នាយករដ្ឋមន្ត្រីកម្ពុជា លោក ហ៊ុន សែន លើកឡើងថា សហភាពអឺរ៉ុបនឹងរងផលប៉ះពាល់ដែរ បើសម្រេចដកប្រព័ន្ធអនុគ្រោះពន្ធ«អ្វីៗគ្រប់យ៉ាងលើកលែងតែអាវុធ» ហៅ EBA ពីកម្ពុជាមែននោះ។
រដ្ឋាភិបាលកម្ពុជាមានពេលត្រឹមថ្ងៃទី១២ ខែធ្នូ ស្អែកនេះ សម្រាប់ឆ្លើយតបទៅនឹងសហភាពអឺរ៉ុប ពាក់ព័ន្ធនឹងអឺរ៉ុបទាមទារឱ្យស្ដារប្រជាធិបតេយ្យឡើងវិញ ជាថ្នូរនឹងរក្សាទុកប្រព័ន្ធអនុគ្រោះពន្ធទុកEBA។
ប៉ុន្តែ ក្នុងពិធីចែកសញ្ញាបត្រដល់និស្សិត ក្នុងរាជធានីភ្នំពេញនាថ្ងៃពុធនេះ លោកនាយករដ្ឋមន្ត្រី ហ៊ុន សែន ថ្លែងថា លោកមិនចាត់ទុកថា ថ្ងៃទី១២ស្អែកនេះ ជាគ្រោះថ្នាក់របស់កម្ពុជា ដូចអ្នករិះគន់មួយចំនួនលើកឡើងនោះទេ។
លោក ហ៊ុន សែន អះអាងថា អ្វីដែលលោកកំពុងតាមដាន គឺការដែលចក្រភពអង់គ្លេសកំពុងបោះឆ្នោតដកខ្លួនចេញពីសហភាពអឺរ៉ុប ការដែលសហភាពអាមេរិកទាមទារឲ្យដកតំណែងប្រធានាធិបតី លោក ដូណាល់ ត្រាំ។
មេដឹកនាំរូបនេះ ថ្លែងទៀតថា កម្ពុជាបានប្រាប់សហភាពអឺរ៉ុបរួចហើយថា កម្ពុជាមិនអាចទទួលយកលក្ខខណ្ឌជំនួយណាមួយ រំលោភច្បាប់កម្ពុជាទេ។ លោកថា បើអឺរ៉ុបដកប្រព័ន្ធអនុគ្រោះពន្ធនេះពីកម្ពុជាមែន សហភាពអឺរ៉ុបក៏នឹងរងផលប៉ះពាល់ដែរ រួមទាំងអ្នកទិញអង្ករពីកម្ពុជាផង។
លោកថា៖ «ផលប៉ះពាល់ វាមិនមែនគ្រាន់តែកម្ពុជាទេ អ្នកឯងក៏មានផលប៉ះពាល់ដែរសមិទ្ធផលដែលអ្នកតែងជួយខ្ញុំ ក៏ត្រូវនិរាករចោលដែរ ទឹកមាត់អ្នកឯងជាមួយខ្ញុំ ក៏នឹងកាត់បន្ថយដែរ មានន័យថា បានរួមចំណែកសម្លាប់អាពួកប្រឆាំងផ្កាប់មុខហ្មង»។
ផ្នែកមួយនៃលក្ខខណ្ឌនៃប្រព័ន្ធអនុគ្រោះពន្ធនេះ សហភាពអឺរ៉ុប បានទាមទារឱ្យដោះលែងមេដឹកនាំបក្សប្រឆាំង លោក កឹម សុខា និងឱ្យគណបក្សសង្គ្រោះជាតិបានដំណើរការឡើងវិញ ក្រោយពីគណបក្សនេះ ត្រូវបានតុលាការកំពូលចេញសាលដីការំលាយចេញពីឆាកនយោបាយ។
លោក ហ៊ុន សែន អះអាងទៀតថា ការបាត់មុខក្រុមប្រឆាំងពីឆាកនយោបាយ ដោយសារតែដៃគូប្រកួតចោទលោកថា ជាអ្នកកាត់ដីឱ្យយួន និងបង្កើតវប្បធម៌«មានឯងអត់អញ»។
លោកថា៖ «នយោបាយ ទឹកឡើងត្រីស៊ីស្រមោច ទឹកហោចស្រមោចស៊ីត្រី មិនមែនជាគោលនយោបាយរបស់ខ្ញុំទេ មានឯងអត់អញ មានអញអត់ឯង មានតាំងពី២០០៣ អ្នកណាអ្នកដាក់? អានយោបាយហ្នឹង អ្នកឯងដាក់ចេញហើយឬនៅ? អា មានសែន អត់ស៊ី មានស៊ី អត់សែន ឥឡូវជាក់ស្ដែងមានតែសែនទេ វាអត់មានស៊ី អាហ្នឹងលើការជាក់ស្ដែង វាអ៊ីចឹង»។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា ហៅការដែលសហភាពអឺរ៉ុបជំរុញ ឱ្យស្តារប្រជាធិបតេយ្យនេះ ជាសារក្រើនរំឭកមេដឹកនាំកម្ពុជា ឱ្យគោរពបទដ្ឋានអន្តរជាតិ និងរដ្ឋធម្មនុញ្ញ ដែលចែងពីការលើកស្ទួយសិទ្ធិពលរដ្ឋ និងសិទ្ធិនយោបាយ។
អ្នកឃ្លាំមើលសិទ្ធិមនុស្សរូបនេះ បង្ហាញក្ដីបារម្ភថា ការបកស្រាយណាមួយសម្រាប់តែផលប្រយោជន៍នយោបាយ វានឹងធ្វើឱ្យកម្ពុជាខាតបង់ធ្ងន់ធ្ងរ មិនមែនសហភាពអឺរ៉ុបទេ។
លោកថា៖ «បើសិនជាយើងនៅតែបកស្រាយដោះសារទៅលើអ្វីដែលបានកើតឡើងមកហ្នឹង អ៊ីចឹងយើងនៅតែបន្តរងនូវការរិះគន់ ការដាក់សម្ពាធហ្នឹងដដែលទេ ពីព្រោះអាហ្នឹងជារឿងដែលយើងជាប់កាតព្វកិច្ច កិច្ចព្រមព្រៀងជាមួយគេ»។
អ្នកវិភាគនយោបាយ លោក ឯម សុវណ្ណរ៉ា បារម្ភថា បើកម្ពុជាបាត់EBA ដោយសារតែបញ្ហាសិទ្ធិមនុស្ស វិធានការជាច្រើនទៀត នឹងកើតមានមកលើកម្ពុជា ក្នុងនោះមានទាំងវិធានការបង្កកទ្រព្យសម្បត្តិឥស្សរជននយោបាយ ការបិទទិដ្ឋាការពីសហរដ្ឋអាមេរិក។
ការបាត់បង់EBAរបស់សហភាពអឺរ៉ុប កម្ពុជានឹងខាតបង់ទឹកប្រាក់ប្រមាណជា៧០០លានដុល្លារក្នុង១ឆ្នាំ។ ជាងនេះទៅទៀត សមាគមរោងចក្រកាត់ដេរកម្ពុជា GMAC បង្ហាញក្ដីបារម្ភដែរថា បាត់បង់EBA វានឹងប៉ះពាល់ផ្ទាល់ដល់កម្មករ៧៥ម៊ឺននាក់ ក្នុងវិស័យកាត់ដេរ និងពលរដ្ឋខ្មែរ៣លានគ្រួសារផ្សេងទៀតដោយប្រយោល៕