ក្រុមយុវជនបរិស្ថាន គ្រោងបំបួសដើមឈើធំ ៩ដើម ដែលត្រូវបានជឿជាក់ថា ត្រូវបានដាំតាំងពីសម័យសង្គមរាស្ត្រនិយម នៅក្នុងក្រុងព្រះសីហនុ នៅថ្ងៃទី១៥ ខែធ្នូខាងមុខនេះ ដើម្បីជំរុញការរក្សាការពារធនធានបៃតងមិនឱ្យបាត់បង់ក្រោមគម្រោងអភិវឌ្ឍន៍។
យុវតីបរិស្ថាននៃអង្គការមាតាធម្មជាតិ កញ្ញា ឡុង គន្ធា ឱ្យដឹងថា ដើមឈើទាំង៩ដើមនោះ ស្ថិតនៅតាមបណ្ដោយផ្លូវសាធារណៈ ម្ដុំរង្វង់មូលវិមានឯករាជ្យ ក្នុងសង្កាត់លេខ៣ ក្រុងព្រះសីហនុ។
យុវតីរូបនេះ បន្ថែមថា ពលរដ្ឋនៅម្ដុំនោះជឿថា ដើមឈើគ្រាប់បែកទាំង៩ដើមនោះ ត្រូវបានដាំតាំងពីសម័យសង្គមរាស្ត្រនិយម និងជាដើមឈើធំៗក្នុងចំនួនតិចតួចបំផុតដែលនៅសេសសល់នៅក្នុងភូមិសាស្ត្រនៃទីក្រុងទេសចរណ៍មាត់សមុទ្រមួយនេះ។
សកម្មជនចលនាមាតាធម្មជាតិរូបនេះ បញ្ជាក់ថា យុទ្ធនាការបំបួសដើមឈើនេះ ធ្វើឡើងដើម្បីជំរុញគោលការណ៍អភិវឌ្ឍន៍ក្រុងបៃតងរបស់អភិបាលខេត្តព្រះសីហនុ លោក គួច ចំរើន និងដាស់ស្មារតីមហាជនឱ្យភ្ញាក់រឭក ចេះស្រឡាញ់ និងការពារធនធានព្រៃឈើដែលកំពុងបាត់បង់។
កញ្ញា ឡុង គន្ធា និយាយថា៖ «គេ [សាលាខេត្តព្រះសីហនុ] មានគម្រោងសាងសង់ផ្លូវទៅចំដើមឈើហ្នឹង ហើយគាត់ [ប្រជាពលរដ្ឋ] សាកសួរឯកឧត្តម គួច ចំរើន គាត់ថា គេនឹងកាប់ដើមឈើហ្នឹង»។
កញ្ញាបន្ថែមថា៖ «យើងស្ដាយ ចង់ឱ្យដើមឈើហ្នឹងវានៅជាម្លប់ ហើយទុកគ្រាន់លម្អទីក្រុង ព្រោះយើងឃើញហើយនៅកំពង់សោម មានតែអគារខ្ពស់ៗ មិនសូវមានដើមឈើទេ»។
អ្នកនាំពាក្យសាលាខេត្តព្រះសីហនុ លោក ឃាង ភារម្យ លើកឡើងថា រាល់ការអភិវឌ្ឍតែងមានផលប៉ះពាល់ពិបាកនឹងចៀសផុត។ លោកបន្តថា រដ្ឋបាលសាលាខេត្តនឹងព្យាយាមឱ្យអស់លទ្ធភាពដើម្បីរក្សាទុកដើមឈើល្អៗធំៗ ដែលប៉ះពាល់ដល់ការកែលម្អ និងកសាងហេដ្ឋារចនាសម្ព័ន្ធផ្លូវថ្នល់ក្នុងក្រុង។
លោក ឃាង ភារម្យ ប្រាប់ថា៖ «យើងត្រូវយល់ថា ដើមឈើមួយដើមៗទម្រាំនឹងបានធំប៉ុណ្ណេះ យើងត្រូវប្រើពេលយូរណាស់ដើម្បីថែទាំ។ ប៉ុន្តែ វាពាក់ព័ន្ធទៅនឹងការអភិវឌ្ឍ ពាក់ព័ន្ធទៅនឹងការរៀបចំហេដ្ឋារចនាសម្ព័ន្ធ។ អាហ្នឹង គឺអ្វីដែលយើងបញ្ចៀសបាន យើងបញ្ចៀស ហើយបើថា យើងបញ្ចៀសមិនបាន យើងត្រូវយកចេញមួយចំនួន ហើយយើងនឹងរកប្រភេទឈើល្អៗយកមកដាក់ឡើងវិញ»។
ពាក់ព័ន្ធនឹងយុទ្ធនាការបំបួសដើមឈើរបស់ក្រុមយុវជន លោក ឃាង ភារម្យ លើកជាសំណូមពរដោយឱ្យពួកគេត្រូវជូនដំណឹងដល់ ឬឆ្លងកាត់ការពិគ្រោះយោបល់ជាមួយអាជ្ញាធរទៅតាមក្របខណ្ឌច្បាប់ ដើម្បីឱ្យខាងរដ្ឋបាលដែនដីដឹងពីគោលបំណងជាក់លាក់របស់ពួកគេជាមុន។
ពាក់ព័ន្ធនឹងបញ្ហានេះ កញ្ញា ឡុង គន្ធា បានបញ្ជាក់ថា ក្រុមរបស់កញ្ញាមិនទាន់បានដាក់លិខិតជូនដំណឹងទៅកាន់រដ្ឋបាលសាលាខេត្តនៅឡើយទេ។ កញ្ញាបន្ថែមថា សមាជិកក្រុមបានព្យាយាមទាក់ទងសុំការអនុញ្ញាតពីលោក គួច ចំរើន ផ្ទាល់ជាច្រើនដង ប៉ុន្តែ មិនទាន់ទទួលបានការឆ្លើយតបនៅឡើយ។
កញ្ញា ឡុង គន្ធា ប្រាប់ថា៖ «អត់បានដាក់ជាលាយលក្ខណ៍អក្សរទេ ប៉ុន្តែ ពួកយើងបានព្យាយាមទាក់ទងទៅឯកឧត្តម គួច ចំរើន ផ្ទាល់តាមលេខទូរសព្ទ ប៉ុន្តែ យើងទាក់ទងទៅច្រើនដងហើយ ហើយពេលដែលគាត់ទទួលទៅ ក៏គាត់រវល់ គាត់ថារវល់។ យើងនឹងព្យាយាមទាក់ទងទៅគាត់ម្ដងទៀត»។
ខេត្តព្រះសីហនុ ទទួលបានគម្រោងសាងសង់អគារជាង ៨០០គម្រោង ក្នុងនោះមានជាង ២០០គម្រោង សាងសង់រួច។ នេះបើតាមលោក ឃាង ភារម្យ ដែលប្រាប់ឱ្យវីអូឌីដឹងកាលពីខែវិច្ឆិកាកន្លងទៅ។
រដ្ឋបាលខេត្តព្រះសីហនុ បានផ្សព្វផ្សាយកាលពីពាក់កណ្ដាលខែវិច្ឆិកាកន្លងមកថា រដ្ឋាភិបាលកម្ពុជា បានបោះទុនជិត ៣០០លានដុល្លារ ដើម្បីសាងសង់ផ្លូវ ៣៤ខ្សែ មានប្រវែង ៨៤គីឡូម៉ែត្រ រង្វង់មូល ៣ និងស្ពានចំនួន៦ មានប្រវែងសរុប ២៥២ម៉ែត្រ នៅក្នុងក្រុងឆ្នេរសមុទ្រមួយនេះ៕
