សហរដ្ឋអាមេរិកគ្រោងនឹងជំរុញទំហំពាណិជ្ជកម្មទ្វេភាគីជាមួយប្រទេសឥណ្ឌូណេស៊ីឱ្យបានកើនដល់៥០ពាន់លានដុល្លារ នៅរយៈពេល៣ឆ្នាំបន្ទាប់។
ការជំរុញនេះធ្វើឡើងបន្ទាប់ពីរដ្ឋាភិបាលឥណ្ឌូណេស៊ី បានបង្ហាញជំហរវិជ្ជមានទៅកាន់អាមេរិក ក្នុងការដោះស្រាយបញ្ហាចំពោះមុខផ្សេងៗ ក្នុងកិច្ចពិភាក្សាទ្វេភាគីមួយដឹកនាំដោយរដ្ឋមន្រ្តីសម្របសម្រួលកិច្ចការសេដ្ឋកិច្ចឥណ្ឌូនេស៊ី លោក Airlangga Hartarto។
រដ្ឋលេខាធិការពាណិជ្ជកម្មអាមេរិក លោក Wilbur Ross លើកឡើងទៅកាន់ក្រុមអ្នកសារព័ត៌មាននៅថ្ងៃម្សិលមិញថា អាមេរិកវាយតម្លៃខ្ពស់ចំពោះការរឹតចំណងទំនាក់ទំនងសេដ្ឋកិច្ចជាមួយឥណ្ឌូណេស៊ី រាប់បញ្ចូលការជំរុញវិនិយោគិនអាមេរិកមកប្រទេសមួយនេះ និងការបង្កើនទំហំពាណិជ្ជកម្មទ្វេភាគីឱ្យកាន់តែធំ។ លោក Ross ថ្លែងថា៖
«ខ្ញុំគិតថា យើងនឹងឃើញវិនិយោគិនពីក្រុមហ៊ុនអាមេរិកកាន់តែច្រើនឡើងចូលមកបោះទុនរកស៊ីនៅប្រទេសឥណ្ឌូណេស៊ី ហើយទំហំពាណិជ្ជកម្មរវាងប្រទេសទាំងពីរ នឹងមានកម្រិតកាន់តែខ្ពស់ជាងអ្វីដែលមាននាពេលបច្ចុប្បន្ន»។
លោក Wilbur Ross បន្ថែមថា លោកជឿជាក់ថា ឥណ្ឌូណេស៊ីនឹងអាចដោះស្រាយបានយ៉ាងឆាប់រហ័សនូវបញ្ហាផ្សេងៗដែលកំពុងរាំងស្ទះដល់ច្រកផ្លូវនៃការជំរុញទំនាក់ទំនងពាណិជ្ជកម្មជាមួយអាមេរិក។
កាលពីខែមេសាកន្លងទៅ មន្រ្តីអ្នកនាំពាក្យក្រសួងពាណិជ្ជកម្មអាមេរិក លើកឡើងថា ខ្លួនកំពុងពិនិត្យមើលសិទ្ធិទទួលបានការពង្រីកវិសាលភាពប្រព័ន្ធអនុគ្រោះពន្ធ GSP សម្រាប់ប្រទេសឥណ្ឌូណេស៊ី រួមនឹងប្រទេសឥណ្ឌា និងកាហ្សាក់ស្ថាន ដោយផ្អែកលើលក្ខន្តិកៈនៃសេវាកម្ម និងការវិនិយោគ។
អគ្គនាយកកិច្ចការចរចាពាណិជ្ជកម្មអន្តរជាតិនៃក្រសួងពាណិជ្ជកម្មឥណ្ឌូណេស៊ី លោក Iman Pambagyo លើកឡើងថា ប្រធានាធិបតីអាមេរិក លោក ដូណាល់ ត្រាំ បានលើកពីក្តីកង្វល់របស់ខ្លួនចំពោះច្បាប់ឥណ្ឌូណេស៊ីដែលកំណត់លើប្រព័ន្ធអេឡិចត្រូនិច និងប្រតិបត្តិការវិនិយោគមួយចំនួន។ ឆ្លើយតបនឹងកង្វល់នេះ លោក Airlangga បានថ្លែងថា៖
«រដ្ឋាភិបាលឥណ្ឌូណេស៊ី នឹងជួយសម្រួលដល់ការវិនិយោគរបស់អាមេរិក តាមរយៈការកែសម្រួលច្បាប់ដើម្បីបន្ធូរបន្ថយការរឹតបណ្តឹងលើលក្ខន្តិកៈមូលធន និងភាពជាដៃគូជំនួញ»។
នៅក្នុងឆ្នាំ២០១៧ រដ្ឋាភិបាលក្រុងហ្សាកាតា បានទទួលប្រយោជន៍ពីប្រព័ន្ធអនុគ្រោះពន្ធ GSP របស់អាមេរិក លើផលិតផលនាំចេញរបស់ខ្លួនទៅកាន់ប្រទេសមួយនេះ គិតជាទំហំទឹកប្រាក់បានចំនួន១,៩ពាន់លានដុល្លារ ប៉ុន្តែ ចំនួននេះស្មើត្រឹម១០ ទៅ១៥ភាគរយនៃទំនិញនាំចេញសរុបរបស់ខ្លួនប៉ុណ្ណោះ។
យោងតាមគេហទំព័ររដ្ឋាភិបាលអាមេរិក ឥណ្ឌូណេស៊ីគឺជាទីផ្សារទំនិញធំបំផុតលំដាប់ទី ២៦ របស់អាមេរិក គិតត្រឹមរយៈពេលចុងក្រោយនេះ។ សម្រាប់ទំហំពាណិជ្ជកម្មសរុបនៃប្រទេសទាំងពីរ សម្រាប់ការដោះដូរទំនិញ និងសេវាកម្ម ក្នុងឆ្នាំ២០១៨ គឺមានចំនួនប្រមាណ ៣២,៩ពាន់លានដុល្លារ ដោយការនាំចេញមាន ១០,៨ពាន់លានដុល្លារ ឯការនាំចូលមាន ២២,១ពាន់លានដុល្លារ។
ក្នុងនោះ អាមេរិកនាំចេញទៅឥណ្ឌូណេស៊ីមានចំនួន ៨,២ពាន់លានដុល្លារ កើន ១៩,១ភាគរយ ធៀបនឹងឆ្នាំ២០១៧ ដែលទទួលបាន ១,៣ពាន់លានដុល្លារ ឯអាមេរិកនាំចូលទំនិញពីឥណ្ឌូណេស៊ីសរុបមានចំនួន ២០,៨ពាន់លានដុល្លារ កើន ៣,១ភាគរយ ធៀបនឹងឆ្នាំ២០១៧ ដែលទទួលបាន ៦៣៦លានដុល្លារ។
នៅក្នុងឆ្នាំ២០១៥ ទំនាក់ទំនងពាណិជ្ជកម្មទ្វេភាគីរវាងប្រទេសទាំង២ បានបង្កើតការងារដល់ពលរដ្ឋឥណ្ឌូណេស៊ីប្រមាណ ៥៦០០ពាន់នាក់។
កាលពីឆ្នាំ២០១៨ សហរដ្ឋអាមេរិក និងប្រទេសឥណ្ឌូណេស៊ី បានព្រមព្រៀងគ្នាដាក់ចេញផែនការយុទ្ធសាស្រ្តមេ ដើម្បីជំរុញទំហំពាណិជ្ជកម្មទ្វេភាគី ឱ្យកើនដល់ ៥០ពាន់លានដុល្លារ ក្នុងរយៈពេល ៣ឆ្នាំទៅមុខ ខណៈឆ្នាំនោះ ប្រទេសទាំងពីរទទួលបាន ២៨,៦ពាន់លានដុល្លារ លើសការរំពឹងទុក ៨,២ពាន់លានដុល្លារ៕
