សាលាដំបូងរាជធានីភ្នំពេញបានសម្រេចចោទប្រកាន់ និងឃុំខ្លួនអតីតអគ្គកុងស៊ុលខ្មែរប្រចាំទីក្រុងគុនមិញ ខេត្តយូណាន ប្រទេសចិន លោក គ្រុយ លឹមហេង ក្រោយអង្គភាពប្រឆាំងអំពើពុករលួយចាប់ និងបញ្ជូនខ្លួនទៅតុលាការកាលពីម្សិលមិញ។
នេះបើតាមអ្នកនាំពាក្យអយ្យការសាលាដំបូងរាជធានីភ្នំពេញ លោក គុជ គឹមឡុង បានឱ្យ VOD ដឹងនៅព្រឹកនេះ។
កាលពីម្សិលមិញ តុលាការបានចេញដីកាសម្រេចឲ្យឃុំខ្លួនលោក គ្រុយ លឹមហេង ដោយចោទប្រកាន់លោកចំនួន ៤បទល្មើស ដែលករណីទី១គឺការបំផ្លាញដោយចេតនា និងគៃបំបាត់ដោយទុច្ចរិត ទី២ រំលោភអំណាច ទី៣ វីតិក្រម និងទី៤ ករណីមិនប្រកាសទ្រព្យសម្បត្តិ និងបំណុល ដែលប្រព្រឹត្តចាប់តាំងពីឆ្នាំ២០១៥ ដល់២០១៩។
VOD មិនអាចទាក់ទងអ្នកនាំពាក្យរដ្ឋបាលសាលាដំបូងរាជធានី លោក សួស វិទ្យារ៉ានឌី និងអ្នកនាំពាក្យក្រសួងការបរទេស លោក កុយ គួង បាននៅឡើយទេ។
កាលពីខែធ្នូ ឆ្នាំ២០១៦ អតីតឯកអគ្គរាជទូតកម្ពុជាប្រចាំប្រទេសកូរ៉េខាងត្បូង លោក ស៊ុត ឌីណា ត្រូវបានសាលាដំបូងរាជធានីភ្នំពេញ កាត់ទោសឲ្យជាប់ពន្ធនាគាររយៈពេលប្រាំឆ្នាំ និងពិន័យជាប្រាក់១០លានរៀល ពីបទរំលោភអំណាច និងបទកេងយកផលប្រយោជន៍ដោយខុសច្បាប់ ក្រោយពីអង្គភាពប្រឆាំងអំពើពុករលួយចាប់បញ្ជូនទៅតុលាការដូចគ្នាកាលពីខែមេសា ឆ្នាំនោះ៕