តួលេខរបស់ក្រុមហ៊ុនរបស់រដ្ឋាភិបាល បង្ហាញថា ចំនួនភ្ញៀវចូលទស្សនាតំបន់អង្គរបានធ្លាក់ចុះរយៈពេល១១ខែជាប់ៗគ្នា ដែលជំរុញឱ្យចំណូលបានពីការលក់សំបុត្រធ្លាក់ចុះបន្តទៀតនៅក្នុងឆ្នាំនេះ។
ក្នុងសេចក្តីប្រកាសព័ត៌មានកាលពីថ្ងៃម្សិលមិញនេះ គ្រឹះស្ថានអង្គរ ដែលជាក្រុមហ៊ុនឯកជនរបស់រដ្ឋទទួលបន្ទុកលើការលក់សំបុត្រចូលទស្សនារមណីយដ្ឋានអង្គរ បានឱ្យដឹងថា កម្ពុជារកចំណូលបានជាង ៨៩លានដុល្លារ តាមរយៈការលក់សំបុត្រសម្រាប់ភ្ញៀវទេសចរអន្តរជាតិនៅតំបន់អង្គរ ចន្លោះពីខែមករា ដល់ខែវិច្ឆិកាកន្លងមកនេះ។
តាមសេចក្តីប្រកាសដដែល ចំនួនទឹកប្រាក់នេះ គឺបានមកពីភ្ញៀវទេសចរទិញសំបុត្រចំនួន ១ ៩៩៧ ២៦៧នាក់ ថយចុះ១៤.០៣ភាគរយ ធៀបនឹងរយៈពេលដូចគ្នាក្នុងឆ្នាំ២០១៨។
ចំណូលបានមកពីការលក់សំបុត្រចូលទស្សនាតំបន់អង្គរ បានធ្លាក់ចុះពីចំនួនជាង ១០៤លានដុល្លារនៅក្នុងរយៈពេលដូចគ្នាកាលពីឆ្នាំមុន ឬធ្លាក់ចុះ ១៤.៣២ភាគរយ។
របាយការណ៍ដដែលឱ្យដឹងទៀតថា គិតត្រឹមខែវិច្ឆិកា ឆ្នាំ២០១៩ តំបន់ប្រាង្គប្រាសាទបុរាណរបស់កម្ពុជា ទទួលបានភ្ញៀវបរទេសចូលទស្សនាមានចំនួន ១៩៣ ២៦០នាក់ ថយចុះ ១៧.១០ភាគរយ ធៀបនឹងរយៈពេលដដែលក្នុងឆ្នាំ២០១៨ និងទទួលបានទឹកប្រាក់ពីការលក់សំបុត្រចំនួន ៨ ៨៥៤ ១៩០ដុល្លារអាមេរិក ថយចុះ១៦.៤៧ភាគរយ ធៀបនឹងរយៈពេលដដែលក្នុងឆ្នាំ២០១៨។
រដ្ឋមន្រ្តីក្រសួងទេសចរណ៍ លោក ថោង ខុន ធ្លាប់បានលើកឡើងក្នុងកិច្ចសម្ភាសន៍ជាមួយទូរទស្សន៍ក្នុងស្រុកមួយថា បញ្ហាធ្លាក់ចុះនៃកំណើនភ្ញៀវទេសចរអន្តរជាតិក្នុងខេត្តសៀមរាប គឺមួយផ្នែកដោយសារសង្គ្រាមពាណិជ្ជកម្មរវាងចិន-អាមេរិក ដែលប៉ះពាល់ចំណូលប្រជាជនទូទាំងពិភពលោក ពិសេសប្រជាជនចិន ដែលជាប្រភពទេសចរដ៏ធំរបស់កម្ពុជា និងមួយផ្នែកទៀត ដោយសារការលក់ផលិតផលអនុស្សាវរីយ៍ក្លែងក្លាយដល់ភ្ញៀវ។
ក្រសួងទេសចរណ៍ បានដាក់ចេញវិធានការ ១១ចំណុចក្នុងការលុបបំបាត់កញ្ចប់ទេសចរណ៍សូន្យ ដើម្បីការពារអ្នកទេសចរ និងរំពឹងថា ក្រោយលុបបំបាត់កញ្ចប់សេវានេះ វានឹងអាចធ្វើឱ្យមានអ្នកទេសចរណ៍កើនឡើងវិញ ខណៈក្រសួងក៏កំពុងសិក្សាលើវិធានការជាង២០ចំណុចទៀត ដើម្បីដាក់ចេញនៅឆ្នាំ២០២០ខាងមុខក្នុងការជំរុញឱ្យមានការកើនឡើងអ្នកទេសចរបរទេសឡើងវិញ៕