ក្រុមអ្នកសារព័ត៌មានកម្ពុជា បានទាមទារទៅរដ្ឋាភិបាល និងអាជ្ញាធរ ឱ្យធានាពីសេរីភាពពេញលេញនៃការរាយការណ៍ព័ត៌មានរបស់អ្នកសារព័ត៌មានដែលបម្រើការនៅក្នុងប្រទេសកម្ពុជា ក្រោយពីអ្នកសារព័ត៌មានវីអូឌី ២រូប ត្រូវបានឃាត់សួរនាំកាលពីថ្ងៃម្សិលមិញនេះ។
អ្នករាយការណ៍ព័ត៌មានវីអូឌី លោក វណ្ណ វិចារ និងសហការី លោក ជន ចាន់រ៉ែន ដែលជាអ្នកថតរូប ត្រូវបានកងកម្លាំងអាវុធហត្ថក្រុងប៉ោយប៉ែត ឃាត់ខ្លួន និងសាកសួរ អំឡុងពេលពួកគេចុះទៅយកព័ត៌មានអំពីស្ថានភាពច្រកព្រំដែនប៉ោយប៉ែត ទាក់ទងនឹងការវិលត្រឡប់មកកម្ពុជាវិញរបស់អតីតមេដឹកបក្សប្រឆាំង លោក សម រង្ស៊ី កាលពីថ្ងៃទី០៩ ខែវិច្ឆិកា។
លោក វណ្ណ វិចារ បានប្រាប់ថា រូបលោក និងលោក ជន ចាន់រ៉ែន ត្រូវបានកងរាជអាវុធហត្ថក្រុងប៉ោយប៉ែតឃាត់ខ្លួននៅម៉ោងប្រហែល ៣រសៀល ហើយបញ្ជូនទៅសាកសួរនៅទីបញ្ជាការដ្ឋានកងរាជអាវុធហត្ថក្រុងប៉ោយប៉ែតរហូតដល់ម៉ោង ៦ល្ងាច។
អ្នកសារព័ត៌មានរូបនេះ រៀបរាប់បន្តថា សម្ភារសម្រាប់បម្រើឱ្យការផលិតព័ត៌មាន ហើយសូម្បីតែសារឆ្លើយឆ្លងជាមួយភរិយាលោក ក៏ត្រូវបានសមត្ថកិច្ចដកហូតយកទៅត្រួតពិនិត្យផងដែរ ដែលសកម្មភាពនេះ លោកចាត់ទុកថា ជាការរារាំងដល់សិទ្ធសេរីភាពក្នុងការបំពេញវិជ្ជាជីវៈរបស់អ្នកសារព័ត៌មាន។ លោក វណ្ណ វិចារ ប្រាប់ថា៖
«គាត់ឃាត់ខ្លួនពួកខ្ញុំប្រហែលកន្លះម៉ោងហើយ គាត់ក៏បំបែកខ្ញុំជាមួយចាន់រ៉ែនទៀត។ គាត់យកខ្ញុំទៅដាក់ក្នុងបន្ទប់មួយ ហើយគាត់សួរខ្ញុំ ដើម្បីគាត់ឆែកមើល។ គាត់ឆែកមើលទូរសព្ទ គាត់ឆែកមើលសារក្នុងគ្រុបក្នុងទូរសព្ទទាំងអស់ហ្នឹង ហើយនិងឆែកមើលឯកសារក្នុង Laptop។ គាត់មើលអត្ថបទយើង ហើយគាត់សួរ អាអត្ថបទនេះយ៉ាងម៉េច? អាអត្ថបទនោះយ៉ាងម៉េចអ៊ីចឹង? ចំពោះទូរសព្ទគាត់ឆែកមើលសារក្នុង Messenger អ៊ីចឹង គាត់ក៏ស្តាប់សារមួយចំនួន។ ឆ្លងកាត់ការសួរនាំហើយ គាត់ក៏ធ្វើរបាយការណ៍ជូនថ្នាក់លើគាត់ តែខ្ញុំមិនដឹងថា កម្រិតប៉ុណ្ណាទេ»។
អភិបាលក្រុងប៉ោយប៉ែត លោក គៀត ហ៊ុល និងអភិបាលខេត្តបន្ទាយមានជ័យ លោក អ៊ុំ រាត្រី មិនបកស្រាយអំពីករណីឃាត់ខ្លួនអ្នកសារព័ត៌មានទាំងពីររូបនេះទេ ដោយប្រាប់ថា ជាប់រវល់។
ក្នុងសេចក្តីថ្លែងការណ៍របស់ខ្លួននៅថ្ងៃនេះ សម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា បានបង្ហាញការសោកស្តាយ និងព្រួយបារម្ភករណីកម្លាំងកងរាជអាវុធហត្ថឃាត់ខ្លួនលោក វណ្ណ វិចារ និងលោក ជន ចាន់រ៉ែន ទៅសាកសួរអស់រយ:ពេលជាង ៣ម៉ោង។
ខេមបូចា លើកឡើងថា សមត្ថកិច្ចឃាត់ខ្លួនអ្នកសារព័ត៌មាន ដោយគ្រាន់តែពួកគេព្យាយាមថតរូប និងថតវីដេអូអំពីសកម្មភាពតវ៉ារបស់អាជីវករដឹកត្រី ដែលបានទាមទារឱ្យអាជ្ញាធរបើកច្រកព្រំដែន ដើម្បីបានយកត្រីទៅលក់ក្នុងទឹកដីថៃ។
ខេមបូចាស្នើទៅរដ្ឋាភិបាល និងអាជ្ញាធរគ្រប់ជាន់ថ្នាក់ ឱ្យធានាសិទ្ធិសេរីភាពអ្នកសារព័ត៌មាននៅទូទាំងប្រទេស ដើម្បីឱ្យពួកគេមានសេរីភាពពេញលេញក្នុងការផ្តល់ព័ត៌មានជូនប្រជាពលរដ្ឋ ដោយពុំមានភាពភ័យខ្លាច ការគាបសង្កត់ និងការចោទប្រកាន់នានា ស្របទៅតាមមាត្រា ៤១ រដ្ឋធម្មនុញ្ញកម្ពុជា។
មាត្រា៤១ នៃរដ្ឋធម្មនុញ្ញកម្ពុជា ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ម៉ៃ ទិត្យថារ៉ា ចាត់ទុកការហៅអ្នកសារព័ត៌មានទាំងពីរនាក់ទៅសាកសួរនេះថា អាជ្ញាធរកំពុងរឹតត្បិតសេរីភាពរបស់អ្នកសារព័ត៌មានកម្ពុជា។ លោកស្នើទៅរដ្ឋាភិបាល និងអាជ្ញាធរទាំងអស់ ត្រូវធានាពីសិទ្ធិសេរីសារព័ត៌មាននៅទូទាំងប្រទេស ដោយកុំឱ្យមានករណីនេះឡើងបន្តទៀត។ លោក ម៉ៃ ទិត្យថារ៉ា ប្រាប់ថា៖
«ធានាទៅដល់សិទ្ធិអ្នកសារព័ត៌មាន ដោយគាត់អាចធ្វើការយកព័ត៌មានបាន ដោយគ្មានការភ័យខ្លាច និងការគំរាមកំហែង។ ការធ្វើបែបនេះ វាប៉ះពាល់ដល់អ្នកសារព័ត៌មានធ្វើឱ្យពិបាកក្នុងការយកព័ត៌មាន ហើយវាជាការគំរាមកំហែងអ្នកយកព័ត៌មាន»។
អ្នកសម្របសម្រួលគម្រោងធុរកិច្ច និងសិទ្ធមនុស្ស នៃមជ្ឈមណ្ឌលសិទ្ធមនុស្សកម្ពុជា លោក វណ្ណ សុផាត ដែលបានចុះឃ្លាំមើលស្ថានការណ៍នៅច្រកព្រំដែនប៉ោយប៉ែតផងដែរនោះ មានប្រសាសន៍ថា អ្នកសារព័ត៌មានមានសិទ្ធិថតរូបភាព ឬព្រឹត្តិការណ៍ដែលកើតឡើងទីសាធារណៈបាន ដោយមិនមានការគំរាមកំហែងឡើយ។
លោកបន្តថា ប្រសិនបើអ្នកសារព័ត៌មានគ្រាន់តែថតរូបអំពីព្រឹត្តិការណ៍ពិតនៅទីសាធារណៈ ហើយត្រូវសមត្ថកិច្ចឃាត់ ឬហៅទៅសាកសួរ បង្ហាញឱ្យឃើញសិទ្ធិសេរីភាពអ្នកសារព័ត៌មាននៅក្នុងប្រទេសកម្ពុជា មិនទាន់មានភាពប្រសើរឡើយ។ លោក វណ្ណ សូផាត ប្រាប់ថា៖
«សេរីភាពអ្នកសារព័ត៌មាននៅប្រទេសកម្ពុជាហ្នឹង គឺថាមិនទាន់បានគោរពឱ្យបានទូលំទូលាយទៅតាមបទដ្ឋានអន្តរជាតិនៅឡើយទេ»។
វីអូឌីមិនអាចសុំការអត្ថាធិប្បាយពីអ្នកនាំពាក្យក្រសួងព័ត៌មាន លោក ផុស សុវណ្ណ និងលោក មាស សុភ័ណ្ឌ រួមទាំងលោក អ៊ុក គឹមសេង បានទេ ដោយទូរសព្ទចូលគ្មានអ្នកទទួល។
របាយការណ៍ស្ដីពីសន្ទស្សន៍សេរីភាពសារព័ត៌មានពិភពលោកឆ្នាំ២០១៩ បានចាត់ថ្នាក់ប្រទេសកម្ពុជាក្នុងលំដាប់លេខ១៤៣ លើ១៨០ ដែលបង្ហាញថា ស្ថានភាពសេរីភាពសារព័ត៌មាននៅក្នុងប្រទេសនេះ ស្ទើរតែគ្មានភាពសេរីទាល់តែសោះ និងបានធ្លាក់ចុះជាបន្តបន្ទាប់ពី១៤២ នៅឆ្នាំ២០១៨ និង១៣៧ ក្នុងឆ្នាំ២០១៧៕
