រដ្ឋបាលរាជធានីភ្នំពេញ បានផ្តល់ម៉ូតូកង់បីដល់ខណ្ឌចំនួន៤ ដើម្បីជួយការងារប្រមូលដឹកជញ្ជូនសំរាម ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រារព្ធទៅចាប់ពីថ្ងៃទី១០ដល់ ថ្ងៃ១២ ខែវិច្ឆិកា ឆ្នាំ២០១៩ខាងមុខ។
តាមការចុះផ្សាយលើទំព័រហ្វេសប៊ុករបស់រដ្ឋបាលរាជធានីភ្នំពេញ កាលពីម្សិលមិញនេះ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានប្រគល់ម៉ូតូកង់បីទៅរដ្ឋបាលខណ្ឌចំនួនបួនមានខណ្ឌជ្រោយចង្វារ ខណ្ឌដូនពេញ ខណ្ឌចំការមន និងខណ្ឌបឹងកេងកង។ ប្រភពដដែលឲ្យដឹងថា សង្កាត់នីមួយៗក្នុងខណ្ឌទាំង៤នេះ ទទួលបានម៉ូតូកង់បីមួយគ្រឿង។
ប្រធានក្រុមយុវជនសំរាម លោក សាន ដារ៉ាវីត បានប្រាប់អ្នកសារព័ត៌មាននៅថ្ងៃនេះថា សាទរចំពោះសាលារាជធានីភ្នំពេញ ដែលផ្តល់ម៉ូតូកង់បីសម្រាប់ដឹកជញ្ជូនសំរាមនាឱកាសបុណ្យអុំទូកខាងមុខនេះ។
លោកបានបន្ថែមថា នៅក្នុងរយ:ពេល៣ថ្ងៃក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ក្រុមយុវជនរបស់លោកមានប្រហែលប្រមាណ១០០ នាក់ សហការជាមួយនឹងក្រុមយុវជនផ្សេងទៀត ដូចជា ក្រុមយុវជនខាងក្រៀលកម្ពុជា មន្រ្តីសាលារាជធានីភ្នំពេញ សហភាពសហព័ន្ធយុវជនកម្ពុជា នឹងចូលរួមសម្អាតបរិស្ថាន តាមរយ:ការបែកចែកគ្នាដើររើសសំរាម។
លោក សាន ដារ៉ាវីត និយាយថា៖ « មានក្រុមយុវជនជាច្រើន ខាងក្រៀល ខាងរាជធានីភ្នំពេញ ខាង ស.ស.យ.ក គឺយើងសហការគ្នាទៅណា បែងចែកកន្លែងគ្នារើស។ ក្រុមយុវជន ក៏គាត់មានការផ្សព្វផ្សាយផងដែរ ចឹងយើងចូលរួមជាមួយពួកគាត់»។
ក្នុងរយៈពេល៣ថ្ងៃនៃព្រះរាជពិធីបុណ្យអុំទូក កាលពីឆ្នាំ២០១៨ ក្រុមហ៊ុនប្រមូលសំរាម ស៊ិន ទ្រី ឱ្យដឹងថា ខ្លួនប្រមូលសំរាមបានជាង៦ពាន់តោន។
មន្រ្តីជាន់ខ្ពស់ក្រសួងបរិស្ថាន កាលពីម្សិលមិញ បានអះអាងថា ក្រសួងនឹងយកឱកាសបុណ្យអុំទូកដើម្បីផ្សព្វផ្សាយពីវិធានការរបស់រដ្ឋាភិបាលលើអ្នកចោលសំរាមខុសច្បាប់ ដោយបញ្ជាក់ថា ក្រោយចប់ពិធីនេះវិធានការនឹងអនុវត្តដោយមិនលើកលែងនោះទេ៕
រាយការណ៍៖ ម៉ៅ ស៊ីណា
