មន្ត្រីថៃអះអាងថា មានករណីបំផ្ទុះគ្រាប់បែកនៅភាគខាងត្បូងប្រទេសកាលពីយប់ថ្ងៃអង្គារម្សិលមិញ នៅតំបន់ដែលមានជនជាតិអ៊ីស្លាមបះបោរផ្តាច់ខ្លួន ដែលបណ្តាលឱ្យមានមនុស្សស្លាប់យ៉ាងតិច១៥នាក់។
តាមមន្ត្រីថៃថ្លែងប្រាប់ទីភ្នាក់ងារសារព័ត៌មានរ៉យទ័រគឺករណីបំផ្ទុះគ្រាប់បែក និងបាញ់ប្រហារកាលពីយប់ម្សិលមិញកើតឡើងនៅខេត្តយ៉ាឡា ត្រង់ព្រំប្រទល់ភូមិប្រជាពលរដ្ឋថៃ និងប្រជាពលរដ្ឋអ៊ីស្លាមសញ្ជាតិថៃរស់នៅច្រើន។
មន្ត្រីយោធាឈ្មោះ Pramote-in ជាអ្នកនាំពាក្យសន្តិសុខក្នុងតំបន់ភាគខាងត្បូងថ្លែងប្រាប់រ៉យទ័រថា ការវាយប្រហារនេះគឺជាទ្រង់ទ្រាយធំបំផុតប្រចាំឆ្នាំនេះ។
ក្រុមជនជាតិអ៊ីស្លាម (Malay-Muslim) នៅក្នុងខេត្តយ៉ាឡា ប៉ាតានី និងខេត្តណារ៉ាតធីវ៉ាត់ បានធ្វើចលនាបះបោរចង់ផ្តាច់ខ្លួនទៅជារដ្ឋឯករាជ្យតាំងពីឆ្នាំ២០០៤មក។ ចាប់តាំងពីចលនាបះបោរកើតឡើងមកបានបណ្តាលឱ្យមានអ្នកស្លាប់ប្រមាណ៧ ០០០នាក់។
ទោះយ៉ាងណា ក្រោយពេលកើតហេតុវាយប្រហារកាលពីម្សិលមិញនេះ សមត្ថកិច្ចនៅមិនទាន់រកឃើញថា ក្រុមណាមួយជាអ្នកប្រព្រឹត្តិនោះទេ។
នៅខេត្តយ៉ាឡា ប៉ាតានី និងណារ៉ាត់ធីវ៉ាត់ គឺជាដែនដីឯករាជ្យមួយរបស់ស្តេចស៊ូតង់ Malay Muslim មុនពេលថៃចូលកាន់កាប់នៅឆ្នាំ១៩០៩។