ធនាគារពិភពលោកជំរុញទៅកម្ពុជាឱ្យកែលម្អគោលនយោបាយរបស់ខ្លួន ដើម្បីធានានូវគុណភាពការងារសម្រាប់ទីផ្សារនាពេលអនាគត ខណៈធនាគារមួយនេះរកឃើញថា ភាគច្រើននៃកម្លាំងកម្ពុជាកំពុងស្ថិតក្នុងវិស័យការងារបែប្រពៃណី ឬការងារពុំមានប្រព័ន្ធស្ថិរភាពពិតប្រាកដ។
របាយការណ៍របស់ធនាគារពិភពលោកចេញផ្សាយកាលថ្ងៃទី១៩ ខែវិច្ឆិកា បានឱ្យដឹងថា ប្រជាជនកម្ពុជាប្រឡូកក្នុងវិស័យការងារមានចំនួនប្រហែល ៨លាននាក់ ប៉ុន្តែ ពលរដ្ឋតែ ៣៧ភាគរយប៉ុណ្ណោះ កំពុងបម្រើការងារទទួលបានប្រាក់ឈ្នួលខ្ពស់ និងមានអត្ថប្រយោជន៍បន្ថែម ខណៈដែលកម្លាំងពលកម្មកម្ពុជា ៦៣ភាគរយទៀត បានចូលពាក់ព័ន្ធក្នុងការងារលក្ខណៈគ្រួសារ និងលក្ខណៈប្រពៃណីដែលមិនសូវមានស្ថិរភាព។
ធនាគារពិភពលោក លើកឡើងទៀតថា មួយភាគបីនៃពលកម្មដែលមានប្រាក់ឈ្នួលខ្ពស់ គឺស្ថិតនៅក្នុងក្រុមហ៊ុនគ្រប់គ្រងកាន់កាប់ដោយជនបរទេសនៅក្នុងឆ្នាំ២០១៥ ខណៈក្រុមហ៊ុនគ្រប់គ្រងដោយជនជាតិខ្មែរ មិនបានចូលរួមចំណែកបង្កើតការងារបានច្រើនដល់ពលរដ្ឋកម្ពុជានោះឡើយ បើទោះបីជាមានចំនួនច្រើនជាងក្រុមហ៊ុនបរទេសក៏ដោយ។
ធនាគារពិភពលោក បញ្ជាក់ថា ក្រុមហ៊ុនក្នុងស្រុកដែលគ្រប់គ្រងដោយជនជាតិខ្មែរ ជួលកម្មករជាមធ្យមប្រហែល ៨នាក់ប៉ុណ្ណោះក្នុងមួយក្រុមហ៊ុន បើប្រៀបធៀបជាមួយកម្មករខ្ទង់ ១២៤នាក់ ក្នុងក្រុមហ៊ុនគ្រប់គ្រងដោយជនបទេស។
ក្នុងរបាយការណ៍នោះ ធនាគារពិភពលោក បានលើកឡើងថា កម្ពុជាចាំបាច់ត្រូវមានគោលនយោបាយថ្មីៗដើម្បីធានាគុណភាពការងារសម្រាប់ទីផ្សារអនាគត។
បើតាមរបាយការណ៍នោះ ធនាគារពិភពលោកជំរុញមកកម្ពុជាឱ្យកែលម្អវិស័យនាំចេញធ្វើឱ្យមានភាពចម្រុះបែប និងជំរុញការវិនិយោគផ្ទាល់ពីបរទេសសំដៅទៅរកផលិតកម្មមានតម្លៃខ្ពស់ ជំរុញការគាំទ្រការតភ្ជាប់គ្នារវាងក្រុមហ៊ុនវិនិយោគបរទេសសម្រាប់ការនាំចេញ និងក្រុមហ៊ុនក្នុងស្រុក។
ជាងនេះទៅទៀត ធនាគារពិភពលោក បានជំរុញឱ្យកសាងប្រព័ន្ធអភិវឌ្ឍន៍ជំនាញសម្រាប់ទាក់ទាញការវិនិយោគពីបរទេសទៅលើឧស្សាហកម្មផលិតផលមានតម្លៃខ្ពស់ និងបង្កើនផលិតភាពនៅគ្រប់ផ្នែកនៃសេដ្ឋកិច្ច លើកកម្ពស់ការកៀរគរកម្លាំងពលកម្ម និងការផ្គូផ្គងជំនាញការងារឱ្យមានប្រសិទ្ធភាពខ្ពស់ និងលើកទឹកចិត្តដល់ការធ្វើចំណាកស្រុកវិលជុំ។
ធនាគារពិភពលោក រកឃើញថា បញ្ហាប្រឈមធំមួយទៀតនោះ គឺពលករខ្មែរខ្វះជំនាញចាំបាច់ ដើម្បីអាចទៅប្រកួតប្រជែងជាមួយកម្មករមកពីប្រទេសផ្សេងៗទៀត ក្នុងការស្វែងរកការងារធ្វើក្នុងក្រុមហ៊ុនគ្រប់គ្រងដោយជនបរទេស។
នាយកគ្រប់គ្រងធនាគារពិភពលោកប្រចាំកម្ពុជា លោកស្រី អ៊ិនហ្គូណា ដូប្រាចា បានលើកឡើងនៅក្នុងសេចក្ដីប្រកាសព័ត៌មាននោះថា កម្ពុជាត្រូវតែគិតគូរឡើងវិញអំពីគោលនយោបាយរបស់ខ្លួន ដែលស្របទៅតាមដំណើរវិវត្តន៍នៃស្ថានភាពសេដ្ឋកិច្ច និងទីផ្សារអន្តរជាតិ។
លោកស្រី អ៊ិនហ្គូណា ដូប្រាចា លើកឡើងថា៖ «ប៉ុន្តែ និន្នាការសកល មានដូចជាការកើនឡើងនូវចំនួនរបស់វណ្ណៈកណ្តាលក្នុងតំបន់អាស៊ី បម្រែបម្រួលលំនាំក្នុងការធ្វើពាណិជ្ជកម្ម និងស្វ័យប្រវត្តិកម្ម ដែលតម្រូវឱ្យកម្ពុជាត្រូវគិតគូរឡើងវិញអំពីយុទ្ធសាស្ត្រការងាររបស់ខ្លួន ខណៈដែលប្រទេសនេះកំពុងឆ្ពោះទៅកាន់ដំណាក់កាលមួយទៀតនៃការអភិវឌ្ឍផ្នែកលើការនាំចេញ»។
វីអូឌីមិនអាចសុំការឆ្លើយតបពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានទេជុំវិញរបាយការណ៍របស់ធនាគារពិភពលោកនេះ។
ប្រធានសហភាពការងារកម្ពុជា លោក អាត់ ធន់ បានយល់ស្របទៅនឹងការរកឃើញរបស់ធនាគារពិភពលោកនេះ ហើយថា រដ្ឋាភិបាលគួរតែទទួលយកអនុសាសន៍របស់ធនាគារពិភពលោក យកទៅអនុវត្តដើម្បីពង្រឹងគុណភាពការងារក្នុងប្រទេសកម្ពុជា។
ប្រធានសហភាពការងាររូបនេះលើកឡើងថា កម្ពុជាពុំទាន់មានកម្លាំងពលកម្មជំនាញបច្ចេកទេសគ្រាប់គ្រាន់នៅឡើយទេ ដោយលោកថា កម្លាំងជំនាញបច្ចេកទេសដែលធ្វើការងារថ្នាក់កណ្ដាល និងថ្នាក់ខ្ពស់ភាគច្រើនជាជនបរទេស។
លោក អាត់ ធន់ ប្រាប់ថា៖ «កម្ពុជាត្រូវយកចិត្តទុកដាក់ ដោយចាប់ផ្តើមបញ្ចូលកម្មករខ្មែរហ្នឹងឱ្យទៅជាអ្នកគ្រប់គ្រងថ្នាក់កណ្តាល និងថ្នាក់ខ្ពស់ដើម្បីកាត់បន្ថយជនបរទេសបណ្តើរទៅ កុំឱ្យដូចបច្ចុប្បន្នហ្នឹង គេតម្រូវឱ្យជនបរទេសតែ ១០ភាគរយ ប៉ុន្តែ កន្លែងខ្លះវាលើស ១០ភាគរយ។ ដូចក្នុងវិស័យសំណង់ហ្នឹង សូម្បីតែកម្មករធម្មតាក៏នាំចូលពីក្រៅប្រទេសដែរ។ អ៊ីចឹងវាជាការធ្វើឱ្យខាតបង់ដល់ឱកាសវិនិយោគ ឱកាសការងារ និងប្រាក់ចំណូលរបស់ប្រជាពលរដ្ឋខ្មែរយើងច្រើនណាស់»។
ប្រធានសហភាពការងារកម្ពុជា លោក អាត់ ធន់ លើកឡើងថា ប្រសិនបើពុំមានការបណ្តុះបណ្តាលច្បាស់លាស់ ហើយកម្ពុជានៅតែខ្វះកម្លាំងពលកម្មជំនាញនោះ គឺមិនអាចប្រកួតប្រជែង ឬទាញយកប្រយោជន៍នៃឱកាសការងារនៅលើទីផ្សារពិភពលោកនាពេលអនាគតបានឡើយ។
របាយការណ៍ធនាគារពិភពលោក ឱ្យដឹងថា ៣៧.៦ភាគរយនៃក្រុមហ៊ុននាំចេញទាំងអស់កាលពីឆ្នាំ២០១៦ លើកឡើងថា កម្លាំងពលកម្មដែលមានការអប់រំជំនាញមិនគ្រប់គ្រាន់ ជាឧបសគ្គដល់ការធ្វើអាជីវកម្ម៕