សហមេធាវីការពារក្តីរបស់លោក កឹម សុខា បង្ហាញការខកចិត្តដែលតុលាការមិនព្រមទម្លាក់បទចោទកូនក្តីតាមការស្នើសុំ តែបែរជាបញ្ជូនសំណុំរឿងចម្រូងចម្រាសនេះទៅជំនុំជម្រះ។
សាលាដំបូងរាជធានីភ្នំពេញ កាលពីថ្ងៃចន្ទម្សិលមិញ ចេញប្រកាសថា សំណុំរឿងអតីតមេដឹកនាំគណបក្សប្រឆាំងលោក កឹម សុខា ដែលជាប់ចោទពីបទ «សន្និដ្ឋិភាពជាមួយបរទេស» ត្រូវបញ្ជូនទៅជំនុំជម្រះ។
តុលាការសំអាងថា ក្រោយពីបិទបញ្ចប់ការស្រាវជ្រាវ ចៅក្រមស៊ើបសួរពិនិត្យឃើញថា មានភស្តុតាងដាក់បន្ទុកគ្រប់គ្រាន់លើជនត្រូវចោទលោក កឹម សុខា ។
ប៉ុន្តែ សហមេធាវី លោក ចាន់ ចេន ប្រាប់VODនៅថ្ងៃនេះថា លោកមានការសោកស្តាយចំពោះចំណាត់ការនេះដោយលោកថា កាលពីថ្ងៃទី៧ ខែវិច្ឆិកា សហមេធាវីបានដាក់ពាក្យសុំឲ្យទម្លាក់បទចោទកូនក្តី តាមរយៈសម្របសម្រួលនយោបាយ ។
លោកថា៖ «កូនក្តីខ្ញុំគាត់ជាអ្នកនយោបាយ ហើយការគិតរបស់ខ្ញុំថា រឿងនេះវាពាក់ព័ន្ធទៅនឹងរឿងនយោបាយច្រើនជាង។ អីចឹង ក្នុងកាលៈទេសៈនេះ បើសិនជាតុលាការទម្លាក់ចោលបទចោទប្រកាន់លើកូនក្តីខ្ញុំបាទ ហើយទុកឱកាសឲ្យគាត់ជជែកគ្នាដើម្បីដោះស្រាយនូវអ្វីជាផលប្រយោជន៍ជាតិ និងផលប្រយោជន៍ប្រជាពលរដ្ឋ ខ្ញុំចង់ឃើញអីចឹងជាង»។
ទោះជាយ៉ាងណា មេធាវីរូបនេះសុំមិនបញ្ជាក់ថា អ្វីជាផលប្រយោជន៍ជាតិ ដែលបានពីការទម្លាក់បទចោទកូនក្តីលោក កឹម សុខា ទេ។
គិតត្រឹមថ្ងៃអង្គារនេះ រដ្ឋាភិបាលកម្ពុជាមានពេលតែ៩ថ្ងៃទៀតប៉ុណ្ណោះ សម្រាប់ឆ្លើយតបទៅនឹងសហភាពអឺរ៉ុប ដើម្បីរក្សាទុកប្រព័ន្ធអនុគ្រោះពន្ធEBA ពាក់ព័ន្ធទៅនឹងការដែលអឺរ៉ុបទាមទារឲ្យស្តារប្រជាធិបតេយ្យឡើងវិញ ក្នុងនោះមានទាំងការទាមទារឲ្យដោះលែងលោក កឹម សុខា ផងដែរ។
បើតាមលោក ចាន់ ចេន សហមេធាវីបានប្រាប់តុលាការ តាមរយៈលិខិតនោះថា ចៅក្រមស៊ើបសួរ លោក គី ឫទ្ធី បានចំណាយពេលជាង២ឆ្នាំមកហើយក្នុងការស៊ើបអង្កេត លោកថា ដូចនេះ«វិមតិសង្ស័យជាប្រយោជន៍របស់កូនក្តីលោក»។
