ប្រធានសហភាពការងារកម្ពុជា លោក អាត់ ធន់ បង្ហាញក្ដីបារម្ភថា ទិវាសិទ្ធិមនុស្សអន្តរជាតិ១០ធ្នូ ឆ្នាំក្រោយ អាចនឹងគ្មានអ្នកមកចូលរួម ដោយសារតែទិវានេះត្រូវបានរដ្ឋាភិបាលប្រកាសលុបចេញពីប្រតិទិនឈប់សម្រាក ចាប់ពីឆ្នាំ២០២០ទៅ។
ការថ្លែងរបស់លោក អាត់ ធន់ នេះធ្វើឡើងក្នុងពិធីប្រារព្ធខួបទី៧១ នៃទិវាសិទ្ធិមនុស្សអន្តរជាតិ១០ធ្នូ ក្នុងរាជធានីភ្នំពេញ នាថ្ងៃអង្គារនេះ។
លោក អាត់ ធន់ ថ្លែងថា កម្មករបច្ចុប្បន្ន ក្រៅពីប្រឈមទៅនឹងប្រាក់ខែតិច ធ្វើការថែមម៉ោងច្រើន កន្លែងធ្វើការប្រកបដោយគ្រោះថ្នាក់ ការប្រើប្រាស់កិច្ចសន្យាខ្លីៗ និងការប្រើប្រព័ន្ធតុលាការ គំរាមកំហែងដល់ការជំរុញលក្ខខណ្ឌការងារនោះ កម្មករខាតបង់អត្ថប្រយោជន៍ពីការដែលរដ្ឋាភិបាលលុបចោលថ្ងៃបុណ្យអស់៦ថ្ងៃថែមទៀត។ ក្នុងនោះមានទាំងថ្ងៃសិទ្ធិមនុស្សអន្តរជាតិ១០ធ្នូ និងកិច្ចព្រមព្រៀងសន្តិភាពទីក្រុងប៉ារីស ២៣តុលា។
លោកថា៖ «បើសិនជាថ្ងៃ១០ធ្នូ យើងអត់មាន ខ្ញុំខ្លាចក្រែងដល់ឆ្នាំក្រោយទៅមានអ្នកណាចូលរួម? យើងអាចរៀបបាន ដល់ថ្ងៃហ្នឹងចំថ្ងៃធ្វើការមាននរណាចូលរួម។ អ៊ីចឹងសុំឱ្យរដ្ឋាភិបាលពិចារណាឡើងវិញ»។
មេដឹកនាំសហជីពរូបនេះ ស្នើឱ្យរដ្ឋាភិបាលពីចារណាដាក់បញ្ចូលថ្ងៃឈប់សម្រាក១០ធ្នូ និង២៣តុលា ចូលក្នុងប្រតិទិនឈប់សម្រាកឡើងវិញ។
កាលពីខែសីហា រដ្ឋាភិបាលបានប្រកាសកាត់បន្ថយថ្ងៃបុណ្យឈប់សម្រាកប្រចាំឆ្នាំ ចំនួន៦ថ្ងៃ ពីឈប់២៨ថ្ងៃមកត្រឹម២២ថ្ងៃវិញ ក្នុងនោះមានទាំងថ្ងៃ១០ធ្នូ និង២៣តុលា។
ការកាត់បន្ថយថ្ងៃឈប់សម្រាកប្រចាំឆ្នាំនេះ រដ្ឋាភិបាលអះអាងថា ដើម្បីសម្រួលបន្ទុកអ្នកវិនិយោគនៅកម្ពុជា ពិសេសវិស័យកាត់ដេរ៕
