ថ្នាក់ដឹកនាំគណបក្សមួយចំនួនជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ បានលើកឡើងថា វិធានការ EU ដាក់សម្ពាធលើកម្ពុជាជារដ្ឋឯករាជ្យនោះ ធ្វើឡើងក្រោមហេតុផលនយោបាយ និងផ្ទុយពីច្បាប់អន្តរជាតិ។
ការលើកឡើងរបស់ឧត្តមក្រុមប្រឹក្សាពិគ្រោះ និងផ្តល់យោបល់ បន្ទាប់ពីសហភាពអឺរ៉ុបប្រកាសកាលពីថ្ងៃទី១២ ខែវិច្ឆិកា ឆ្នាំ២០១៩ ថា បានបញ្ចប់របាយការណ៍ស្តីពីការព្យួរប្រព័ន្ធអនុគ្រោះពន្ធជាបណ្តោះអាសន្ន ហើយបានបញ្ជូនរបាយការណ៍នេះទៅឱ្យរដ្ឋាភិបាលកម្ពុជាដោយទុករយៈពេល១ខែ ដើម្បីឱ្យធ្វើការឆ្លើយតប។
ប្រធានគណបក្សយុវជនកម្ពុជា លោក ពេជ្រ ស្រស់ មានប្រសាសន៍ថា លោកមិនមានគម្រោងលើកយកបញ្ហាការព្រមានដកប្រព័ន្ធអនុគ្រោះពន្ធទៅជជែកជាមួយរដ្ឋាភិបាលនោះទេ។ លោកបន្តថា ការទាមទាររបស់សហភាពអឺរ៉ុបជារឿងនយោបាយ និងជាការរំលោភអធិបតេយ្យភាពកម្ពុជា ដែលហៅថា ខុសទៅនឹងច្បាប់អន្តរជាតិ។
«ខ្ញុំមើលឃើញលក្ខខណ្ឌស្មើនឹងបញ្ជារដ្ឋាភិបាលមួយហើយ ក្នុងនាមខ្លួនជាអង្គការពិភពលោកមកបញ្ជារដ្ឋាភិបាលមួយដែលមានអធិបតេយ្យភាព វាមិនសមរម្យ វាខុសច្បាប់អន្តរជាតិ។»
ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង លើកឡើងដែរថា លោកមិនចាប់អារម្មណ៍រឿងប្រព័ន្ធអនុគ្រោះពន្ធរបស់អឺរ៉ុបដែលភ្ជាប់ជាមួយលក្ខខណ្ឌនយោបាយនោះទេ។
«ខ្ញុំអត់សំខាន់ទេ ប្រសិនជាគេឈរលើមូលដ្ឋាន ការចូលអភិវឌ្ឍន៍កម្ពុជា ដោយការផ្ដល់ប្រព័ន្ធអនុគ្រោះពន្ធ ជួយសម្រួលពន្ធនានា ហើយបើគេមិនផ្ដល់ យើងបង់ពន្ធទៅ។ ប៉ុន្តែ បើគេផ្ដល់ជាការផ្ដល់មួយដោយមិនភ្ជាប់លក្ខខណ្ឌនយោបាយ យើងអាចនឹងពិចារណាអីផ្សេង សុខៗគេចង់ផ្ដាច់ អាហ្នឹងយើងអាចពិចារណាផ្សេងសម្រាប់ខ្ញុំ ប៉ុន្តែ បើលក្ខខណ្ឌនយោបាយចេះចុះអី អាហ្នឹងខ្ញុំយល់ថា រឿងអីយើងគួរតែរៀបចំកិច្ចការនយោបាយប្រទេសទៅតាមការបញ្ជាដើម្បីរក្សាប្រព័ន្ធអនុគ្រោះពន្ធ ដើម្បីតាមការបញ្ជារបស់បរទេស ដើម្បីប្រព័ន្ធអនុគ្រោះពន្ធ ធ្វើអ៊ីចឹងអត់ត្រូវទេ»។
ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ ក៏យល់ថា បញ្ហានេះជារឿងនយោបាយដែរ។ លោក ម៉ម សូណង់ដូ ថាលោកមិនមានយោបល់អ្វីទេគឺគាំទ្រលើចំណាត់ការរបស់រដ្ឋាភិបាល។
«ពីមុនហ្នឹង មានគណបក្សប្រឆាំងហ្នឹង វារញ៉េរញ៉ៃ វាមិនមែនយកបញ្ហាជាតិមកដោះស្រាយទេ វាយកចំណុចខ្សោយប្រទេសជាតិ ដើម្បីទាមទារអំណាច ដើម្បីឈ្នះឆ្នោត ដូច្នេះប្រទេសយើងវាវ៉ល់ ការមិនយកបញ្ហាហ្នឹងទៅលើកនិយាយជាមួយរាជរដ្ឋាភិបាល ពីព្រោះខ្ញុំស្របគោលការណ៍រដ្ឋាភិបាល គឺយើងអត់មានជម្រើសទេ ត្រូវតែដាក់ចង្កូត ដាក់គន្លឹះឱ្យស្រួល ទៅទិសដៅណាដែលយើងបានកំណត់ »។
អតីតតំណាងរាស្រ្តគណបក្សសង្រ្គោះជាតិ លោក អ៊ូរ ច័ន្ទរ័ត្ន មានប្រសាសន៍ថា ប្រព័ន្ធអនុគ្រោះពន្ធរបស់អឺរ៉ុប មានសារៈសំខាន់សម្រាប់មនុស្សរាប់លាននាក់ ដែលត្រូវមានវិធានការការពារ។
«ខ្ញុំមើលឃើញថា ឧត្ដមក្រុមប្រឹក្សា ពិគ្រោះយោបល់ មានជំហរដូចរដ្ឋាភិបាល មានទស្សនៈគាំទ្ររដ្ឋាភិបាល។ ដូច្នេះ មើលមិនឃើញសារៈសំខាន់ពី EBA ទេ ប៉ុន្តែ យើងជាប្រជាពលរដ្ឋ យើងមើលឃើញ EBA មានសារៈសំខាន់ វាប៉ះពាល់ជីវភាពរាស្ត្ររាប់លាននាក់ ហើយប៉ះពាល់ដល់សេដ្ឋកិច្ចជាតិទាំងមូល»។
នៅក្នុងសេចក្តីប្រកាសរបស់សហភាពអឺរ៉ុបកាលពីថ្ងៃទី១២ ខែវិច្ឆិកា ឆ្នាំ២០១៩ បានបញ្ជាក់ថា គណៈកម្មការស្វែងរកការពិតរបស់អឺរ៉ុបបានបញ្ចប់របាយការណ៍របស់ខ្លួន ហើយបានបញ្ជូនឱ្យរដ្ឋាភិបាលកម្ពុជាពិនិត្យ និងឆ្លើយតប។
សមាគមរោងចក្រកាត់ដេរកម្ពុជា ហៅកាត់ថា GMAC បង្ហាញក្ដីបារម្ភ ដោយថា ការបាត់បង់ប្រព័ន្ធអនុគ្រោះពន្ធផ្នែកពាណិជ្ជកម្មពីសហភាពអឺរ៉ុបនេះ នឹងធ្វើឱ្យប៉ះពាល់ដល់កម្មកររោងចក្រ ៧៥ម៉ឺននាក់ និងប៉ះពាល់ដល់ពលរដ្ឋខ្មែរ ៣លានគ្រួសារផ្សេងទៀតដោយប្រយោល។
ប្រទេសកម្ពុជាទទួលបានការអនុគ្រោះពន្ធ EBA របស់អឺរ៉ុបនេះ សម្រាប់ការនាំទំនិញទៅកាន់សហភាពអឺរ៉ុបចាប់តាំងពីឆ្នាំ២០០១មក។ EBA នេះបានផ្តល់ផលចំណេញដល់កម្ពុជាប្រមាណ ៧០០លានដុល្លារអាមេរិកក្នុងមួយឆ្នាំ។