លោកនាយករដ្ឋមន្ត្រី ហ៊ុន សែន អះអាងថា កម្ពុជាជាប្រទេសគ្រប់គ្រងដោយនីតិរដ្ឋ បើកផ្លូវឱ្យពលរដ្ឋជ្រើសរើសមេដឹកនាំទៅតាមគោលការណ៍ច្បាប់ និងគោលការណ៍ប្រជាធិបតេយ្យសេរីពហុបក្ស។
ការថ្លែងរបស់លោកនាយករដ្ឋមន្ត្រីបែបនេះ ធ្វើឡើងក្នុងពិធីបើកកិច្ចប្រជុំកំពូលអាស៊ីប៉ាស៊ីហ្វិក នៅរាជធានីភ្នំពេញ ដែលមានអ្នកចូលរួមប្រតិភូអន្តរជាតិ ៨០០នាក់ មកពី ៤៨ប្រទេសនៅតំបន់អាស៊ីប៉ាស៊ីហ្វិក។
លោក ហ៊ុន សែន ថ្លែងថា៖ «បច្ចុប្បន្នកម្ពុជា ជាប្រទេសដែលគ្រប់គ្រងដោយនីតិរដ្ឋគោរពយ៉ាងខ្ជាប់ខ្ជួននូវគោលការណ៍ប្រជាធិបតេយ្យសេរីពហុបក្សជាមួយនឹងការរៀបចំការបោះឆ្នោតយ៉ាងទៀងទាត់ សេរី និងយុត្តិធម៌ ដើម្បីផ្តល់សិទ្ធិឱ្យប្រជាពលរដ្ឋជ្រើសរើសមេដឹកនាំដែលគោរពគោលការណ៍ច្បាប់ និងរដ្ឋអធិបតេយ្យដែលមានឯករាជ្យបូរណភាពទឹកដីពេញលេញ»។
លោក ហ៊ុន សែន ថ្លែងថា សន្តិភាពដែលកម្ពុជារក្សាបានរហូតបច្ចុប្បន្ននេះ កើតចេញពីយុទ្ធសាស្ត្រឈ្នះៗរបស់រដ្ឋាភិបាល។ លោកថា តាមយុទ្ធសាស្ត្រនេះ កម្ពុជាកាលពីជាង ២០ឆ្នាំកន្លងទៅ ធ្លាប់ល្បីខាងប្រើអាវុធដណ្តើមអំណាចគ្នា និងមានការផ្លាស់ប្តូររបបដឹកនាំញឹកញាប់នោះ បានក្លាយជាប្រទេសគ្រប់គ្រងដោយនីតិរដ្ឋ។
ការលើកឡើងរបស់នាយករដ្ឋមន្ត្រីកម្ពុជានេះ ចំពេលដែលកម្ពុជាកំពុងប្រឈមទៅនឹងការគំរាមកំហែងកាត់ផ្តាច់ប្រព័ន្ធអនុគ្រោះផ្នែកពាណិជ្ជកម្មពីសហគមន៍អន្តរជាតិនៃប្រទេសលោកសេរី ពិសេសសហភាពអឺរ៉ុប ដែលកំពុងជំរុញឱ្យរដ្ឋាភិបាលស្តារប្រជាធិបតេយ្យឡើងវិញ ដោយសារតែការរៀបចំការបោះឆ្នោតជាតិនៅឆ្នាំ២០១៨ ផាត់គណបក្សប្រឆាំងដែលមានអ្នកគាំទ្រជាង ៣លាននាក់ ស្មើនឹង៤២ភាគរយ ចេញពីឆាកនយោបាយ។
អតីតមន្ត្រីគណបក្សសង្គ្រោះជាតិ លោក មាជ សុវណ្ណារ៉ា ហៅសារនយោបាយរបស់មេដឹកនាំបក្សកាន់អំណាចនេះថា ជាការគេចចេញពីការទទួលខុសត្រូវចំពោះមុខសហគមន៍អន្តរជាតិដែលកំពុងជំរុញឱ្យស្តារប្រជាធិបតេយ្យតែប៉ុណ្ណោះ។
លោក មាជ សុវណ្ណារ៉ា ថ្លែងថា៖ «យើងឃើញហើយ ការរំលាយគណបក្សប្រឆាំងដ៏ធំមួយក្នុងការប្រកួតប្រជែងគ្នាក្នុងលទ្ធិប្រជាធិបតេយ្យ និងគោរពសិទ្ធិមនុស្សហ្នឹងស្ថិតក្នុងភាពគំរាមកំហែងបំភិតបំភ័យ ដែលគេហៅថា មិនទាន់មានសុចរិតភាព តម្លាភាពក្នុងដំណើរការប្រជាធិបតេយ្យ បើនិយាយឱ្យចំទៅ»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ហៅការលើកឡើងរបស់រដ្ឋាភិបាល ត្រូវមួយផ្នែកព្រោះមេដឹកនាំរូបនេះបានចូលរួមចំណែកបង្កើតឱ្យមានកិច្ចព្រមព្រៀងសន្តិភាពទីក្រុងប៉ារីស ១៩៩១ ដែលកិច្ចព្រមព្រៀងនេះតម្រូវឱ្យភាគីកម្ពុជា ទម្លាក់អាវុធ និងងាកទៅអនុវត្តគោលការណ៍ប្រជាធិបតេយ្យ។
ប៉ុន្តែ អ្នកឃ្លាំមើលសិទ្ធិមនុស្សរូបនេះ អះអាងថា មួយរយៈចុងក្រោយនេះ រដ្ឋាភិបាលរងការរិះគន់ថា ធ្វើឱ្យដំណើរការប្រជាធិបតេយ្យដើរថយក្រោយ ពិសេសការរំលាយគណបក្សប្រឆាំង។
លោក អំ សំអាត ប្រាប់ថា៖ «យើងមិនបដិសេធទេរឿងសង្គ្រាមស៊ីវិល ប៉ុន្តែ ទាក់ទងទៅនឹងបញ្ហាលទ្ធិប្រជាធិបតេយ្យ និងការគោរពសិទ្ធិមនុស្ស យើងនៅមានកម្រិតនៅឡើយ បានន័យថា យើងមិនទាន់គោរពឱ្យបានពេញលេញ ហើយមិនទាន់មើលឃើញថា កម្ពុជាយើងក្លាយទៅជាប្រទេសគោរពនីតិរដ្ឋពេញលេញនៅឡើយទេ»។
អង្គការគម្រោងយុត្តិធម៌ពិភពលោក (World Justice Project) ដែលមានមូលដ្ឋានក្នុងរដ្ឋធានីវ៉ាស៊ីនតោន បានចេញរបាយការណ៍កាលពីខែកុម្ភៈឆ្នាំនេះ វាយតម្លៃពីកម្រិតនីតិរដ្ឋនៅកម្ពុជាថា ស្ថិតនៅបាតតារាង ជាប់លេខ ១១២ ក្នុងចំណោម ១១៣ប្រទេសក្នុងពិភពលោក នៅលើប្រទេសវេណេស៊ូអេឡាមួយតែប៉ុណ្ណោះ។
តាមរបាយការណ៍ បានផ្តល់ពិន្ទុ ០,៣២ ឱ្យកម្ពុជាសម្រាប់ការគោរព-អនុវត្តច្បាប់ អភិបាលកិច្ច ការប្រឆាំងអំពើពុករលួយ សន្តិសុខសណ្ដាប់ធ្នាប់ និងប្រព័ន្ធយុត្តិធម៌។
ទោះជាយ៉ាងណា នាយករដ្ឋមន្ត្រីកម្ពុជា អះអាងថា តាមរយៈនៃការរក្សាបានសន្តិភាពនេះ ពលរដ្ឋកម្ពុជាទទួលបានឱកាសការងារ ដើម្បីលើកស្ទួយជីវភាពរស់នៅប្រចាំថ្ងៃ ហើយកម្ពុជាក្លាយជាប្រទេសចូលរួមយ៉ាងសកម្មក្នុងការចូលរួមថែរក្សាសន្តិសុខពិភពលោកតាមរយៈបញ្ជូនកងរក្សាសន្តិភាព និងក្រុមដោះមីន ទៅកាន់ប្រទេសនានានៅលើសកលលោកក្រោមឆ័ត្រអង្គការសហប្រជាជាតិ ដូចជានៅលីបង់ ស៊ូដង់ ម៉ាលី និងអាហ្វ្រិកកណ្តាល ជាដើម៕
