ក្រសួងរៀបចំដែនដី បដិសេធសំណើសុំអន្តរាគមន៍របស់ប្រជាពលរដ្ឋមួយក្រុមមកពីខេត្តកោះកុង ដែលអះអាងថា ក្រុមហ៊ុនបញ្ជាទិញស្ករអំពៅពីកម្ពុជាមួយ មិនបានផ្តល់សំណងជូនពួកគេតាមការសន្យា។
កាលពីម្សិលមិញនេះ ពលរដ្ឋមានជម្លោះដីធ្លីជាង ១០០នាក់ ដែលអះអាងថា មានគ្នា ២០០គ្រួសារ នៅឃុំជីខលើ ស្រុកស្រែអំបិល បានប្រមូលផ្តុំគ្នានៅមុខក្រសួងរៀបចំដែនដី នគរូបនីយកម្ម និងសំណង់ ដើម្បីជំរុញទៅលោករដ្ឋមន្ត្រី ជា សុផារ៉ា ឱ្យជួយអន្តរាគមន៍ទៅក្រុមហ៊ុនបញ្ជាទិញស្ករអំពីកម្ពុជា «ថេត អែន ឡាល៍ (Tate &; Lyle)» ដែលមានមូលដ្ឋានក្នុងទីក្រុងឡុង (London) ប្រទេសអង់គ្លេស ឱ្យដោះស្រាយសំណងជូនពួកគេ ៦ពាន់ដុល្លារក្នុង១គ្រួសារ ប៉ុន្តែ ត្រូវបានក្រសួងរៀបចំដែនដីបដិសេធ។
ក្នុងសេចក្ដីជូនដំណឹងមួយកាលពីម្សិលមិញនេះ ក្រសួងរៀបចំដែនដី លើកឡើងថា ក្រសួងមិនអាចជួយអន្តរាគមន៍ជូនពលរដ្ឋបានឡើយ ដោយថា ករណីនេះជាវិវាទកិច្ចសន្យា ហើយក្រសួងបានស្នើទៅតំណាងពលរដ្ឋឱ្យដាក់ពាក្យបណ្ដឹងទាមទារតាមផ្លូវច្បាប់វិញ។
អ្នកស្រី អឹម សុខន ដែលអះអាងថា ជាតំណាងពលរដ្ឋ បានបង្ហាញការខកចិត្ត និងអស់សង្ឃឹមទៅលើក្រសួងរៀបចំដែនដី ដែលថា អាណាព្យាបាលមិនអាចជួយដោះស្រាយផលលំបាករបស់ពួកគាត់បាន។
តំណាងពលរដ្ឋរូបនេះ ពុំទាន់អាចសម្រេចថា ធ្វើយ៉ាងណាបន្តទៀតនោះទេ ដោយថា រង់ចាំជួបប្រជុំជាមួយក្រុមប្រជាពលរដ្ឋសិន។
លោក តេង កៅ ដែលអះអាងថា ជាតំណាងពលរដ្ឋដែរនោះ បានរៀបរាប់ថា ប្រជាពលរដ្ឋ ២០០គ្រួសារនៅភូមិចំនួន៤ ស្ថិតក្នុងឃុំជីខលើ មានជម្លោះដីធ្លីជាមួយក្រុមហ៊ុនដាំអំពៅផលិតស្ករសរបស់ថៃមួយឈ្មោះ KSL តាំងពីក្រុមហ៊ុនមួយនេះ ទទួលបានដីសម្បទានសេដ្ឋកិច្ចពីរដ្ឋាភិបាលកម្ពុជានៅក្នុងឆ្នាំ២០០៦ ក្នុងទំហំជិត ២ម៉ឺនហិកតា ដែលដីទាំងនោះ បានប៉ះពាល់ដល់ដីចម្ការ និងដីភូមិទំហំជាង ១ពាន់ហិកតាររបស់ពលរដ្ឋ។
តំណាងពលរដ្ឋរូបនេះ បន្តថា ក្រោមជម្លោះដ៏រ៉ាំរៃរយៈពេល១៤ឆ្នាំ អ្នកភូមិបានធ្វើការតវ៉ាជាបន្តបន្ទប់ ដោយនៅឆ្នាំ២០១៨ ក្រសួងរៀបចំដែនដី បានចុះដោះស្រាយដោយកាត់ដីទំហំជាង ៣០០ហិកតា ជូនពលរដ្ឋ ២០០គ្រួសារវិញ ប៉ុន្តែ លោកថា ខណៈក្រសួងចុះដោះស្រាយជូនពលរដ្ឋនោះ គឺអ្នកភូមិមិនបានទទួលសំណងពីក្រុមហ៊ុន KSL នោះទេ ដោយសារតែក្រុមហ៊ុនទិញស្ករអំពៅពីកម្ពុជាឈ្មោះ ថេត អែន ឡាល៍ (Tate &; Lyle) សន្យាដោះស្រាយសំណងជំនួស។
លោក តេង កៅ ប្រាប់ថា៖ «ពួកយើងនៅតែធ្វើសកម្មភាព រកពិធីសាស្ដ្រតវ៉ាថែមទៀត។ យើងនឹងធ្វើសន្និសីទកាសែតបង្ហាញទៅពិភពលោក ដើម្បីដាក់សម្ពាធទៅក្រុមហ៊ុន ថេត អែន ឡាល៍ ព្រោះក្រុមហ៊ុនបានសន្យាថា សងសំណងពួកខ្ញុំ ចុះហេតុអីពេលនេះមិនសងវិញអ៊ីចឹង?»។
ប្រធានផ្នែកកិច្ចការសាធារណៈនៃក្រុមហ៊ុន ថេត អែន ឡាល៍ អ្នកស្រី Claire Crill បានឆ្លើយតបអ៊ីម៉ែលថា ក្រុមហ៊ុនកំពុងបន្តពិភាក្សាជាមួយតំណាងប្រជាពលរដ្ឋ ប៉ុន្តែ អ្នកស្រីបដិសេធបកស្រាយលម្អិត ដោយថា កិច្ចពិភាក្សានេះ ស្ថិតនៅជាសម្ងាត់នៅឡើយ។
ក្នុងញ្ញត្តិមួយចុះថ្ងៃទី៥ ខែមិថុនា ឆ្នាំ២០១៩ ដែលត្រូវបានដាក់ទៅសហភាពអឺរ៉ុប(EU)ប្រចាំកម្ពុជា ប្រជាពលរដ្ឋក៏បានស្នើទៅឯកអគ្គរដ្ឋទូតសហភាពអឺរ៉ុបប្រចាំកម្ពុជា ឱ្យជួយអន្តរាគមន៍ទៅក្រុមហ៊ុន ថេត អែន ឡាល៍ (Tate &; Lyle) នៅប្រទេសអង់គ្លេស ឱ្យដោះស្រាយសំណងខូចខាតជូនពលរដ្ឋតាមការសន្យាផងដែរ។
មន្ត្រីសម្របសម្រួលស្ដីទីនៅសមាគមអាដហុកប្រចាំខេត្តកោះកុង លោក ប៉ី វ៉ាន់នី ចាត់ទុកករណីក្រសួងបដិសេធមិនជួយអន្តរាគមន៍ទៅក្រុមហ៊ុននោះថា ជាការមិនទទួលខុសត្រូវ និងមិនយកចិត្តទុកដាក់ចំពោះពលរដ្ឋកំពុងជួបទុក្ខលំបាក ក្នុងនាមក្រសួងជាអាណាព្យាបាលរបស់ពលរដ្ឋ។
លោក ប៉ី វ៉ាន់នី និយាយថា៖ «ប្រជាពលរដ្ឋគាត់ទន់ខ្សោយ មិនមានសមត្ថភាពតតាំងក្ដីជាមួយក្រុមហ៊ុន បានពួកគាត់មករកអាជ្ញាធរមានសមត្ថកិច្ច អ្នកមានអំណាចហ្នឹង ដើម្បីជួយដោះស្រាយគាត់ ហើយកាលពួកគាត់ទៅរកអ្នកមានសមត្ថកិច្ចជួយដោះស្រាយហើយ បែរជាបដិសេធ តើឱ្យពួកគាត់ទៅរកអ្នកណាជួយដោះស្រាយវិញ?»៕