ជនពិការជាអតីតអ្នកគាំទ្រគណបក្សសង្គ្រោះជាតិ នៅខេត្តសៀមរាប ត្រូវបានមន្ត្រីពន្ធនាគារសម្រេចដោះលែងឱ្យនៅក្រៅឃុំហើយនាវេលាម៉ោងប្រមាណ៣រសៀលថ្ងៃនេះ។
ជនពិការប្រកបរបរជាអ្នកលក់វត្ថុអនុស្សាវរីយ៍នៅខេត្តសៀមរាប លោក ធុន យុទ្ធ បានបញ្ជាក់ថា លោកត្រូវមន្ត្រីពន្ធនាគារសម្រេចដោះលែងឱ្យមានសេរីភាពជួបជុំក្រុមគ្រួសារវិញនាម៉ោងប្រមាណជាង២រសៀល។ លោកថា ស្ថានភាពសុខភាពរបស់លោកហាក់ទ្រុឌទ្រោមបន្តិចដោយសារជំងឺរបេងធ្វើទុក្ខខ្លាំងជាងមុន។ លោកនឹងផ្តើមប្រកបរបរឡើងវិញយ៉ាងរហ័សបំផុត មិនលើសបីថ្ងៃក្រោយចេញពីពន្ធនាគារឡើយ។
លោក ធុន យុទ្ធ បានបញ្ជាក់ថា៖ «បើមិនស្អែក រឺក៏ពីរបីថ្ងៃទៀត ខ្ញុំដើរលក់វិញហើយបង។ អរគុណច្រើន ដែលកន្លងមកមានខាងអង្គការអាដហុក អង្គការលីកាដូ រួមជាមួយUN និងសប្បុរសជនមួយចំនួនដែលបានរួមគ្នាជួយខ្ញុំកន្លងមក»។
សាលាឧទ្ធរណ៍ កាលពីថ្ងៃទី២៧ ខែធ្នូនេះ បានសម្រេចដោះលែងអតីតអ្នកគាំទ្រគណបក្សសង្គ្រោះជាតិរូបនេះឱ្យមានសេរីភាពឡើងវិញ ក្រោយរូបលោកជាប់ពន្ធនាគាររយៈពេលជាង៥ខែ។ លោក ធុន យុទ្ធ ត្រូវសាលាដំបូងខេត្តសៀមរាបកាត់ទោសកាលពីថ្ងៃទី៣១ ខែតុលា ឱ្យជាប់ពន្ធនាគាររយៈពេល១៨ខែ ពីបទ «ញុះញង់ និងជេរប្រមាថជាសាធារណៈ» ព្រោះផ្សព្វផ្សាយសាររិះគន់រដ្ឋាភិបាលតាមបណ្ដាញទំនាក់ទំនងហ្វេសប៊ុក(Facebook)របស់ខ្លួន ដែលបានសរសេរថា «ខ្ញុំចង់បាននាយករដ្ឋមន្ត្រីថ្មី»៕