មន្ត្រីជាន់ខ្ពស់រដ្ឋាភិបាល ប្រកាសជាសាធារណៈថា កម្ពុជាត្រូវការថវិកាជាច្រើនទៀតពីប្រទេសចិន ដើម្បីអភិវឌ្ឍហេដ្ឋារចនាសម្ព័ន្ធនៅទូទាំងប្រទេស។
តម្រូវការថវិកាពីចិនសម្រាប់កសាងហេដ្ឋារចនាសម្ព័ន្ធនៅកម្ពុជានេះ ត្រូវបានរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ប្រកាសជាសាធារណៈនៅថ្ងៃនេះ ក្នុងពិពណ៌«សម្ភារផ្គត់ផ្គង់ និងផលិតផលឧស្សាហកម្មខេត្តហ៊ូណាន ប្រទេសចិន» នៅរាជធានីភ្នំពេញ។
នៅចំពោះមុខអ្នកនយោបាយចិន និងអ្នករកស៊ីចិនរាប់សិបនាក់ លោក ស៊ុន ចាន់ថុល ថ្លែងអំណរគុណចំពោះរដ្ឋាភិបាលចិន ដែលបានផ្តល់ប្រាក់ឱ្យកម្ពុជាខ្ចីយកទៅកសាងផ្លូវស្ពាននាពេលកន្លងមក។
លោក ស៊ុន ចាន់ថុល ថ្លែងថា៖ «សូមលើកទឹកចិត្តដល់អ្នកវិនយោគ(ចិន)ទាំងអស់ សូមចូលរួមជាមួយរដ្ឋាភិបាលកម្ពុជា សហការជាមួយក្រសួងសាធារណការ និងដឹកជញ្ជូន ដើម្បីកសាងហេដ្ឋារចនាសម្ព័ន្ធបន្ថែមទៀត ដែលកំពុងមានតម្រូវការចាំបាច់។ យើងសង្ឃឹមជឿជាក់ថា ផ្អែកតាមទំនាក់ទំនងល្អរវាងកម្ពុជា និងចិន នឹងជំរុញអ្នកវិនយោគចិនច្រើនថែមទៀតមករកស៊ីនៅកម្ពុជា»។
សមាជិកមជ្ឈឹមបក្សកុម្មុយនីស្តចិន លោក ឌូ ឆាហាវ ថ្លែងថា ចិនជាមិត្តរបស់កម្ពុជាតាំងពីអតីតកាល បច្ចុប្បន្នកាល និងទៅអនាគត។ លោកបន្តថា កម្ពុជាជាទីតាំងយុទ្ធសាស្ត្រមួយក្នុងគោលនយោបាយ«ផ្លូវមួយខ្សែក្រវ៉ាត់មួយ»របស់ចិន ហើយថា ចិននៅតែជួយកម្ពុជាតាមវិធានការជាក់ស្តែង ពិសេសគឺការជំរុញអ្នកវិនយោគចិនមករកស៊ីនៅកម្ពុជា។
លោក ឌូ ឆាហាវ៖ «កម្ពុជាជាសមាជិកមួយក្នុងយុទ្ធសាស្ត្រខ្សែក្រវ៉ាត់មួយផ្លូវមួយ ស្ថិតនៅក្នុងតំបន់ភូមិសាស្ត្រដ៏សំខាន់ក្នុងអាស៊ាន ដែលតម្រូវឱ្យមានការវិនិយោគលើវិស័យហេដ្ឋារចនាសម្ព័ន្ធ រួមផ្សំនឹងធនធានដែលកម្ពុជាមានស្រាប់ បង្កើតជាផែនការងារវាសនាតែមួយរវាងកម្ពុជា និងចិន»។
បើតាមរដ្ឋមន្ត្រី ស៊ុន ចាន់ថុល កម្ពុជាបានជំពាក់ថវិកាចិនជិត ៣ពាន់លានដុល្លារ (២ ៨៩០លានដុល្លារ) រួចមកហើយក្នុងគម្រោងសាងសង់ហេដ្ឋារចនាសម្ព័ន្ធនៅកម្ពុជាប្រវែងសរុបចំនួន ៣ ២៤៧គីឡូម៉ែត្រ។
នៅឆ្នាំ២០១៩នេះ ក្រុមហ៊ុនចិនមួយឈ្មោះ China Road and Bridge Corporation បានផ្តើមសង់ផ្លូវល្បឿនលឿនពីភ្នំពេញទៅខេត្តព្រះសីហនុ ប្រវែង ១៩០គីឡូម៉ែត្រ ដោយប្រកាសថា ត្រូវចំណាយថវិកាសាងសង់អស់ជាង ២ពាន់លានដុល្លារ ឬផ្លូវមួយគីឡូម៉ែត្រត្រូវចំណាយថវិកាអស់ជាង ១០លានដុល្លារ។ ផ្លូវនេះសង់ទុកសម្រាប់ជួលឱ្យអ្នកដំណើរជិះ បង់លុយក្នុងរយៈពេល ៣០ឆ្នាំ។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ប្រាប់ថា ហេដ្ឋារចនាសម្ព័ន្ធនៅកម្ពុជា ដូចយ៉ាងខេត្តព្រះសីហនុជាដើម បានរងការខូចខាតយ៉ាងដំណំដោយសារកំណើនយ៉ាងសន្ធឹករបស់វិនិយោគគិនពីប្រទេសចិន។
លោក សន ជ័យ បន្តថា កម្ពុជាត្រូវស្នើទៅចិនដើម្បីជួយជំនួយឥតសំណងខ្លះយកមកជួសជុលផ្លូវទាំងនេះ ប៉ុន្តែ លោក សន ជ័យ បញ្ជាក់ថា លោកចង់ឃើញការសាងសង់ផ្លូវមានគុណភាព ជាជាងចាំតែខ្ចីលុយចិនមកសង់ផ្លូវ។
លោក សន ជ័យ៖ «ការខូចខាតផ្លូវនៅកម្ពុជា បណ្ដាលមកពីកត្តាសំខាន់ គឺការអនុវត្តច្បាប់ផ្លូវថ្នល់បានពេញលេញ និងអំពើពុករលួយក្នុងពេលសង់ផ្លូវម្ដងៗ។ ជាដំណោះស្រាយ ត្រូវពិនិត្យលើការអនុវត្តគម្រោងផ្សេងៗទាក់ទងតាំងពីការដេញថ្លៃធ្វើផ្លូវ និងដំណោះស្រាយមួយទៀត គឺការពង្រឹងច្បាប់ផ្លូវថ្នល់»។
ប្រទេសចិនជាម្ចាស់បំណុលធំជាងគេនៅកម្ពុជា ដោយក្ដោបក្ដាប់បំណុលកម្ពុជាប្រមាណគឺស្មើនឹងជាង ៤ពាន់៧រយលានដុល្លារអាមេរិក ឬស្មើនឹងប្រមាណជិត ៤០ភាគរយ នៃបំណុលសរុបដែលកម្ពុជាជំពាក់បរទេស៕