សហជីពអះអាងថា កម្មករប្រមាណ៥០០នាក់ បម្រើការងារនៅរោងចក្រ អេសអ៊ីអ៊ីអេស គ្លូប៊ល (SEES GLOBAL CO.,LTD) ស្ថិតក្នុងស្រុកខ្សាច់កណ្ដាល ខេត្តកណ្ដាល បានបញ្ចប់ការតវ៉ាហើយកាលពីល្ងាចម្សិលមិញ និងព្រមចូលធ្វើការងារវិញនៅថ្ងៃស្អែក បន្ទាប់ពីអាជ្ញាធរពាក់ព័ន្ធអន្តរាគមន៍ទៅថៅកែឱ្យដោះស្រាយជូនកម្មករ។
កាលពីម្សិលមិញ កម្មកររាប់សិបនាក់បម្រើការងារនៅរោងចក្រ អេសអ៊ីអ៊ីអេស គ្លូប៊ល បាននាំគ្នាដើរជាក្បួនចេញពីរោងចក្របម្រុងទៅខុទ្ទកាល័យនាយករដ្ឋមន្ត្រី ដើម្បីសុំអន្តរាគមន៍ពីលោក ហ៊ុន សែន ជួយដោះស្រាយវិវាទការងារជូនពួកគេ ប៉ុន្តែ ការហែរក្បួននោះត្រូវអាជ្ញាធររារាំងឱ្យត្រឡប់ទៅរោងចក្រវិញ ដោយសន្យាជួយដោះស្រាយបញ្ចប់។
ប្រធានសម្ព័ន្ធសហជីពអំណាចយុវជនកម្ពុជា លោក សៀង រិទ្ធី ប្រាប់វីអូឌីថា ក្រុមកម្មករសម្រេចឈប់តវ៉ាហើយនៅថ្ងៃនេះ និងចូលធ្វើការវិញនៅថ្ងៃស្អែក។
ប្រធានសម្ព័ន្ធសហជីពរូបនេះ អះអាងថា ក្រោយមានការសម្របសម្រួលជួយដោះស្រាយពីអាជ្ញាធរពាក់ព័ន្ធរួចមក គឺថៅកែរោងចក្រព្រមទទួលកម្មករទាំងអស់ឱ្យចូលបម្រើការងារនៅរោងចក្រថ្មីទាំងអស់ ដោយរក្សាទុកនូវប្រាក់អតីតភាពការងារ ប្រាប់អត្ថប្រយោជន៍ផ្សេងៗជូនកម្មករទាំងអស់។
លោកបន្ថែមថា៖ «ថៅកែទទួលខុសត្រូវ ដោយគាត់ព្រមសងរំលោះអតីតភាពការងារជូនកម្មករតាមច្បាប់ការងារថ្មីដោយបង់សង៦ខែម្ដងៗ ហើយការព្យួរការងារកម្មករអត់សមស្របក្នុងខែ១២នេះ គឺគាត់ព្រមឱ្យទៅបងប្អូនកម្មករយើង១០០ភាគរយ»។
កម្មការនីផ្នែកដេរម្នាក់ អ្នកស្រី ឆាំ ចាន់នី ដែលអះអាងថា បម្រើការងារនៅរោងចក្រ អេសអ៊ីអ៊ីអេស គ្លូប៊លរយៈពេល៤ឆ្នាំ ប្រាប់វីអូឌីថា រូបអ្នកស្រី និងកម្មករផ្សេងៗទៀតសប្បាយចិត្តទទួលបានការងារធម្មតាវិញ ហើយថៅកែបានសន្យាបើកប្រាក់ឈ្នួលពេញ១០០ភាគរយជូនកម្មករ ខណៈពួកគេសម្រាក១ខែទទួលបាន៥០ភាគរយ។
អ្នកស្រីបន្ថែមថា៖ «ក្រុមកម្មករសប្បាយចិត្តច្រើន ព្រោះយើងមានការងារធ្វើហើយ។ គេដោះស្រាយឱ្យយើង១០០ភាគរយទៀតពេលឈប់១ខែហ្នឹង។ ហើយគេដោះស្រាយឱ្យគ្រប់ចំណុចដែលយើងទាមទារទៀត»។
ប្រធានរដ្ឋបាលរោងចក្រ អេសអ៊ីអ៊ីអេស គ្លូប៊ល (SEES GLOBAL CO.,LTD) លោក ប៊ុន ណារ៉េត មិនអាចសុំការឆ្លើយតបបានទេជុំវិញបញ្ហានេះ ដោយទូរសព្ទចូលច្រើនដងគ្មានអ្នកទទួល។
កម្មការិនីផ្នែកដេរម្នាក់ទៀត អ្នកស្រី ភួង សុធា ប្រាប់វីអូឌីថា ក្រុមកម្មកររោងចក្រ អេសអ៊ីអ៊ីអេស គ្លូប៊ល បានផ្ទុះការតវ៉ាមុខរោងចក្ររយៈពេល១០ថ្ងៃ បន្ទាប់ពីថៅកែរោងចក្រជាជនជាតិកូរ៉េខាងក្បូង បានបិទទ្វារោងចក្រចាស់ ទៅបង្កើតរោងចក្រថ្មី ដោយមិនបានជូនដំណឹង និងដោះស្រាយសំណងផ្សេងៗជូនកម្មករ។
អគ្គលេខាធិការនៃគណៈកម្មការដោះស្រាយបញ្ហាកូដកម្ម បាតុកម្ម គ្រប់មុខសញ្ញានៃក្រសួងការងារ លោក វង្ស សុវណ្ណ មានប្រសាសន៍ថា តាមការស្រាវជ្រាវគឺរោងចក្រ អេសអ៊ីអ៊ីអេស គ្លូប៊ល ពុំបានក្ស័យធន ឬបិទទ្វានោះទេ ហើយថា ថៅកែបានប្តូរទីតាំងរោងចក្រទៅកន្លែងថ្មី។
លោក វង្ស សុវណ្ណ បន្តថា ក្រោយមានការអន្តរាគមន៍ដោះស្រាយពីមន្ត្រីក្រសួងការងារ និងអាជ្ញាធរពាក់ព័ន្ធរួចមក គឺថៅកែព្រមឱ្យកម្មករចូលធ្វើការងារធម្មវិញនៅរោងចក្រថ្មីមានឈ្មោះថា «SEES GLOBAL(CAMBODIA) CO.,LTD» ស្ថិតនៅក្បែរទីតាំងរោងចក្រចាស់នោះដែរ។
លោកបន្ថែមថា៖ «រោងចក្រហ្នឹងដំណើរការបើកទ្វាធម្មតាទេ។ ក្រោយយើងចូលដោះស្រាយ គាត់[ថៅកែ]ឱ្យកម្មករចូលធ្វើការវិញថ្ងៃ២៥ស្អែកនេះ។ អ៊ីចឹង ការងារហ្នឹងបានព្រមព្រៀង សះជាគ្នាហើយ»។
ប្រធានសម្ព័ន្ធសហជីពអំណាចយុវជនកម្ពុជា លោក សៀង រិទ្ធី ឱ្យដឹងថា រោងចក្រ អេសអ៊ីអ៊ីអេស គ្លូប៊ល (SEES GLOBAL CO.,LTD) កំពុងផលិតស្រោមជើង ស្រោមដៃ និងស្រោមមុខ ឱ្យផ្លាកយីហោ TNS ដែលមានកម្មករកំពុងបម្រើការងារទាំងចាស់ និងថ្មីសរុបប្រមាណ៧០០នាក់៕