បុគ្គលិកការិយាល័យ៨៧នាក់របស់ក្រុមហ៊ុន ស៊ីន ទ្រី ផ្ទុះការតវ៉ាមុខក្រុមហ៊ុន នៅរាជធានីភ្នំពេញនារសៀលថ្ងៃនេះ បន្ទាប់ពីថៅកែបញ្ឈប់ពួកគេពីការងារដោយមិនបានប្រាប់មូលហេតុច្បាស់លាស់។
បុគ្គលិកការិយាល័យអតិថិជន លោក សុង សូលី ប្រាប់វីអូឌីនៅកន្លែងតវ៉ាថា កាលពីថ្ងៃទី៣០ ខែធ្នូ ឆ្នាំ២០១៩ ក្រុមហ៊ុនបានជូនដំណឹងទៅបុគ្គលិក និងបានបញ្ឈប់បុគ្គលិកផ្នែកការិយាល័យចំនួន៨៧នាក់ភ្លាមៗតែម្ដង។
លោក សុង សូលី រៀបរាប់ថា ការបញ្ឈប់បុគ្គលិកភ្លាមៗបែបនេះធ្វើឱ្យប៉ះពាល់ដល់ជីវភាព និងធ្វើឱ្យពួកគាត់ពិបាករកការងារថ្មីសម្រាប់ធ្វើជាដើម។
លោកថា៖ «វាធ្វើឱ្យប៉ះពាល់ដល់ជីវភាពគ្រួសាររបស់ពួកខ្ញុំទាំងអស់គ្នា ដែលត្រូវមានចំណូលចំណាយប្រចាំថ្ងៃ។ ហើយការបញ្ឈប់ភ្លាមៗអ៊ីចឹង មិនដឹងជាយើងទៅរកការងារអីបានធ្វើភ្លាមៗដែរ»។
បុគ្គលិកផ្នែកការិយាល័យម្នាក់ទៀត លោក ផុន រ័ត្នពិសិដ្ឋ ឱ្យដឹងថា ការបញ្ឈប់ពួកគាត់ភ្លាមៗនេះគឺធ្វើឡើងផ្ទុយពីប្រសាសន៍លោកនាយករដ្ឋមន្ត្រី ហ៊ុន សែន ដែលថា ពេលដកអាជ្ញាប័ណ្ណពីក្រុមហ៊ុននេះគឺត្រូវរក្សាបុគ្គលិកនៅដដែល។
លោក ផុន រ័ត្នពិសិដ្ឋ បន្តថា លើសពីនេះគឺករណីក្រុមហ៊ុនបញ្ឈប់បុគ្គលិកពីការងារនេះគឺផ្តល់សំណងរំលឹកអតីតភាពការងារជូនពួកគាត់តែ៥០ភាគរយប៉ុណ្ណោះ ដែលបុគ្គលិកមិនអាចទទួលយកបានទេ។
លោកបន្ថែមថា៖ «ពួកខ្ញុំទាំងអស់គ្នាសូមឱ្យសម្ដេចតេជោ ហ៊ុន សែន រកយុត្តិធម៌ឱ្យពួកខ្ញុំផង ជួយឱ្យពួកខ្ញុំមានការងារធ្វើវិញ ពីព្រោះពួកគាត់ទាំងអស់ហ្នឹងសុទ្ធតែខ្វះទាំងអស់គ្នា»។
វីអូឌីមិនអាចសុំការឆ្លើយតបពីតំណាងក្រុមហ៊ុន ស៊ីន ទ្រី ជុំវិញបញ្ហានេះ។
កាលពីថ្ងៃទី២២ ខែតុលា ឆ្នាំ២០១៩ លោក ហ៊ុន សែន បានប្រកាសដកសិទ្ធប្រមូលសំរាមរបស់ក្រុមហ៊ុន ស៊ីន ទ្រី មកគ្រប់គ្រងជាបណ្ដោះអាសន្ន ដោយអះអាងថា ដើម្បីជំរុញការធ្វើកំណែទម្រង់ពីការសម្អាតទីក្រុង។ លោក ហ៊ុន សែន បញ្ជាក់ថា ការដកហូតសិទ្ធិពីក្រុមហ៊ុន ស៊ីន ទ្រី មកគ្រប់គ្រងបណ្តោះអាសន្ននេះ គឺរដ្ឋត្រូវគ្រប់គ្រងទាំងសម្ភារ និងបុគ្គលិកទាំងអស់។
លោកមានប្រសាសន៍ថា៖ «រដ្ឋត្រូវយកក្រុមហ៊ុនហ្នឹងមកវិញសិន។ ទាំងបុគ្គលិក ទាំងស្អីៗទូទាត់ឱ្យក្រុមហ៊ុន ស៊ីន ទ្រី។ រដ្ឋត្រូវកាន់កាប់ក្រុមហ៊ុននេះសិន។ ហើយក្រុមហ៊ុន ស៊ីន ទ្រី មានឡានប៉ុន្មាន? អីប៉ុន្មាន? និងបុគ្គលិកប៉ុន្មាន យើងយកមកគ្រប់គ្រងសិន»។
ក្រុមហ៊ុន ស៊ីន ទ្រី បានទទួលសិទ្ធិតែម្នាក់ឯងពីរដ្ឋាភិបាល សម្រាប់ទទួលខុសត្រូវលើការប្រមូលសំរាម សម្អាតទីក្រុង ចាប់ពីឆ្នាំ១៩៩៦មក។
បើតាមលោកនាយករដ្ឋមន្ត្រី ហ៊ុន សែន ការចុះហត្ថលេខាផ្តល់សិទ្ធិឱ្យក្រុមហ៊ុន ស៊ីន ទ្រី ពេលនោះ សំរាមមានតែត្រឹម៥០០តោនប៉ុណ្ណោះក្នុង១ថ្ងៃ រីឯទំហំទីក្រុងភ្នំពេញវិញមានតែជាង៣០០គីឡូម៉ែត្រការ៉េ។ លោកបញ្ជាក់ថា ឥឡូវនេះ សំរាមបានកើនឡើងជាង៣០០០តោនក្នុង១ថ្ងៃ ហើយទំហំទីក្រុងបានកើនឡើងជាង៦០០គីឡូម៉ែត្រការ៉េ។ លោកមានប្រសាសន៍ថា រដ្ឋាភិបាលត្រូវធ្វើកំណែទម្រង់៕
