សិក្ខាកាមសារព័ត៌មាន Newsroom Cambodia ជំនាន់ទី១ អះអាងថា ទទួលបាននូវចំណេះដឹង និងបទពិសោធន៍ច្រើន ទាក់ទងនឹងជំនាញសរសេរព័ត៌មាន បន្ទាប់ពីបានចូលរួមក្នុងវគ្គបណ្ដុះបណ្ដាលអស់រយៈពេល៣ខែ ដែលរៀបចំដោយ«មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ» (CCIM)។
ដើម្បីលើកកម្ពស់វិស័យសារព័ត៌មាននៅកម្ពុជា «មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ» (CCIM) រៀបចំវគ្គបណ្ដុះបណ្ដាលផ្នែកសារព័ត៌មានចំនួន៦វគ្គ ដោយវគ្គនីមួយៗមានរយៈពេល៣ខែ។ មជ្ឈមណ្ឌលនេះ បានបើកវគ្គបណ្ដុះបណ្ដាលជំនាញសរសេរសារព័ត៌មានជំនាន់ទី១ ចាប់ពីថ្ងៃទី០២ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ២០១៩។
បន្ទាប់ពីវគ្គបណ្ដុះបណ្ដាលត្រូវបានបញ្ចប់ សិក្ខាកាមដែលចូលរៀនក្នុងវគ្គនេះ បានលើកឡើងស្រដៀងគ្នាថាពួកគេទទួលបានចំណេះ និងជំនាញ ក៏ដូចជាបទពិសោធន៍ថ្មីប្លែកជាច្រើនពាក់ព័ន្ធនឹងវិស័យសារព័ត៌មាន រួមមានការសរសេរព័ត៌មាន ការសរសេរអត្ថបទបែបFeature វិធីសាស្រ្តក្នុងការសម្ភាសប្រភព ការប្រើប្រាស់ប្រព័ន្ធអ៊ីនធឺណិតឲ្យមានសុវត្ថិភាព ក្រមសីលធម៌ជាអ្នកសារព័ត៌មាន វិធីសាស្ត្រនៃការស្រាវជ្រាវ របៀបស្វែងរកព័ត៌មាន រួមទាំងនីតិវិធីខ្លះៗដែលអ្នកសារព័ត៌មានត្រូវស្វែងយល់។
លោក ឆន ចាន់ស៊ី គ្រូបណ្ដុះបណ្ដាលផ្នែកសារព័ត៌មាន បានឲ្យដឹងថា វគ្គនេះពិតជាមានសារៈសំខាន់ណាស់សម្រាប់អ្នកដែលចង់ក្លាយជាអ្នកសារព័ត៌មានអាជីព។ លោក កត់សម្គាល់ឃើញថា បន្ទាប់ពីឆ្លងកាត់វគ្គបណ្ដុះបណ្ដាលរយៈពេល៣ខែមក សិក្ខាកាមមានការយល់ដឹងច្រើនទាក់ទងនឹងការធ្វើព័ត៌មានបែបវិជ្ជាជីវៈ។
លោក ឆន ចាន់ស៊ី មានប្រសាសន៍ថា ៖ «ជាការពិត កន្លងមក តាមដែលយើងស្ទាបស្ទង់មើល គាត់ [សិក្ខាកាម] អត់ដឹងថា ព័ត៌មានគឺជាស្អីទេ។ ប៉ុន្តែ ដល់ពេលគាត់បានឆ្លងកាត់វគ្គបណ្ដុះបណ្ដាលរបស់យើង បានយល់ច្បាស់ថា ស្អីទៅជាព័ត៌មាន ស្អីទៅជាព័ត៌មានបែបវិជ្ជាជីវៈ។ […] វគ្គ Newsroom Cambodia នេះមានសារៈប្រយោជន៍ខ្លាំងណាស់សម្រាប់យុវជនខ្មែរយើង។ ពួកគាត់អាចទទួលបានចំណេះដឹងផ្សេងៗក្នុងការសរសេរអត្ថបទ។ អ្វីដែលយើងបង្រៀន គឺបង្រៀនពីលក្ខណៈជា Basic ក្នុងការធ្វើសេចក្ដីរាយការណ៍ មានន័យថា យើងបង្រៀនពួកគាត់ពីមុំនៃរឿង របៀបជ្រើសរើសរឿង ហើយតើរឿងអស់ហ្នឹងជួយអ្វីខ្លះដល់សង្គមរបស់យើង”។
បើតាមលោក ចាន់ស៊ី វគ្គបណ្ដុះបណ្ដាលសារព័ត៌មានក្រោយៗទៀត នឹងធ្វើការកែប្រែឲ្យកាន់តែមានប្រសិទ្ធភាពបន្ថែមទៀត តាមរយៈការសិក្សានូវអ្វីដែលខ្វះចន្លោះក្នុងវគ្គទី១ ដើម្បីឲ្យសិក្ខាកាមអាចធ្វើរឿងបានតាមបែបវិជ្ជាជីវៈ។ លោកបន្ថែមថា ការរៀបចំកាលវិភាគទៅតាមពេលវេលារបស់សិក្ខាកាម ពិតជាមានសារៈសំខាន់ ព្រោះថាកន្លងមក ជួបបញ្ហាត្រង់ថា សិក្ខាកាមអត់សូវមានពេលវេលាគ្រប់គ្រាន់។ អ្វីដែលថ្មីនៅក្នុងវគ្គបណ្ដុះបណ្ដាលក្រោយៗ នឹងមានការដាក់បញ្ចូលការធ្វើព័ត៌មាន មានរបៀបជាប្រព័ន្ធផ្សព្វផ្សាយបែបចម្រុះ មានន័យថា សិក្ខាកាមអាចធ្វើព័ត៌មានជាលក្ខណៈអនឡាញក៏បាន ជាវិទ្យុក៏បាន។
សិក្ខាកាមដែលទើបបញ្ចប់ការសិក្សាមួយរូប កញ្ញា ម៉ៅ ស៊ីណា បានឲ្យដឹងថា ឆ្លងកាត់វគ្គបណ្ដុះបណ្ដាលវគ្គសារព័ត៌មានរយៈពេល៣ខែ កញ្ញាពិតជាទទួលបាននូវចំណេះដឹងច្រើន ទាំងការសម្ភាសប្រភព ការសរសេរអត្ថបទព័ត៌មាន ការសរសេរបែបហ្វ៊ីតឆ័រ (Feature) រួមទាំងការប្រើប្រាស់អ៊ីនធឺណិតឲ្យមានសុវត្ថិភាពផងដែរ។
កញ្ញា ម៉ៅ ស៊ីណា លើកឡើងថា៖ «ក្នុងរយៈពេល៣ខែហ្នឹង ខ្ញុំគិតថា ខ្ញុំបានរៀនសូត្រច្រើនពី ស៊ីស៊ីអាយអឹម (CCIM)។ ទី១ ទាក់ទងទៅនឹងការសម្ភាស ការសរសេរព័ត៌មាន ការសរសេរហ្វ៊ីតឆ័រ (Feature)។ មួយទៀត ខ្ញុំបានយល់ដឹងថែមទាក់ទងទៅនឹងអ្វីជាព័ត៌មានពិត អ្វីជាព័ត៌មានមិនពិត ហើយនៅក្នុងហ្នឹងក៏ដឹងអំពីនីតិវិធីខ្លះៗ ទាក់ទងនឹងអ្នកសារព័ត៌មាន ដែលកាលពីមុនខ្ញុំអត់ដឹងសោះ»។
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ត្រូវបានបង្កើត និងចុះបញ្ជីនៅក្រសួងមហាផ្ទៃ ជាអង្គការក្រៅរដ្ឋាភិបាល នៅក្នុងខែមិថុនា ឆ្នាំ២០០៧។ មជ្ឈមណ្ឌលនេះ ផលិតព័ត៌មានសម្រាប់ផ្សាយតាមវិទ្យុ អនឡាញ ក៏ដូចជាផ្សព្វផ្សាយតាមបណ្ដាញសង្គមផ្សេងៗ។ ក្រៅពីនេះ ក៏មានការបណ្តុះបណ្តាលផ្នែកសារព័ត៌មាន បង្កើតយុទ្ធនាការតស៊ូមតិលើប្រព័ន្ធផ្សព្វផ្សាយឯករាជ្យ ដើម្បីទទួលបានព័ត៌មាន សេរីភាពអ៊ីនធឺណិត សេរីភាពបញ្ចេញមតិតាមអ៊ីនធឺណិត និងសុវត្ថិភាពអ្នកសារព័ត៌មាន។
មិនខុសពីសិក្ខាកាមខាងលើ កញ្ញា អេង ស្រីពៅ ដែលទើបតែឆ្លងកាត់វគ្គបណ្ដុះបណ្ដាលសារព័ត៌មានរយៈពេល៣ខែដែរនោះ បានឲ្យដឹងថា កញ្ញាពិតជាទទួលបាននូវចំណេះដឹងច្រើន ពីរបៀបសរសេរព័ត៌មានបែបវិជ្ជាជីវៈ។
កញ្ញា អេង ស្រីពៅ និយាយថា៖«អ្វីដែលខ្ញុំរៀនសូត្របាន គឺបានច្រើនមែនទែន។ ទី១ គឺយើងចេះស្វែងរកប្រភព ចេះស្វែងរកព័ត៌មាន ជាពិសេសគឺចេះចាប់យកមុំនៃរឿង ក្នុងរឿងហ្នឹងតើយើងត្រូវការប្រភពប៉ុន្មាន ដើម្បីឲ្យមានភាពពេញលេញក្នុងរឿងហ្នឹងមួយ»។ វាការងារមួយដែលយើងជាយុវជន គួរតែចាប់រៀនយកវគ្គសារព័ត៌មាននេះ។ វគ្គសារព័ត៌មាន អាចធ្វើឲ្យយើងរៀនបានស្វែងយល់ពីព័ត៌មានពិត ព័ត៌មានមិនពិត ហើយវាអាចឆ្លុះបញ្ចាំងពីស្ថានភាពជាក់ស្ដែង។ ពេលយើងចេះ យើងអាចយកមកសរសេរ បង្ហាញសាធារណជន ឲ្យគេបានដឹងពីអ្វីដែលជាព័ត៌មានពិតក្នុងប្រទេស»។
លោក Michael Dickison ជាគ្រូបណ្ដុះបណ្ដាលជំនាញសរសេរព័ត៌មានជាភាសាអង់គ្លេស បានដឹងថា Newsroom Cambodia បង្រៀនសិក្ខាកាមជាច្រើនទាក់ទងទៅនឹងសារព័ត៌មាន។ លោកបន្ថែមថា កម្មវិធីនេះមានសារៈសំខាន់ខ្លាំងណាស់ ហើយបច្ចុប្បន្ន កម្ពុជាត្រូវការអ្នកសារព័ត៌មានដែលល្អបន្ថែមទៀត។
លោក Michael Dickison មានប្រសាសន៍ថា៖ «ពួកយើងគិតថា កម្មវិធីនេះមានសារៈសំខាន់ណាស់។ ពួកយើងបង្កើតកម្មវិធីនេះឡើង ព្រោះថា វិស័យសារព័ត៌មានពិតជាមានសារៈសំខាន់នៅកម្ពុជា។ ពួកយើង កំពុងកសាងឧស្សាហកម្មសារព័ត៌មានឡើងវិញនៅកម្ពុជា ក្រោយពីរងការលំបាកពីរបីឆ្នាំកន្លងមកនេះ។ ដូច្នេះហើយ ខ្ញុំគិតថា យើងត្រូវការអ្នកសារព័ត៌មានដែលល្អបន្ថែមទៀតក្នុងប្រទេស»។
បើតាមលោក Michael វគ្គបណ្ដុះបណ្ដាលសារព័ត៌មាននេះ គឺជាការអនុវត្តពាក់កណ្តាលអាជីព ដែលសិក្ខាកាមមករៀនទាក់ទងនឹងអត្ថបទព័ត៌មានរយៈពេល៣ខែ។ លោកសង្ឃឹមថា សិក្ខាកាមដែលបានបញ្ចប់វគ្គនេះ នឹងអាចធៀបជាមួយនឹងអ្នកសារព័ត៌មានអាជីពបាន។
មិនខុសគ្នាពីសិក្ខាកាម២រូបខាងលើ លោក សាញ់ ប៊ុនហឿន ដែលជានិស្សិតផ្នែកសារព័ត៌មាននៅសកលវិទ្យាល័យមួយ ហើយក៏ជាសិក្ខាកាមទើបបញ្ចប់វគ្គបណ្ដុះបណ្ដាលផ្នែកសារព័ត៌មានរយៈពេល៣ខែនេះដែរ បានឲ្យដឹងថា លោកមានការយល់ដឹងច្រើនពីអ្វីទៅដែលហៅថាព័ត៌មាន ហើយក៏អាចសរសេរព័ត៌មានតាមបែបផ្សេងៗបានផងដែរ។
លោក សាញ់ ប៊ុនហឿន៖ «ខ្ញុំខ្លួនឯងផ្ទាល់ ខ្ញុំមិនកុហកខ្លួនឯងទេ មកដល់ឥឡូវ ខ្ញុំអាចសរសេរអត្ថបទព័ត៌មានបាន ខ្ញុំអាចសរសេរហ្វ៊ីតឆ័របាន ខ្ញុំអាចធ្វើវីដេអូទាក់ទងនឹងអត្ថបទព័ត៌មានបាន។»
បើតាម ប៊ុនហឿន កន្លងមកលោកធ្លាប់ចូលរួមវគ្គបណ្ដុះបណ្ដាលផ្នែកសារព័ត៌មានផ្សេងរួចមកហើយ ប៉ុន្ត វាមានភាពខុសគ្នាដាច់រវាងវគ្គមុន និងវគ្គសារព័ត៌មានដែលផ្ដល់ដោយ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ។ និស្សិតផ្នែកសារព័ត៌រូបនេះបន្ថែមថា ចូលរៀននៅស្ថាប័នផ្សេង គេមិនបានបង្រៀនលម្អិតពីអ្វីទៅដែលហៅថាព័ត៌មាននោះទេ ប៉ុន្តែ ពេលមកចូលរួមវគ្គបណ្ដុះបណ្ដាលជាមួយCCIM ធ្វើឲ្យលោកយល់ពីសារព័ត៌មានបានច្រើន។
កញ្ញា ស្រីពៅ បានលើកទឹកចិត្តឲ្យយុវជនផ្សេងៗទៀត រៀនវគ្គសារព័ត៌មានឲ្យបានច្រើននាថ្ងៃអនាគត ដោយសារបច្ចុប្បន្ន អ្នកសារព័ត៌មានឯករាជ្យនៅមានចំនួនតិចតួចនៅឡើយ។
កញ្ញាថា៖ «ចំពោះខ្ញុំជាយុវជនអ៊ីចឹង ខ្ញុំពិតជាសប្បាយរីករាយដែលមានឱកាសបានមករៀនវគ្គសារព័ត៌មាននេះ ហើយខ្ញុំក៏ចង់ឲ្យទៅថ្ងៃអនាគត គឺមានអ្នកចាប់អារម្មណ៍រៀនខាងសារព័ត៌មានឲ្យបានច្រើន ដោយសារតែឥឡូវ អ្នកសារព័ត៌មានឯករាជ្យគឺនៅមានការខ្វះខាតច្រើន អ៊ីចឹងខ្ញុំចង់លើកទឹកចិត្តឲ្យយុវជនមករៀនវគ្គសារព័ត៌មានឲ្យបានច្រើន»៕
ដោយ៖ ម៉ូវ ម៉ារ៉ា
