លោកនាយករដ្ឋមន្ត្រី ហ៊ុន សែន ថ្លែងនៅថ្ងៃនេះថា សំណុំរឿងប្រឆាំងលោក កឹម សុខា នឹងមិនមានការលើកលែងការចោទប្រកាន់នោះទេ ហើយថ្លែងបន្តថា សំណុំរឿងមួយនេះ នឹងត្រូវបន្តទៅតាមនីតិវិធីរបស់តុលាការបន្តទៀត។
ថ្លែងក្នុងពិធីចែកសញ្ញាបត្រនៅព្រឹកនេះ លោក ហ៊ុន សែន ថ្លែងថា ដំណើរការរឿងក្ដីលោក កឹម សុខា ត្រូវប្រើរយៈពេលយូរបន្តទៀត ខណៈលោកថា គ្មានការលើកលែងការចោទប្រកាន់នោះឡើយ។
លោក ហ៊ុន សែន ថ្លែងថា៖ «លើកលែងការចោទប្រកាន់ក៏អត់ទេ! អាហ្នឹង គឺរឿងតុលាការគេចោទប្រកាន់រួចទៅហើយតើ ហើយសមត្ថកិច្ចរបស់តុលាការ មិនដឹងជាកាត់ពេលណាអីពេលណា? គេគ្រាន់តែបិទការស៊ើបអង្កេតតែប៉ុណ្ណោះ ដើម្បីបញ្ជូនទៅជម្រះ តែរឿងជម្រះពេលណាជារឿងរបស់តុលាការ យើងអត់មានសិទ្ធិទៅជ្រៀតជ្រែកទេ»។
កាលពីថ្ងៃទី១៥ ខែវិច្ឆិកាកន្លងទៅ ចៅក្រមស៊ើបសួរសាលាដំបូងរាជធានីភ្នំពេញ លោក គី ឬទ្ធី បានសម្រេចបិទការស៊ើបសួរលើករណីលោក កឹម សុខា។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ឱ្យដឹងថា តុលាការនៅមិនទាន់មាននីតិវិធីថ្មីទាក់ទងនឹងសំណុំរឿងលោក កឹម សុខា នៅឡើយទេ។
យោងតាមក្រមនីតិវិធីព្រហ្មទណ្ឌ នីតិវិធីបន្តក្រោយពីបញ្ចប់ការស៊ើបសួរនេះ អាចមានរយៈពេល ១ខែចាប់ពីពេលដែលព្រះរាជអាជ្ញាទទួលបានសំណុំរឿង។
យោងតាមមាត្រា២៤៦ នៃក្រមនីតិវិធីព្រហ្មទណ្ឌនៅពេលដែលព្រះរាជអាជ្ញាទទួលការជូនដំណឹងពីចៅក្រមពីការបិទការស៊ើបសួរ និងយល់ឃើញដូចចៅក្រមពីការបញ្ចប់ការស៊ើបសួរនោះ ព្រះរាជអាជ្ញាធ្វើសេចក្តីសន្និដ្ឋានស្ថាពរជាលាយលក្ខណ៍អក្សរ និងមានសំអាងហេតុ។ ព្រះរាជអាជ្ញាអាចប្ដឹងសុំឱ្យចៅក្រមស៊ើបសួរសម្រេចបញ្ជូនខ្លួនជនត្រូវចោទ ទៅកាន់តុលាការជំនុំជម្រះ ឬក៏លើកលែងការចោទប្រកាន់បាន។
លោកស្រីមេធាវី ម៉េង សុភារី សហមេធាវីការពារក្ដីឱ្យលោក កឹម សុខា និយាយថា លោកស្រីមិនទាន់អាចឆ្លើយតបយ៉ាងណានោះទេ ដោយរង់ចាំសេចក្តីសម្រេចពីតុលាការជាមុនសិន។
លោកស្រី ម៉េង សុភារី ប្រាប់ថា៖ «រហូតមកដល់ពេលនេះ ក្រុមមេធាវីខ្ញុំអត់ទាន់បានទទួលដីកាដំណោះស្រាយទាក់ទងនឹងការបញ្ជូនទៅជំនុំជម្រះនៅឡើយទេ អញ្ចឹងចាំមើលដីកាដំណោះស្រាយរបស់ចៅក្រមស៊ើបសួរសិនថាតើគាត់ជាដីកាដំណោះស្រាយក្នុងការបញ្ជូនទៅជំនុំជម្រះ ឬក៏យ៉ាងណា?»។
សហភាពអឺរ៉ុបដែលមានសមាជិក ២៨ប្រទេស បញ្ចប់របាយការណ៍ស៊ើបអង្កេតលើបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ហើយបានបញ្ជូនលទ្ធផលនៃការស៊ើបអង្កេតនោះមករដ្ឋាភិបាលកម្ពុជារួចហើយកាលពីថ្ងៃទី១២ ខែវិច្ឆិកា។ សហភាពអឺរ៉ុបទុកពេល ១ខែឱ្យកម្ពុជាឆ្លើយតបនឹងរបាយការណ៍នេះ មុននឹងសម្រេចថា ព្យួរ ឬមិនព្យួរប្រព័ន្ធអនុគ្រោះពន្ធផ្នែកពាណិជ្ជកម្ម «អ្វីគ្រប់យ៉ាងលើកលែងតែអាវុធ» ឬហៅកាត់ថា (EBA) នៅក្នុងខែកុម្ភៈឆ្នាំក្រោយ។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី មានប្រសាសន៍ថា ការមិនទម្លាក់ចោលការចោទប្រកាន់លើលោក កឹម សុខា នឹងធ្វើឱ្យអន្តរជាតិបង្កើនសម្ពាធបន្ថែមទៀតមកលើប្រទេសកម្ពុជា ដែលនឹងធ្វើឱ្យប៉ះពាល់កាន់តែខ្លាំងលើវិស័យសេដ្ឋកិច្ច និងសង្គម។
លោក មួង សូនី ប្រាប់ថា៖ «ខ្ញុំគិតថា ក្រោយពីរឿងសេដ្ឋកិច្ច EBA ហ្នឹង វាអាចនឹងមានរឿងផ្សេងទៀត ព្រោះលោកសេរី អឺរ៉ុបហ្នឹងគេមិនទុកឱ្យកម្ពុជាដឹកនាំបែបផ្ដាច់ការ គ្មានប្រជាធិបតេយ្យសេរីពហុបក្សទេ។ ខ្ញុំគិតថា គេនឹងមានវិធានការទៅមុខទៀត ដែលវិធានការចម្បងដែលមុនគេហ្នឹងគឺការបាត់បង់ EBA ដែលប្រឈមនឹងវិបត្តិសង្គម និងសេដ្ឋកិច្ច»។
លោក កឹម សុខា អាយុ ៦៦ឆ្នាំ ត្រូវបានសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ ហើយត្រូវបានបញ្ជូនទៅឃុំខ្លួននៅឯពន្ធនាគារត្រពាំងផ្លុង ស្ថិតនៅជិតព្រំដែនកម្ពុជា-វៀតណាម មុននឹងលោកត្រូវបានដាក់ឱ្យស្ថិតនៅក្រោមការឃុំខ្លួនក្នុងផ្ទះ ក្រោមបទចោទ«ក្បត់ជាតិ»។
លោក កឹម សុខា ត្រូវបានតុលាការផ្ដល់សេរីភាពឱ្យវិញកាលពីថ្ងៃទី១០ ខែវិច្ឆិកា តែភ្ជាប់លក្ខខណ្ឌមិនឱ្យចេញក្រៅប្រទេស និងហាមធ្វើនយោបាយ។
អ្នករាយការណ៍ពិសេសអង្គការសហប្រជាជាតិប្រចាំនៅកម្ពុជា អ្នកស្រី រ៉ូណា ស្មីត (Rhona Smith) បានសម្តែងការសោកស្តាយដែលតុលាការមិនទម្លាក់ចោលបទចោទទាំងស្រុងលើលោក កឹម សុខា ដោយទទូចឱ្យតុលាការ បិទបញ្ចប់ការស៊ើបសួរឱ្យបានឆាប់រហ័ស ឬក៏ទម្លាក់ចោលបទចោទប្រកាន់ទាំងឡាយប្រឆាំងនឹងលោកផងដែរ៕