ធនាគារជាតិនៃកម្ពុជាទទួលស្គាល់ហានិភ័យពីការបាត់បង់ការអនុគ្រោះពន្ធ«អ្វីៗគ្រប់យ៉ាងលើកលែងតែអាវុធ»(EBA) ថាអាចនឹងប៉ះពាល់ដល់សេដ្ឋកិច្ចជាតិ ខណៈនៅតែវាយតម្លៃថា សេដ្ឋកិច្ចឆ្នាំ២០២០នេះនៅតែមានកំណើនក្នុងរង្វង់ ៧ភាគរយដដែល។
ក្នុងរបាយការណ៍ វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៩ និងទស្សនវិស័យឆ្នាំ២០២០ ចេញកាលពីថ្ងៃទី២ ខែមករា ធនាគារជាតិ បានលើកឡើងថា សេដ្ឋកិច្ចឆ្នាំ២០២០របស់កម្ពុជា អាចប្រឈមនឹងបញ្ហាសំខាន់ៗមួយចំនួនដែលរួមមាន ការថយចុះសេដ្ឋកិច្ចចិន និងការបាត់បង់ប្រព័ន្ធអនុគ្រោះពន្ធ EBA ជាដើម។
ធនាគារជាតិក៏បានឱ្យដឹងផងដែរថា បើទោះបីអឺរ៉ុបដក EBA ពីកម្ពុជាក៏ដោយ ក៏កម្ពុជានៅតែរក្សាកំណើននៃការនាំចេញសំលៀកបំពាក់ដដែល ដោយសារតម្រូវការសំលៀកបំពាក់នៅអឺរ៉ុប និងការផ្ដាច់ខ្លួនរបស់អង់គ្លេសពីសហគមន៍នេះ ជាពិសេសគឺការធ្វើកំណែទម្រង់របស់រដ្ឋដែលផ្ដល់អំណោយផលដល់អ្នកវិនិយោគ។
ធនាគារជាតិលើកឡើងថា៖ «ទោះជាយ៉ាងណា កំណើនសេដ្ឋកិច្ចសម្រាប់ឆ្នាំ២០២០ ត្រូវបានរំពឹងថា អាចសម្រេចបានក្នុងរង្វង់៧ភាគរយ ជាមួយនឹងកម្រិតអតិផរណាប្រមាណ២,៣%។ ការរំពឹងទុកនេះ ផ្អែកលើការព្យាករពីការងើបឡើងវិញនៃសេដ្ឋកិច្ចពិភពលោក ដែលនឹងរួមចំណែកផ្ដល់ភាពអំណោយផលដល់ការនាំចេញ វិនិយោគបរទេស និងវិស័យទេសចរណ៍កម្ពុជា ស្របពេលដែលសេដ្ឋកិច្ចទទួលបានលទ្ធផលជាលំដាប់ពីការធ្វើពិពិធកម្មមូលដ្ឋានកំណើន និងការកែទម្រង់ស៊ីជម្រៅសម្រាប់គាំទ្រដល់ការរីកចម្រើននៃសេដ្ឋកិច្ចប្រកបដោយចីរភាព»។
ទោះជាយ៉ាងណាក៏ដោយ កាលពីថ្ងៃទី២៦ ខែធ្នូ មូលនិធិរូបិយប័ណ្ឌអន្តរជាតិហៅកាត់ថា IMF បានចេញរបាយការណ៍មួយដោយបានព្យាការថា កំណើនសេដ្ឋកិច្ចកម្ពុជានឹងរងផលប៉ះពាល់ធ្ងន់ធ្ងរ ដោយថា ការកាត់EBA វានឹងធ្វើឱ្យកំណើនសេដ្ឋកិច្ចថយចុះប្រមាណ៣ភាគរយត្រឹមឆ្នាំដំបូងដែលកាត់នោះ។
មូលនិធិរូបិយវត្ថុអន្តរជាតិ IMF បន្ថែមថា៖ «ការព្យួរ EBA នឹងបន្ថែមចំណាយសម្រាប់នាំចេញរបស់កម្ពុជាលើពន្ធគយនាំចូលអឺរ៉ុបចន្លោះពី ០.១ភាគរយ ដល់ ១២ភាគរយក្នុងឆ្នាំដំបូង ឬបន្ថែមពន្ធគយក្នុងរហូតដល់ជាង ៦០០លានដុល្លារ។ ការយកពន្ធនេះនឹងអាចនាំឱ្យការនាំចេញពីកម្ពុជា ទៅអឺរ៉ុបធ្លាក់ចុះប្រមាណ ១៣ភាគរយទៀតផង។ សេដ្ឋកិច្ចកម្ពុជាក៏នឹងរងផលប៉ះពាល់ដែរនៅពេលដែលកំណើនសេដ្ឋកិច្ចចិនកំពុងដាំក្បាលចុះ នេះនៅមិនទាន់គិតពីនិន្នាការផ្លាស់ប្ដូរទីតាំងរោងចក្រចេញពីកម្ពុជានៅពេលដែលគ្មាន EBAផង»។
សហគមន៍អឺរ៉ុបបានចាប់ផ្តើមនីតិវិធីដែលអាចឈានទៅដល់ការដកហូត EBA កាលពីថ្ងៃទី១២ ខែកុម្ភៈ ឆ្នាំ២០១៩ បន្ទាប់ពីបានលើកឡើងពីការធ្លាក់ចុះនៃលទ្ធិប្រជាធិបតេយ្យ និងការគោរពសិទ្ធិមនុស្សនៅក្នុងប្រទេសកម្ពុជា។
សហគមន៍អឺរ៉ុប បានចេញរបាយការណ៍ស៊ើបអង្កេតអំពីបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជាកាលពីខែវិច្ឆិកា ប៉ុន្តែ មិនត្រូវបានផ្សាយជាសាធារណៈឡើយ ដោយទុកពេលមួយខែឱ្យរដ្ឋាភិបាលកម្ពុជាឆ្លើយតប។
ក្រសួងការបរទេសកម្ពុជាបានបញ្ជាក់កាលពីដើមខែធ្នូនេះថា រាជរដ្ឋាភិបាលបានបញ្ជូនរបាយការណ៍ឆ្លើយតបទៅកាន់សហភាពអឺរ៉ុបរួចហើយ។
កាលពីថ្ងៃទី១១ ខែធ្នូ លោកនាយករដ្ឋមន្ត្រី ហ៊ុន សែន បានប្រកាសថា កម្ពុជាមិនយកអធិបតេយ្យរបស់ខ្លួនទៅដូរនឹង EBA ជាដាច់ខាត ថែមទាំងគំរាមដល់បក្សប្រឆាំងនៅកម្ពុជាផងដែរ ប្រសិនជា EBA ត្រូវបានកាត់នោះ។
លោក ហ៊ុន សែន៖ «ទឹកមាត់អ្នកឯងជាមួយខ្ញុំ ក៏កាត់បន្ថយដែរ មានន័យថា បានរួមចំណែកសម្លាប់ពួកអាប្រឆាំងផ្កាប់មុខតែម្ដង!»
គណៈកម្មការសហភាពអឺរ៉ុប នឹងសម្រេចថា តើត្រូវដក EBA ពីកម្ពុជាឬយ៉ាងណានៅខែកុម្ភៈ ឆ្នាំ២០២០។ បើសិនជាសម្រេចថា ដក EBA មែន សេចក្ដីសម្រេចនោះនឹងចូលជាធរមាននៅខែសីហា ឆ្នាំ២០២០៕