាយថា៖ «ករណីទំនាស់ហ្នឹង អាជ្ញាធរគួរណាស់តែព្យាយាមដោះស្រាយតាមផ្លូវច្បាប់ ចៀសវាងប្រើហិង្សានាំឱ្យរបួស និងអាចប៉ះពាល់ដល់អាយុជីវិតមនុស្សថែមទៀត»៕