រដ្ឋមន្រ្តីសាធារណការ និងដឹកជញ្ជូន លោក ស៊ុន ចាន់ថុល ឱ្យដឹងថា ក្រសួងកំពុងសិក្សាលើលទ្ធភាពបង្កើតគន្លងពិសេសដាច់ដោយឡែកសម្រាប់រថយន្តក្រុងនៅរាជធានីភ្នំពេញ ដើម្បីកាត់បន្ថយការកកស្ទះចរាចរណ៍ដែលជាបញ្ហាចោទធំបំផុតសម្រាប់អ្នករស់នៅទីក្រុង។
រដ្ឋមន្ត្រីរូបនេះ បានលើកឡើងបែបនេះអំឡុងពេលថ្លែងទៅកាន់ក្រុមអ្នកសារព័ត៌មាន ក្រោយលោកបានបញ្ចប់វេទិកាពិភាក្សាអំពីចល័តភាពក្នុងទីក្រុង កាលពីព្រឹកមិញនេះ នៅរាជធានីភ្នំពេញ។
លោក ស៊ុន ចាន់ថុល ថ្លែងថា៖ «យើងខ្ញុំកំពុងសិក្សាថា តើយើងគួរតែមានគន្លងពិសេសសម្រាប់ឡាន Bus [រថយន្តក្រុង] ព្រោះបើជិះ Bus ដដែល វាជាប់កកស្ទះចរាចរណ៍ដដែល គេមិនចង់ជិះទេ។ ប៉ុន្តែ បើយើងមានគន្លងពិសេសសម្រាប់Bus សម្រាប់ឡានដែលជិះរួមគ្នា កុំឱ្យឡានមួយជិះម្នាក់ឯង។ បើឡានមួយជិះលើសពីរនាក់ គួរឱ្យទៅ Lane [គន្លងផ្លូវ] ពិសេសមួយ គន្លងពិសេស។ អាហ្នឹង យើងនឹងពិចារណាសហការជាមួយរាជធានីភ្នំពេញ ដើម្បីធ្វើកិច្ចការនោះ»។
យ៉ាងណា លោក ស៊ុន ចាន់ថុល មិនទាន់អាចបញ្ជាក់បានថា ការសិក្សានឹងបញ្ចប់នៅពេលណាទេ ប៉ុន្តែ លោកថា ខាងក្រសួងនឹងផ្សព្វផ្សាយបន្ទាប់ពីកិច្ចការនោះរួចរាល់។
ប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ លោក សាំ ពិសិដ្ឋ បដិសេធបកស្រាយពីគម្រោងនៃការស្ថាបនាគន្លងពិសេសនេះ ដោយលោករុញសំណួរនេះឱ្យអ្នកសារព័ត៌មានសួរទៅកាន់ក្រសួងវិញ។
អតីតសមាជិកសភាសិង្ហបុរី និងជាស្ថាបនិកក្រុមហ៊ុន Social Innovation Park លោកស្រី Penny Low លើកឡើងអំឡុងសន្និសីទដដែលនោះថា ការជំរុញឱ្យមានការប្រើប្រាស់មធ្យោបាយធ្វើដំណើររួម ជាជាងមធ្យោបាយឯកជន គឺជាដំណោះស្រាយដ៏ប្រសើរសម្រាប់ការកាត់បន្ថយបញ្ហាកកស្ទះ។
លោកស្រី Penny Low មានប្រសាសន៍បន្ថែមថា៖ «ខ្ញុំគិតថា យើងគួរតែផ្តួចផ្តើមឱ្យមានការប្រើប្រាស់មធ្យោបាយដឹកជញ្ជូនដទៃផ្សេងទៀត ដូចជាតាមផ្លូវទឹក បន្ថែមពីលើការផ្តោតលើដំណោះស្រាយតាមផ្លូវគោក។ កម្ពុជាមានទន្លេដ៏ស្រស់ស្អាតកាត់ផ្ទៃប្រទេស ដែលយើងអាចប្រើប្រាស់ជាផ្លូវដឹកជញ្ជូនបាន»។
បើតាមរដ្ឋមន្ត្រីសាធារណការ និងដឹកជញ្ជូន នៅភ្នំពេញមាន យានយន្តសរុបចំនួន ១,៨លានគ្រឿង កំពុងធ្វើចរាចរទៅមក ក្នុងនោះ រថយន្តមានចំនួនជាង ៥សែនគ្រឿង និងរ៉ឺម៉កកង់បីចំនួន ៤ម៉ឺនគ្រឿង និងមានម៉ូតូជាង ១លាន ៣សែនគ្រឿង។
តួលេខជំរឿនឆ្នាំ២០១៩ បង្ហាញថា ពលរដ្ឋរស់នៅភ្នំពេញមានជាង ២លាននាក់។
សាលារាជធានីភ្នំពេញ បានសហការជាមួយអង្គការ JICA ផ្តល់សេវារថយន្តក្រុងសាធារណៈលើកដំបូងនៅឆ្នាំ២០០៦ ប៉ុន្តែ ត្រូវទទួលបរាជ័យ។
បន្ទាប់មក បានបើកឡើងវិញនៅឆ្នាំ២០១៤ ក្រោយកិច្ចគាំទ្រពីអង្គការដដែល ដោយមានរថយន្តក្រុងចំនួន ៥៧ រត់លើតម្រាយផ្លូវចំនួន ៣ខ្សែ។ ឆ្នាំ២០១៩ ចំនួនរថយន្តបានបង្កើនដល់២៣៥គ្រឿង និងអាចដឹកជញ្ជូនអ្នកដំណើរបាន១ម៉ឺន៥ពាន់នាក់ក្នុងមួយថ្ងៃ ដោយប្រតិបត្តិការ ១៣ខ្សែនៅទូទាំងរាជធានីភ្នំពេញ៕