រដ្ឋមន្ត្រីមហាផ្ទៃ លោក ស ខេង បានទទួលស្គាល់ថា យុទ្ធនាការទប់ស្កាត់គ្រោះថ្នាក់ចរាចរណ៍បានទទួលបរាជ័យហើយ ខណៈដែលចំនួនមនុស្សស្លាប់នៅក្នុងគ្រោះថ្នាក់ចរាចរណ៍បានកើនឡើងពីមួយឆ្នាំទៅមួយឆ្នាំ។
រដ្ឋមន្ត្រីក្រសួងមហាផ្ទៃរូបនេះ បានថ្លែងទទួលស្គាល់បែបនេះនៅក្នុងអំឡុងពេលលោកចូលរួមក្នុងទិវាអន្តរជាតិរំឭកដល់ជនរងគ្រោះដោយគ្រោះចរាចរណ៍ផ្លូវគោក នៅព្រឹកថ្ងៃនេះ។
លោក ស ខេង ថ្លែងថា៖ «និន្នាការកើនឡើងនៃគ្រោះថ្នាក់ចរាចរណ៍នេះ គឺជាសញ្ញាមិនល្អទាល់តែសោះ។ ខ្ញុំទទួលស្គាល់ បើ [ទោះបី] ចង់នរណាវាយតម្លៃថា បរាជ័យ ក៏វាយតម្លៃទៅ»។
ជាមួយនឹងការថ្លែងទទួលស្គាល់បែបនេះ លោក ស ខេង ក៏បានអំពាវនាវទៅគ្រប់ភាគីទាំងអស់ឱ្យចូលរួមទប់ស្កាត់បញ្ហាកំណើនគ្រោះថ្នាក់ចរាចរណ៍ និងត្រូវទទួលស្គាល់ការពិតអំពីបញ្ហាមួយនេះ។
លោក ស ខេង ថ្លែងបន្តថា៖ «ប៉ុន្តែ សូមអំពាវនាវជួយគ្នា តើមានមធ្យោបាយអី មានគំនិតអី មានយោបល់យ៉ាងម៉េច សូមជួយមក ព្រោះអាហ្នឹង យើងត្រូវបង្ហាញជាក់ស្ដែង។ យើងមិនអាចភូតបន្លំទេ។ បរាជ័យថា ជោគជ័យហ្នឹង អាហ្នឹង វានិយាយភូតគេ គេមិនជឿទេ»។
ផ្អែកតាមតួលេខរបស់នគរបាលជាតិ គ្រោះថ្នាក់ចរាចរណ៍ ៣,៤៥៣លើក បានកើតឡើងនៅទូទាំងប្រទេស ដោយបានសម្លាប់មនុស្ស ១,៦៦៥នាក់ និងបណ្ដាលឱ្យមនុស្ស ៥,២១២នាក់ផ្សេងទៀតរងរបួសនៅក្នុងរយៈពេល ១០ខែក្នុងឆ្នាំ២០១៩នេះ។
លោក ស ខេង បានថ្លែងថា ចំនួនករណីគ្រោះថ្នាក់ចរាចរណ៍បានកើនឡើង ២៨ភាគរយ (៧៦០លើក) ខណៈចំនួនមនុស្សស្លាប់កើនឡើង ១៥១នាក់ ហើយចំនួនមនុស្សរងរបួស បានកើនឡើង ៣៣ភាគរយ ឬកើនឡើង ១,៣០៦នាក់។របាយការណ៍នគរបាលជាតិ បង្ហាញថា យ៉ាងហោចណាស់មនុស្ស ៥នាក់ បានស្លាប់ ហើយ ១៧នាក់ទៀតរងរបួសនៅក្នុងគ្រោះថ្នាក់ចរាចរណ៍ក្នុងមួយថ្ងៃៗ៕