លោកនាយករដ្ឋមន្ត្រី ហ៊ុន សែន ក្រើនរំឭកអាជ្ញាធរជាថ្មីទៀត ឱ្យធ្វើការជាមួយម្ចាស់ផ្ទះជួល កុំឱ្យដំឡើងថ្លៃខ្ពស់ ធ្វើឱ្យបាត់ប្រយោជន៍កម្មករដែលទទួលបានបន្ទាប់ពីការឡើងប្រាក់ឈ្នួលសម្រាប់ឆ្នាំក្រោយនេះ។
លោកនាយករដ្ឋមន្ត្រី ហ៊ុន សែន ថ្លែងបែបនេះនៅក្នុងពិធីចែកសញ្ញាបត្រដល់និស្សិតក្នុងរាជធានីភ្នំពេញ នាថ្ងៃព្រហស្បត្តិ៍នេះ។
លោក ហ៊ុន សែន ថ្លែងថា៖ «កម្មករដំឡើងប្រាក់ខែបានតែ ៨ដុល្លារៗ ដល់យើង [ម្ចាស់ផ្ទះជួល] ឡើងដល់ ១០ដុល្លារ។ អ៊ីចឹង វាចាប់ផ្តើមរួញ។ អ៊ីចឹង អាជ្ញាធរនៅតាមមូលដ្ឋានត្រូវធ្វើការជាមួយម្ចាស់ផ្ទះឈ្នួល ដើម្បីធានាថា នៅពេលដែលដំឡើងបៀវត្សទទួលបាននូវផលប្រយោជន៍ពិតប្រាកដ»។
ប្រាក់ឈ្នួលអប្បបរមារបស់កម្មករក្នុងវិស័យកាត់ដេរសម្រាប់ឆ្នាំថ្មី ត្រូវបានរដ្ឋាភិបាលដំឡើង ៨ដុល្លារបន្ថែមទៀត ពោលគឺបានត្រូវបានដំឡើងពីចំនួន ១៨២ដុល្លារ នៅឆ្នាំ២០១៩ ទៅដល់ចំនួន ១៩០ដុល្លារសម្រាប់ឆ្នាំ២០២០ខាងមុខនេះ។
ការក្រើនរំឭករបស់នាយករដ្ឋមន្ត្រីនេះ ធ្វើឡើងក្រោយពីមានកម្មករមួយក្រុមនៅខណ្ឌពោធិ៍សែនជ័យ បានផ្ទុះការតវ៉ាកាលពីសប្តាហ៍មុន ប្រឆាំងទៅនឹងម្ចាស់ផ្ទះជួល ដែលបានជូនដំណឹងពីការដំឡើងថ្លៃឈ្នួលផ្ទះ ១០ដុល្លារបន្ថែមទៀត ចាប់ពីខែមករា ឆ្នាំ២០២០ទៅ។
ប្រធានសហភាពការងារកម្ពុជា លោក អាត់ ធន់ ហៅការអំពាវនាវនេះជាសញ្ញាវិជ្ជមានមួយ បង្ហាញការយកចិត្តទុកដាក់របស់ថ្នាក់ដឹកនាំទៅលើបញ្ហាប្រឈមរបស់កម្មករ។
មេដឹកនាំសហជីពរូបនេះ អះអាងថា កន្លងទៅក៏មានការអំពាវនាវបែបនេះពីថ្នាក់ដឹកនាំដែរ តែលោកថា ការអនុវត្តគ្មានប្រសិទ្ធភាពនោះឡើយ បើទោះបីរដ្ឋាភិបាលមានច្បាប់ស្ដីពីការគ្រប់គ្រងផ្ទះជួលក៏ដោយ។
លោក អាត់ ធន់ ប្រាប់ថា៖ «យើងអំពាវនាវក៏ចេះតែបានហើយ។ បើគ្មានវិធានការ ខ្ញុំគិតថា ភាគីម្ចាស់ផ្ទះមិនអាចធ្វើតាមទេ ពីព្រោះវាអត់មានអីជាកាតព្វកិច្ច ហើយម្យ៉ាងទៀត ការគ្រប់គ្រងវាផ្សេងៗគ្នា រួមទាំងមិនបានចុះបញ្ជីអីត្រឹមត្រូវ ខ្ញុំគិតថា ពិបាក»។
ម្ចាស់ផ្ទះជួយម្នាក់នៅខណ្ឌពោធិ៍សែនជ័យ លោក អៀង អង្គារិទ្ធ ដែលកម្មករធ្លាប់ផ្ទុះការតវ៉ានោះ អះអាងថា លោកគ្មានគម្រោងដំឡើងថ្លៃឈ្នួលបន្ទប់សម្រាប់ឆ្នាំ២០២០ទេ ក្រោយពីបានជួបពិភាក្សាជាមួយអាជ្ញាធរមូលដ្ឋាន។
ប៉ុន្តែ ម្ចាស់ផ្ទះជួលរូបនេះ បញ្ជាក់ថា ការដែលភរិយាលោកជូនដំណឹងទៅកម្មករពីការសុំដំឡើងថ្លៃបន្ទប់ ៥ដុល្លារបន្ថែមនោះ លោកថា ដោយការសាងសង់ផ្ទះជួល លោកបានចំណាយប្រាក់ច្រើន ហើយគ្រួសារលោកត្រូវបង់ការប្រាក់ឱ្យធនាគារផងដែរ។
លោក អៀង អង្គារិទ្ធ បន្តថា៖ «ទី១ គឺយើងបានប្រើទុនយើងបានយកពីធនាគារ អីចឹងធនាគារក៏គេគិតការប្រាក់ពីយើងដែរ មិនមែនគេអត់គិតទេ បាទ! ហើយយើងធ្វើ ហើយយើងធ្វើក៏អត់មានសល់អីដែរ សល់តិចតួចដែលគ្រាន់ថាជាញើសឈាមរបស់យើង ហើយយើងយកមកចាយដើម្បីមើលជំងឺ និងប្រើប្រាស់រាល់ថ្ងៃ ធម្មតាសល់តិចតួចទេ មិនសល់ច្រើនទេ»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា ហៅការក្រើនរំឭកនេះ អាចនឹងគ្មានប្រសិទ្ធភាពដូចពេលកន្លងទៅ បើរដ្ឋាភិបាលគ្មានវិធានការទៅលើមន្ត្រីខិលខូច។
លោក មឿន តុលា បន្តថា បើរដ្ឋាភិបាលទប់ស្កាត់បញ្ហានេះបាន នឹងទាញការគាំទ្រពីកម្មករបានខ្លះវិញ ព្រោះកម្មករភាគច្រើនមានអាយុគ្រប់បោះឆ្នោត ហើយកន្លងទៅ ពួកគេភាគច្រើនគាំទ្រគោលនយោបាយអ្នកនយោបាយប្រឆាំង ដែលលោកថា ក្រុមប្រឆាំងតែងយកចិត្តទុកដាក់សុខទុក្ខកម្មករ។
លោក មឿន តុលា ប្រាប់ថា៖ «កម្លាំងកម្មករហ្នឹងជាកម្លាំងមួយធំ ធ្វើឱ្យមានការផ្លាស់ប្តូរសន្លឹកឆ្នោត។ ប៉ុន្តែ យ៉ាងណាក៏ដោយ ការសន្យាការព្យាយាមធ្វើអីហ្នឹង អត់សូវមានប្រសិទ្ធភាពអីប៉ុន្មានទេ។ ធម្មតាទេ រដ្ឋមួយដឹកនាំដោយប្រព័ន្ធបុគ្គល វាអត់សូវមានប្រសិទ្ធភាពទេក្នុងការឆ្លើយតបទៅនឹងបញ្ហារបស់ប្រជាពលរដ្ឋ»។
យ៉ាងនេះក្ដី អ្នកនាំពាក្យសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា ការសម្របសម្រួលដើម្បីទប់ស្កាត់ការហក់ឡើងខ្ពស់តម្លៃផ្ទះជួលនេះ អាជ្ញាធរបានធ្វើជាហូរហែមកហើយ ប៉ុន្តែ លោកថា វិធានការត្រូវរង់ចាំមើលស្ថានភាពជាក់ស្ដែងថា តើម្ចាស់ផ្ទះជួលសហការជាមួយអាជ្ញាធរបានកម្រិតណា។
លោក ម៉េត មាសភក្ដី ប្រាប់ថា៖ «ជាជំហានដំបូងយើងផ្សព្វផ្សាយ យើងស្នើសុំ បន្ទាប់មកបើកិច្ចការទាំងអស់ហ្នឹងមិនត្រូវបានសហការ បន្ទាប់មកបើយើងទទួលបានព័ត៌មានថា គាត់លួចឡើងថ្លៃឡើងអី យើងនឹងចុះធ្វើកិច្ចអន្តរាគមន៍បន្ទាន់ដែរ»។
បើតាមលោក មឿន តុលា កម្មករក្នុងវិស័យកាត់ដេរ ប្រមាណជា ៦០ភាគរយជួលផ្ទះស្នាក់នៅជិតកន្លែងធ្វើការ និង ៤០ភាគរយទៀត ជួលរថយន្តជិះធ្វើជាមធ្យោបាយទៅធ្វើការ និងត្រឡប់ទៅសម្រាកនៅផ្ទះវិញ។
ប៉ុន្តែ លោកលើកឡើងទៀតថា ជម្រើសទាំងពីរនេះ ពួកគេប្រឈមនឹងបញ្ហាដូចគ្នា ព្រោះពេលរដ្ឋាភិបាលដំឡើងប្រាក់ឈ្នួល ថ្លៃឈ្នួលផ្ទះ និងថ្លៃរថយន្ត បានដំឡើងថ្លៃដូចគ្នា៕