ប្រធានអង្គភាពអ្នកនាំពាក្យរដ្ឋាភិបាល លើកឡើងថា កម្ពុជានឹងមិនមានការបន្ទន់ជំហរណាមួយជាមួយសហភាពអឺរ៉ុប ដើម្បីរក្សាប្រព័ន្ធអនុគ្រោះពន្ធ ”អ្វីៗគ្រប់យ៉ាងលើកលែងអាវុធ” ឬហៅកាត់ថា EBA ដោយលោកបញ្ជាក់ថា កម្ពុជាអនុវត្តទៅតាមច្បាប់របស់ប្រទេស។
ការលើកឡើងបែបនេះរបស់លោក គឺឆ្លើយតបទៅនឹងរបាយការណ៍ស៊ើបអង្កេតដំណាក់កាលទី២ របស់គណកម្មការអឺរ៉ុប ក្នុងដំណើរឈានទៅដល់ការព្យួរប្រព័ន្ធ EBA ពីកម្ពុជា ដែលបានផ្ញើទៅរដ្ឋាភិបាលពិនិត្យ និងឆ្លើយតបនៅថ្ងៃម្សិលមិញ។ បើតាមនីតិវិធី កម្ពុជាមានពេល១ខែ គិតចាប់ពីថ្ងៃទទួល ដើម្បីធ្វើការពិនិត្យ និងឆ្លើយតប ហើយគណកម្មការនឹងបិទបញ្ចប់របាយការណ៍ និងធ្វើការសម្រេចចិត្តនៅខែកុម្ភៈ ឆ្នាំ២០២០។
លោកស្រី Cecilia Malmstrom ស្នងការពាណិជ្ជកម្មនៃសហភាពអឺរ៉ុប បានសរសេរលើបណ្តាញសង្គមTwitter របស់លោកស្រីថា សហភាពអឺរ៉ុបមានការព្រួយបារម្ភខ្លាំងពីបញ្ហាសិទ្ធិមនុស្ស។ លោកស្រី Cecilia Malmstrom៖
«យើងបានបញ្ចប់របាយការណ៍របស់យើងស្តីពីការព្យួរប្រព័ន្ធអនុគ្រោះពន្ធបណ្តោះអាសន្នលើកម្ពុជា។ យើងមានការព្រួយបារម្ភយ៉ាងខ្លាំងអំពីស្ថានភាពសិទ្ធិមនុស្សនៅកម្ពុជា។»
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន លើកឡើងថា កម្ពុជាបានពន្យល់តបក្តីកង្វល់របស់សហគមន៍អឺរ៉ុប ពាក់ព័ន្ធបញ្ហាសិទ្ធិមនុស្ស និងសិទ្ធិការងារនៅកម្ពុជារួចហើយ ហើយខ្លួនកំពុងរង់ចាំមើលលទ្ធផលនៃការសម្រេចចិត្តរបស់គណៈកម្មការ។ លោកគូសបញ្ជាក់ថា កម្ពុជា នឹងមិនមានការផ្លាស់ប្តូរជំហរដើម្បីរក្សាប្រព័ន្ធអនុគ្រោះពន្ធនេះនោះទេ។ លោក ផៃ ស៊ីផាន៖
«យើងអត់មាននិយាយរឿងបន្ធូរបន្ថយ យើងពន្យល់ពីអ្វីដែលយើងបានធ្វើ ពីព្រោះការកសាងជាតិ មិនមែនទៅតាមអារម្មណ៍ ទៅតាមវេក្យាសព្ទរឿងអ្វីនោះទេ ឬវោហារសព្ទនោះទេ គឺយើងធ្វើទៅតាមអ្វីដែលជាច្បាប់»។
អ្នកនាំពាក្យក្រសួងការបរទេស លោក កុយ គួង បានឱ្យដឹងថា កម្ពុជា បានទទួលយករបាយការណ៍នោះពីគណកម្មការហើយ ប៉ុន្តែ លោកថា លោកមិនទាន់បានពិនិត្យខ្លឹមសារនៅក្នុងនោះនៅឡើយ។ យ៉ាងណា លោកលើកឡើងថា ការបង្ហាញពីក្តីកង្វល់នានារបស់សហគមន៍អឺរ៉ុបកន្លងមក គឺជាសិទ្ធិរបស់ពួកគេ។ លោក កុយ គួង៖
«បាទ! អារឿងខាងគាត់កង្វល់ អាហ្នឹងគឺជាសិទ្ធិរបស់គាត់ ប៉ុន្តែ អ្វីដែលយើងអាចធ្វើបានក៏ជាសិទ្ធិរបស់យើងដែរ។ អ្វីដែលយើងអាចធ្វើបាន យើងធ្វើ អ្វីដែលយើងធ្វើមិនបាន គឺយើងមិនអាចធ្វើបានទេ»។
ចាប់ពីខែកុម្ភៈមក សហភាពអឺរ៉ុបដែលមានសមាជិក ២៨ប្រទេស បានដំណើរការនិតិវិធីឈានទៅព្យួរប្រព័ន្ធអនុគ្រោះពន្ធ EBA ជាបណ្ដោះអាសន្ន ក្រោយពីរកឃើញថា រដ្ឋាភិបាលបានបរាជ័យក្នុងការស្តារស្ថានភាពសិទ្ធិមនុស្ស និងប្រជាធិបតេយ្យតាមលក្ខខណ្ឌរបស់ខ្លួន។
សហភាពនេះ បានទាមទារឲ្យរដ្ឋាភិបាលកម្ពុជាស្ដារស្ថានភាពសិទ្ធិមនុស្ស ឲ្យអតីតគណបក្សសង្គ្រោះជាតិបានដំណើរការឡើងវិញ និងត្រូវដោះលែងលោក កឹម សុខា ជាដើម ខណៈដែលរដ្ឋាភិបាលឆ្លើយតបថា ជាបន្ទាត់ក្រហមមិនអាចធ្វើទៅរួច ព្រោះជាអធិបតេយ្យជាតិ។
ប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ ហៅកាត់ថា EBA ត្រូវបានមន្ត្រីជំនាញ រដ្ឋាភិបាលប៉ាន់ប្រមាណថា ទឹកប្រាក់ជិត ៧០០លានដុល្លារក្នុងមួយឆ្នាំ ដែលកម្ពុជាចំណេញពីការមិនបង់ពន្ធ៕