សហមេធាវីការពារក្ដីលោក កឹម សុខា បំពេញការងារតំណាងឱ្យកូនក្តីបានប្តឹងជំទាស់ទៅឧទ្ធរណ៍ដោយចាត់ទុកថា ការដែលចៅក្រមស៊ើបសួរសាលាដំបូងសម្រេចបញ្ជូនសំណុំរឿងកូនក្ដីទៅជម្រះ ជារឿងអយុត្តិធម៌។
សាលាដំបូងរាជធានីភ្នំពេញ កាលពីថ្ងៃទី២ ខែធ្នូ បានចេញប្រកាសថា សំណុំរឿងអតីតមេដឹកនាំគណបក្សប្រឆាំង លោក កឹម សុខា ដែលជាប់ចោទពីបទ «សន្និដ្ឋិភាពជាមួយបរទេស» ឬឃុបឃិតជាមួយបរទេស ត្រូវបញ្ជូនទៅជម្រះ ដោយតុលាការថា ក្រោយពីបិទបញ្ចប់ការស្រាវជ្រាវ ចៅក្រមស៊ើបសួរមានភស្តុតាងដាក់បន្ទុកគ្រប់គ្រាន់លើជនត្រូវចោទ ។
ប៉ុន្តែ ពាក្យបណ្ដឹងរបស់សហមេធាវីដាក់ទៅសាលាដំបូង ដើម្បីឱ្យបញ្ជូនទៅសាលាឧទ្ធរណ៍កាលពី ថ្ងៃអង្គារម្សិលមិញ អះអាងថា កូនក្ដីកើតទុក្ខមិនសុខចិត្តទៅលើដីកា ឬដំណោះស្រាយនេះ និងសម្រេចឱ្យសហមេធាវីប្តឹងទៅសាលាឧទ្ធរណ៍។
បណ្តឹងទាស់ដដែល អះអាងថា ករណីនេះដោយសារតែចៅក្រមស៊ើបសួរ លោក គី ឫទ្ធី បានរក្សាទុកជនត្រូវចោទឱ្យស្ថិតនៅក្រោមការត្រួតពិនិត្យតាមផ្លូវតុលាការដដែល។
សហមេធាវីបន្តថា ម្យ៉ាងវិញទៀត ចៅក្រមស៊ើបសួរមិនបានធ្វើការសម្រេចទៅលើពាក្យបណ្ដឹងរបស់សហមេធាវី ចុះថ្ងៃទី៧ ខែវិច្ឆិកា ឆ្នាំ២០១៩ និងមិនបានធ្វើការស៊ើបអង្កេតឱ្យបានពេញលេញចំពោះភាគីពាក់ព័ន្ធ ដើម្បីឆ្លើយតបទៅនឹងនីតិវិធីច្បាប់ជាធរមានដែលបានបញ្ញត្តិថា ចៅក្រមស៊ើបសួរមានកាតព្វកិច្ចស៊ើបទាំងដោះបន្ទុក និងដាក់បន្ទុក មុននឹងចេញដីកាដំណោះស្រាយបញ្ជូនទៅជំនុំជម្រះ។
សហមេធាវីការពារក្ដីឱ្យលោក កឹម សុខា គឺលោក ចាន់ ចេន ឱ្យVODដឹងនៅថ្ងៃនេះ ថាទាំងការសាកសួរនៅសាលាដំបូង និងការស៊ើបអង្កេតជាង២ឆ្នាំកន្លងមកនេះ ចៅក្រមស៊ើបសួរ មិនបានបង្ហាញមុខជនបរទេសណាមួយថាជាភាគីពាក់ពាក់ព័ន្ធក្នុងសំណុំរឿងកូនក្ដីនេះទេ។ លោកថា ដូចនេះ សហមេធាវីសម្រេចប្តឹងករណីនេះទៅសាលាឧទ្ធរណ៍ ដើម្បីជួយរកយុត្តិធម៌ឱ្យកូនក្ដីតាមនីតិវិធី។
លោកថា៖ «កន្លងមក សមត្ថកិច្ចក្នុងការកសាងសំណុំរឿងកូនក្ដីខ្ញុំហ្នឹង ថាមានការឃុបឃិតជាមួយជនបរទេស ប៉ុន្តែ រហូតមកដល់ពេលនេះ យើងឃើញថា ចៅក្រមមិនទាន់បានសាកសួរទៅលើជនបរទេសណាមួយនៅឡើយទេ។ ជាងនេះទៀត ដើម្បីបំពេញនីតិវិធីច្បាប់ជាធរមានហ្នឹង ចៅក្រមមានភារកិច្ចស៊ើបទាំងដាក់បន្ទុក ឬដោះបន្ទុក ខ្ញុំអត់ទាន់មានឃើញការដោះបន្ទុកទៅលើកូនក្ដីរបស់ខ្ញុំ»។
តាមពាក្យបណ្ដឹងចុះថ្ងៃទី៧ ខែវិច្ឆកា ប្តឹងទៅសាលាដំបូង ដែលសុំទម្លាក់បទចោទលោក កឹម សុខា នោះសហមេធាវីការពារក្តីលើកឡើងថា៖
«ក្រោយពីចៅក្រមស៊ើបសួរអង្កេតអស់រយៈជាង២ឆ្នាំមកនេះ គ្មានតម្រុយណាមួយបញ្ជាក់ថា មានបរទេសណា សូម្បីតែម្នាក់មកត្រូវរ៉ូវ ឬសន្និដ្ឋិភាពជាមួយកូនក្ដីឡើយ ដូចនេះ វិមតិសង្ស័យត្រូវបានជាប្រយោជន៍ដល់ជនជាប់ចោទ តាមមាត្រា៣៨នៃរដ្ឋធម្មនុញ្ញដែលបញ្ញត្តិត្រូវតែលើកលែងចោទប្រកាន់ កឹម សុខា »។
គិតត្រឹមម៉ោងផ្សាយនេះ អ្នកនាំពាក្យសាលាឧទ្ធរណ៍ លោក ទូច ថារិទ្ធិ អះអាងថា មិនទាន់ទទួលបានពាក្យបណ្តឹងនេះពីសាលាដំបូងនៅឡើយទេ ខណៈVOD មិនអាចទាក់ទងចៅក្រមស៊ើបសួរ លោក គី ឫទ្ធី បាន។ ប៉ុន្តែ អ្នកនាំពាក្យក្រសួងយុត្តិធម៌ លោក ជិន ម៉ាលីន ពន្យល់ថា ការតតាំងក្តីតាមផ្លូវតុលាការ ជាសិទ្ធិរបស់មេធាវី។ ប៉ុន្តែ លោកថា ការបញ្ជូនសំណុំរឿងលោក កឹម សុខា ទៅជម្រះនេះ មិនរំលោភនីតិវិធីទេ ។
លោកថា៖ «ជានីតិវិធីរបស់តុលាការ គេទៅមុខអញ្ចឹងហើយ ចៅក្រមស៊ើបសួរបិទការស៊ើបសួរ រកឃើញថាមានមូលដ្ឋានក្នុងការចោទប្រកាន់ការចេញដីកាបញ្ជូនទៅជំនុំជម្រះ នីតិវិធីបន្ទាប់តុលាការនឹងចេញដីកាកំនត់ថ្ងៃជំនុំជម្រះ និងកោះហៅភាគីពាក់ព័ន្ធចូលសវនាការ ហើយបើគាត់មិនពេញចិត្តទៅនឹងនីតិវិធីហ្នឹងទេ គាត់អាចប្តឹងទាស់ទៅសាលាឧទ្ធរណ៍បាន ហើយសាលាឧទ្ធរណ៍គេនឹងសម្រេចថា តើបណ្តឹងរបស់គាត់ហ្នឹងមានមូលដ្ឋានគ្រប់តាមផ្លូវច្បាប់ ឬក៏អត់»។
អ្នកជំនាញផ្នែកច្បាប់ លោកមេធាវី សុក សំអឿន មានប្រសាសន៍ថា នីតិវិធីរបស់កម្ពុជាហាក់មានភាពស្មុគស្មាញ ដោយថា ជាធម្មតាកាលណាចៅក្រមចេញដំណោះស្រាយហើយ ការសម្រេចស្ថិតនៅលើចៅក្រមជម្រះ។ ប៉ុន្តែ ច្បាប់ក៏បើកចំហរឲ្យភាគីម្ខាងទៀត សុំទៅសភាស៊ើបសួរ ជំទាស់លើដំណោះស្រាយរបស់ចៅក្រមស៊ើបសួរដែរ។ ប៉ុន្តែ មេធាវីរូបនេះ ពន្យល់ទៀតថា ការប្តឹងជំទាស់នេះ ទំនងជាការសាកល្បងរបស់សហមេធាវីរបស់លោក កឹម សុខា ប៉ុន្តែ លោកថា ការតតាំងក្តីនេះ ពិបាកនឹងទទួលបានជោគជ័យ ។
លោកថា៖ «ដោយសាររឿងហ្នឹងជារឿងនយោបាយ មិនមែនជារឿងច្បាប់ ម្ល៉ោះហើយយើងស្មានអត់ត្រូវទេ»។
លោក កឹម សុខា ត្រូវបានសមត្ថកិច្ចឆ្មក់ចូលចាប់ខ្លួនទាំងយប់កាលពីថ្ងៃទី៣ ខែកញ្ញា ឆ្នាំ២១៧ ចោទថា ឃុបឃិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាលរបស់លោក ហ៊ុន សែន។ បន្ទាប់មក លោក កឹម សុខា ត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារត្រពាំងផ្លុង ជាប់ព្រំដែនវៀតណាម ស្ថិតក្នុងខេត្តត្បូងឃ្មុំ។ បទចោទនេះ លោក កឹម សុខា ត្រូវបានតុលាការបង្គាប់ឲ្យឃុំខ្លួនសរ៉ុបជាង២ឆ្នាំ ទាំងក្នុងពន្ធនាគារ និងនៅក្នុងផ្ទះ ទើបតែថ្ងៃ១០ ខែវិច្ឆិកា ទើបសាលាដំបូងរាជធានីភ្នំពេញ សម្រេចបន្ធូរបន្ថយលក្ខខណ្ឌ ដែលការបន្ធូរបន្ថយនេះធ្វើឱ្យលោក កឹម សុខា អាចជួបមន្ត្រីការទូតនានា និងអាចធ្វើដំណើរនៅទូទាំងប្រទេសបាន លើកលែងតែចេញទៅក្រៅប្រទេស និងធ្វើសកម្មភាពនយោបាយ។
ប៉ុន្តែ សម្រាប់សហរដ្ឋអាមេរិកវិញ ចាត់ទុកលោក កឹម សុខា ជាមនុស្សស្អាតស្អំ តែត្រូវបានចាប់ឃុំខ្លួនទាំងអយុត្តិធម៌ និងទាមទារឲ្យទម្លាក់បទចោទ។ ជម្លោះនយាបាយនេះ ធ្វើឲ្យកម្ពុជារងការគំរាមកំហែងកាត់ផ្តាច់ប្រព័ន្ធអនុគ្រោះពន្ធផ្នែកពាណិជ្ជកម្មពីសហភាពអឺរ៉ុប និងសហរដ្ឋអាមេរិក បើរដ្ឋាភិបាលមិនស្តារប្រជាធិបតេយ្យទាន់ពេល រួមទាំងការបើកផ្លូវឲ្យគណបក្សប្រឆាំងដែលបានរំលាយទៅហើយនោះ បានដំណើរការឡើងវិញទេនោះ។