អតីតមេដឹកនាំគណបក្សប្រឆាំង លោក កឹម សុខា លើកឡើងថា ការចូលរួមលើកកម្ពស់ និងការពារសិទ្ធិមនុស្ស មិនមែនជាការជ្រៀតជ្រែកកិច្ចការផ្ទៃក្នុងរបស់ប្រទេសជាតិឡើយ។
លោក កឹម សុខា បានសរសេរនៅលើហ្វេសប៊ុករបស់លោកនៅថ្ងៃបា្ររព្ធទិវាសិទ្ធិមនុស្សអន្តរជាតិ ១០ធ្នូលើកទី៧១ នៅថ្ងៃនេះថា សង្គមមួយមានស្ថិរភាពទៅបានលុះត្រាតែមនុស្សគ្រប់រូបក្នុងសង្គម ទទួលបាននូវយុត្តិធម៌ ពោលគឺមានសិទ្ធិសេរីភាព មិនត្រូវបានគេរំលោភបំពាន។
លោក កឹម សុខា បានសរសេរនៅលើហ្វេសប៊ុក៖ «សិទ្ធិមនុស្សគឺជាមរតករបស់មនុស្សជាតិ វាមិនមែនជារបស់ជាតិសាសន៍ណាមួយផ្តាច់មុខឡើយ។ ការចូលរួមលើកកម្ពស់ និងការពារសិទ្ធិមនុស្ស មិនមែនជាការជ្រៀតជ្រែកកិច្ចការផ្ទៃក្នុងនោះទេ។ ហើយយើងក៏មិនត្រូវប្រមាថភាពជាមនុស្សរបស់ខ្មែរ ដោយលើកឡើងថា សិទ្ធិមនុស្សគឺជាគំនិតបរទេសនោះដែរ។ ក្នុងនាមជាមនុស្ស ខ្មែរត្រូវការសិទ្ធិសេរីភាព»។
អ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន លើកឡើងថា រដ្ឋាភិបាលនៅតែបន្តកិច្ចសហប្រតិបត្តិការជាមួយសហគមន៍អន្តរជាតិ ដើម្បីគោរពសិទ្ធិមនុស្ស ប៉ុន្តែ លោកថា កម្ពុជានឹងមិនអនុវត្តទៅតាមបរទេសឡើយ បើសិនជាប្រទេសទាំងនោះដាក់សម្ពាធមកកម្ពុជា។
លោកចាត់ទុកការចូលរួមរបស់បរទេស ដោយដាក់សម្ពាធឱ្យកម្ពុជាគោរពសិទ្ធិមនុស្ស លោកថា ជាការរំលោភអធិបតេយ្យកម្ពុជា។
លោក កត្តា អ៊ន មានប្រសាសន៍ថា៖ «ការសហប្រតិបត្តិការពីបណ្ដាប្រទេសដទៃ ក្នុងនាមមិត្តភាពក្នុងនាមចេតនាការពារលើកកម្ពស់សិទ្ធិមនុស្សគឺជាចំណុចដ៏ល្អ ប៉ុន្តែ ការចូលរួមរបស់ប្រទេសដទៃដោយដាក់កម្រិត ដោយគាបសង្កត់ យកបញ្ហាសិទ្ធិមនុស្សជាបញ្ហានយោបាយ នេះជារឿងរំលោភអធិបតេយ្យជាតិដែលកម្ពុជាមិនទទួលយកទេ»។
ប្រធានសមាគមអាដហុក លោក ធន សារ៉ាយ បាននិយាយក្នុងវីដេអូឃ្លីបបង្ហោះនៅលើទំព័រហ្វេសប៊ុកកាលពីម្សិល ការគោរពលទ្ធិប្រជាធិបតេយ្យ និងការគោរពសិទ្ធិមនុស្សឱ្យបានត្រឹមត្រូវតាមរដ្ឋធម្មនុញ្ញនៃព្រះរាជាណាចក្រកម្ពុជា មិនមែនជាការធ្វើទៅតាមបង្គាប់បរទេសឡើយ ប៉ុន្តែ វាជាការអនុវត្តច្បាប់របស់ប្រទេសទៅវិញទេ។ លោកបន្តថា ការដែលរដ្ឋាភិបាលមិនអនុវត្តតាមរដ្ឋធម្មនុញ្ញនៃព្រះរាជាណាចក្រកម្ពុជានោះ លោកថា នឹងធ្វើឱ្យកម្ពុជាបាត់បង់ផលប្រយោជន៍របស់ជាតិ។
លោក ធន សារាយ លើកឡើងថា៖ «ការខកខានមិនបានអនុវត្តត្រឹមត្រូវតាមច្បាប់កំពូលរបស់ប្រទេសយើង ស្ដីពីការពារសិទ្ធិមនុស្ស និងប្រជាធិបតេយ្យនេះ នឹងអាចបណ្ដាលបាត់បង់ដល់ប្រព័ន្ធអនុគ្រោះពន្ធពីសហភាពអឺរ៉ុប EBA ហើយដែលជាផលប្រយោជន៍ជាតិដ៏ធំនៅពេលខាងមុខនេះ គឺជារឿងដ៏អាម៉ាស់ និងគួរឱ្យសោកស្ដាយជាទីបំផុត នៅក្នុងប្រវត្តិសាស្ត្រនៃប្រទេសកម្ពុជាយើង ព្រោះថា ការបាត់បង់នេះ អ្នកដែលទទួលការឈឺចាប់ខ្លាំងជាងគេ គឺអ្នកក្រីក្រ និងអ្នកទន់ខ្សោយ ដែលមានចំនួនច្រើនប្រហែលជា៣ លាននាក់នៅក្នុងសង្គមកម្ពុជាបច្ចុប្បន្ននេះ»។
កាលពីថ្ងៃទី១០ ខែវិច្ឆិកា សាលាដំបូងរាជធានីភ្នំពេញបានសម្រេចបន្ធូរបន្ថយលក្ខខណ្ឌ ដោយអនុញ្ញាតឱ្យលោក កឹម សុខា អាចដើរហើរនៅក្នុងប្រទេសកម្ពុជា ប៉ុន្តែ មិនអនុញ្ញាតចេញក្រៅប្រទេស និងធ្វើសកម្មភាពនយោបាយឡើយ ក្រោយពីបង្គាប់ឱ្យឃុំខ្លួនបណ្ដោះអាសន្នជាង២ ឆ្នាំ ទាំងនៅក្នុងពន្ធនាគារ និងក្នុងផ្ទះ។
សាលាដំបូងរាជធានីភ្នំពេញកាលពីម្សិលមិញ បានចេញសេចក្តីប្រកាសព័ត៌មានមួយដោយបញ្ជាក់ថា ស្ថាប័ននេះនឹងបើកសវនាការជំនុំជម្រះសំណុំរឿងអតីតមេដឹកនាំបក្សប្រឆាំង លោក កឹម សុខា ពីបទ «សន្និដ្ឋិភាពជាមួយបរទេស ឬឃុបឃិតជាមួយបរទេស» នៅថ្ងៃទី១៥ ខែមករា ឆ្នាំ២០២០។ ការកំណត់ពេលសវនាការលោក កឹម សុខា នេះធ្វើឡើងបន្ទាប់ពីសាលាឧទ្ធរណ៍ បានប្រកាសច្រានចោលបណ្តឹងទាស់របស់សហមេធាវីការពារក្តីលោក កឹម សុខា ដោយចាត់ទុកការសម្រេចរបស់សាលាដំបូងរាជធានីភ្នំពេញ ដែលបញ្ជូនសំណុំរឿងអតីតមេដឹកនាំបក្សប្រឆាំងនេះទៅជម្រះថា ធ្វើឡើងតាមនីតិវិធីច្បាប់៕