មន្ត្រីខេត្តព្រះសីហនុ អះអាងថា បុគ្គលិកកាស៊ីណូជាជនជាតិខ្មែរដល់ទៅជិត ៨ពាន់នាក់ បានបាត់បង់ការងាររួចទៅហើយ ក្រោយពីរដ្ឋាភិបាលបានសម្រេចបិទអាជីវកម្មល្បែងអនឡាញ ដែលនឹងត្រូវបញ្ចប់ទាំងស្រុងនៅចុងឆ្នាំនេះ។
ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុ លោក យ៉ូវ ខេមរា បានប្រាប់វីអូឌីនៅថ្ងៃនេះថា កាស៊ីណូចំនួន ៧៣កន្លែង កំពុងស្ថិតក្នុងប្រតិបត្តិការអាជីវកម្មរបស់ពួកគេនៅក្នុងខេត្តជាប់មាត់ឆ្នេរសមុទ្រមួយនេះ។
មន្ត្រីរូបនេះ ឱ្យដឹងទៀតថា កាស៊ីណូចំនួន ៤កន្លែង បានសម្រេចបិទប្រតិបត្តិការអាជីវកម្មរបស់ខ្លួនទាំងស្រុង ខណៈកាស៊ីណូចំនួន ២៣កន្លែង បានបញ្ឈប់បុគ្គលិកអស់នៅសល់តែអ្នកយាម ហើយកាស៊ីណូ ៣៣កន្លែងទៀត បានព្យួរការងារបុគ្គលិកបណ្ដោះអាសន្ន។
លោក យ៉ូវ ខេមរា អះអាងថា គិតមកដល់ថ្ងៃនេះ មានបុគ្គលិកជាជនជាតិខ្មែរប្រមាណ ៧៧០០នាក់ហើយ ដែលបាត់បង់ការងារ ព្រោះការបិទអាជីវកម្មហ្គេមអនឡាញ។
លោក យ៉ូវ ខេមរា បានអះអាងថា៖ «មួយចំនួនដែលគាត់មកធ្វើនៅក្នុងវិស័យកាស៊ីណូនេះ ដោយសារប្រាក់បៀវត្សខ្ពស់ជាងអាខាងកាត់ដេរហ្នឹង។ ដល់ពេលកាស៊ីណូគាត់បិទទៅ គាត់ត្រឡប់ទៅកាត់ដេរវិញ ហើយមួយចំនួនទៀត អត់មានបទពិសោធទេ។ អ៊ីចឹង បានគាត់ត្រឡប់ទៅស្រុកកំណើតវិញ។ អាចមួយរយៈ រឺមួយក៏គាត់អាចត្រឡប់មករកការងារធ្វើវិញក៏បាន»។
លោក ខេមរា បានបន្ថែមថា ចំណោមជនជាតិចិនដែលមករស់នៅធ្វើការក្នុងខេត្តព្រះសីហនុ សរុបប្រមាណ ៣ម៉ឺននាក់ ប៉ុន្តែ ពួកគេបានចាកចេញពីកម្ពុជាអស់ប្រមាណ ២៤០០០នាក់ទៅហើយ ឬប្រហែលពី ៧០ភាគរយ ទៅ៨០ភាគរយ។
ក្នុងឆ្នាំ២០១៩នេះ មន្ទីការងារខេត្ត បានទទួលពាក្យបណ្ដឹងទាំងវិវាទរួម និងវិវាទបុគ្គល ចំនួន ១០៥ករណី ក្នុងនោះមួយករណីចុងក្រោយជាទំនាស់ការងាររឿងបិទកាស៊ីណូ ព្រោះថៅកែរត់ចោល។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានអះអាងថា បច្ចុប្បន្ន ថ្នាក់ដឹកនាំខេត្តបានធ្វើសកម្មភាពចុះត្រួតពិនិត្យតាមបណ្ដាទីតាំងនានា ដើម្បីបិទអាជីវកម្មល្បែងអនឡាញទាំងអស់ក្នុងខេត្តត្រឹមម៉ោងសូន្យចុងឆ្នាំ២០១៩នេះហើយ។
លោក ឃាង ភារម្យ បានបន្តថា៖ «សក្តានុពលសេដ្ឋកិច្ចរបស់ខេត្តព្រះសីហនុ គឺមិនមែនតែកាស៊ីណូអនឡាញហ្នឹងទេ។ ដូចដឹងស្រាប់ហើយ សក្តានុពលខេត្តព្រះសីហនុយើងមានកំពង់ផែទឹកជ្រៅ យើងមានតំបន់សេដ្ឋកិច្ចពិសេស ៥កន្លែងកំពុងដំណើរការ ហើយ ៤កន្លែងទៀតកំពុងតែរៀបចំដាក់ឱ្យដំណើរការ ហើយរោងចក្រសហគ្រាសក៏យើងមានច្រើនរាប់រយរោងចក្រ ហើយយើងមានតំបន់ឆ្នេរសមុទ្រ មានកោះ ដែលជាកាលានុវឌ្ឍភាពរបស់ខេត្ត»។
អ្នកសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជាប សុធារី បានអះអាងថា ការសម្រុកចេញរបស់ជនជាតិចិនពីខេត្តព្រះសីហនុនារយៈពេលចុងក្រោយនេះ បានបង្កជាក្ដីបារម្ភជាច្រើនដល់ពលរដ្ឋខ្មែរជាអ្នករកស៊ីជាមួយជនចិន។
អ្នកស្រីថា ម្ចាស់ផ្ទះជួល អគារជួល ម្ចាស់អាជីវកម្មជួលឡាន និងមុខរបរជាច្រើនទៀត បានបាត់ចំណូល និងមិនអាចរកប្រាក់បង់ធនាគារដែលពួកគេបានខ្ចីមកវិនិយោគលើអាជីកម្មខ្លួនជាមួយចិន។
អ្នកស្រី ជាប សុធារី បានរៀបរាប់ថា៖ «បើសិនជាយើងផ្តល់ការវិនិយោគទៅក្រុមហ៊ុនផ្សេងៗ ឬជនបរទេសដែលមកផ្តល់ការងារ ឬក៏ផ្តល់ការវិនិយោគអីនៅស្រុកខ្មែរហ្នឹង សូមឱ្យមានការផ្តល់ការវិនិយោគទៅលើមុខជំនាញអីដែលផ្តល់ចំណេះជំនាញដល់ពលរដ្ឋម្ចាស់ស្រុក»។
អគ្គនាយករងនៃក្រសួងសេដ្ឋកិច្ច និងហិរញ្ញវត្ថុ លោក រស់ ភិរុណ បានបញ្ជាក់ថា អំឡុងឆ្នាំ២០១៩នេះ កម្ពុជាបានផ្តល់អាជ្ញាប័ណ្ណឱ្យឈ្មួញបើកកាស៊ីណូចំនួន ២១៨ ក្នុងចំណោមនោះ អ្នកសុំអាជ្ញាបណ្ណរកស៊ីល្បែងអនឡាញប្រមាណជាង ១០០។
លោកអះអាងថា សម្រាប់របរកាស៊ីណូទាំងវិស័យល្បែង និងមិនមែនល្បែង ក្នុងមួយឆ្នាំបានផ្តល់ចំណូលសរុបប្រមាណ ៨០លានដុល្លារ។
លោក រស់ ភិរុណ បានបន្ថែមថា៖ «មានការប៉ះពាល់ខ្លះដែរ។ ជាធម្មតា អាជីវកម្មមានរបរច្រើនអ៊ីចឹង មានល្បែង Offline (មិនមែននៅលើប្រព័ន្ធអ៊ិនធឺណិត) ផង អនឡាញផងអ៊ីចឹង បើយើងបិទមួយ វាប្រាកដជាបាត់ខ្លះហើយ។ យើងមិនទាន់បានប៉ាន់ប្រមាណនៅឡើយដែរ ព្រោះថា មកដល់ពេលនេះ អាជីវករមួយចំនួន បើតាមខ្ញុំពិនិត្យអង្កេត គាត់ប្រវេរប្រវារងាកមកបង្កើន ឬពង្រឹងរបរ Offline របស់គាត់បន្ថែម។ ដល់អ៊ីចឹងទៅ យើងក៏មិនទាន់នឹងប៉ាន់ស្មានដឹងថា អាចបាត់ ឬក៏មិនបាត់ដែរ»។
កាលពីថ្ងៃទី១៨ ខែសីហាកន្លងមក រដ្ឋាភិបាលកម្ពុជាបានចេញសារាចរណ៍បិទអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៊ិនធឺណិតអនឡាញ ក្នុងនឹងក្រៅប្រទេសគ្រប់រូបភាព។
ការសម្រេចបែបនេះ ក្រោយពិនិត្យឃើញថា មានឧក្រិដ្ឋជនបរទេសមួយចំនួនបានជ្រកក្រោមរូបភាពល្បែងប្រភេទនេះ ធ្វើសកម្មភាពបោកប្រាស់ ជំរិតទារប្រាក់ពីជនរងគ្រោះទាំងក្នុង និងក្រៅប្រទេស ធ្វើឱ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយក្នុងសង្គម៕
